El xestu dimisionariu

 

Ta la cosa política abondo caliente nel Reinu Xuníu, anque podría dicise que l’ambiente lleva perende yá munchu tiempu revueltu, o asprosu, o difícil, o inaguantable, o pa dise a la so casa, que ye de lo que quiero escribir. Y ye que, al centrame no d’ellí, evito entrar direutamente no de nueso, anque, lóxicamente, les comparances, si bien odioses, resulten evidentes y obligaes. Ye lo qu’hai.

El casu ye que na casa de los fíos de la Gran Bretaña acaben d’enterase que l’embaxador recién dimitíu en Washington, aquel que salía en calzoncillos con mozuques nes mansiones d’Epstein, el sátrapa pedófilu que quita’l suañu a mediu mundiu, o a lo menos a mediu mundiu del poder, nun superara los controles de seguridá pal puestu, dalgo que suelen facer nos países con un ciertu pedigrí.

La movida política que se tien desatao ye, como cabría imaxinase, de calibre superior, y la oposición, tamién como cupiera esperar, pide la dimisión del primer ministru, que fue quien lo nomó; anque ésti llámase a andana aludiendo a qu’a él nadie-y dio cuenta del suspensu del fulanu. Y equí ye cuando aportamos al xestu dimisionariu.

Dimisión, dimisión, nunca bien definida nin comprendida ¿o yera disciplina? Bono, ye igual, el fondu ye’l mesmu, yá que pa Max Weber, un de los grandes neso de pensar, dimítese por dos motivos: Por convicción, porque nun se ta dispuestu a tragar si’l bocáu va escontra los sos principios; o por responsabilidá, cuando les decisiones propies o la so ausencia tienen sío dañibles pa la organización.

Agora, con esa descripción del conceutu y de la cuestión británica podemos intentar facer un examen de 360 graos y seguramente vamos atopar, en casa y nel esterior, un gran númberu d’oportunidaes y personaxes o líderes que tienen dao un sacu de motivos pa exercer esi xestu dimisionariu. Pero descuiden vustedes, nin equí nin alló van ver vustedes a naide, o casi naide, exercer esa aición que zarra en si mesma una carga de dignidá que nestos tiempos resulta insólita.

Ye una constante nes nueses vides de ciudadanos la receición de noticies sobro casos o situaciones nes que’l responsable políticu se descarga en funcionarios pa evitar la so responsabilidá, o simplemente güeya pa otru llau, cuando nun esgargaxa les sos soflames vitrioliques escontra la oposición o la prensa. Nun son estos tiempos nos que l’exerciciu de la política se distinga pola dignidá de los sos exercientes, y con ello, la dignidá de nueso como ciudadanos tamién se ve afeutada, tantu que, l’ausencia casi total d’esi xestu dimisionariu, déxamos a nós como siervos o súbditos d’esa clas política.

Miren alredor.

Raúl Suevos

A 18 díes vencíos d’abril de 2026

Torna en castellán en repdiv.blogspot.com