Mussolini algamó’l poder nuna Italia que penaba a recuperase de la Gran Guerra, n’ochobre de 1922, pente medies un guelpe d’estáu -Curzio Malaparte descrébelo maxistralmente na so “Tecnica del colpo di stato”- que se manifestó na conocía Marcha sobro Roma. Dempués vendríen casi 21 años de gobiernu, de más a menos, y dempués a peor, hasta llegar al 24 de xunetu del 43, cuando’l so propiu Gran Conseyu Fascista lo baltó pente medies una votación interna.
Nos sos años primeros, digan lo que digan, desarrolló’l país de forma ablucante de les llibertaes, destierros de la oposición y unos cuantos asesinatos políticos, lo que lu llevó a ser l’almirada figura referencial pa un emerxente Adolph Hitler, anque dempués válu usar como una especie de guiñol políticu pa los sos fines, ensin algamar a dáse cuenta, na su aventadura, que la fin de Benito anunciaba el so propiu final.
Vienme esto a cuentu de la memoria cola cayida de Víctor Orban, un paisanu qu’aportó al poder, como Mussolini, pa iguar el país tres la desapaición del xugu soviéticu, con propuestes nacionalistes, pero absolutamente democrátiques, pa de siguío derivar haza lo que los cursis llamen democracia illiberal, anque yo prefiero’l cesarismu democráticu, muncho más descriptivu na mío opinión. Él tamién, como Mussolini, recuperó’l pequeñu país nos sos años primeros, pa dempués camudar les lléis pa favorecer los intereses de so, zarró los güeyos a la corrupción descomanda -motivu principal de la so cayida-, controló a la xudicatura y amordazó a la prensa.
Falta para completar la historia d’Orban apuntar que tien sío’l referente políticu, cola so forma d’exercer el poder, del entoncenes na so primer presidencia Donald Trump, quien lu tien aponderao en múltiples ocasiones y recibío con grandes honores na Casa Blanca, como Hitler ficiera con Mussolini en 1937. El sofitu trumpiano tien llegao hasta unvía-y al su vicepresidente pa sofitalu na so campaña cabera, lo que nun paez que sirviera pa muncho, pero, pa lo que mos interesa, cabe entrugase si tamos énte histories asemeyables, esto ye, que la cayida d’Orban, incruenta, vien a ser como una premonición de lo que puede asoceder col ogru naranxáu de la Casa Blanca.
Los EEXX, afortunadamente, tienen un sistema políticu que, si bien nun taba abondo protexíu énte l’aportar d’un puntu como Trump, si cuenta con recursos y automatismos sistémicos que previenen qu’un cáncer puntual pueda metastatizase a tol sistema y, nesti casu, les eleiciones de mediu mandatu, que se celebren el pallares viniente, van podere, si los eleutores lo quieren, poner fin a la deriva autoritaria del señor de Mar-a-Lago.
Güeyai na redolada de vueso.
Raúl Suevos
A 15 díes vencíos d’abril de 2026
No comments:
Post a Comment