Liberum Veto

 

Los latinaxos nun paecen tar mui de moda, non como na mio dómina estudiantil, na que t’ametrallaben con ellos en cuantu que te descuidabes un momentu. Anguaño la cosa tien quedao pa los miembros de dalgunes profesiones, como por exemplu la de abogáu. Quiciabes poro esta mesma mañana el mío amigu Xuanxu solmenómos, casi a traición, un “ultra posse nemo obligatur”, qu’en llinguaxe común correspuende a un “naide ta obligáu a más de lo que puede”. Si bien na clas dirixente nun debiera ser asina.

En cuestiones del facer, o’l de construyir, cuando falamos d’Europa, debiera ser obligao’l dir más alló. El nun conformase con facer lo xusto del so deber. L’avanzar nesa construcción que, na mio opinión, supón el ser o non ser pa la Xunión; porque, si vustedes se decaten, tenemos crecío en númberu de países, pero nun paez que tenga asocedío lo mesmo coles capacidaes d’esa Xunión.

Y ye qu’esta Europa na que vivimos anguaño parezse dramáticamente a aquella Polonia del sieglu XVII, na que, demientres casi dos sieglos, la nobleza  polaca proclamaba al rey y ostentaba esi Liberum Veto que da nome a la tribuna y que supón que con un simple No de dalgún miembru de l’Asamblea la propuesta llegal que se tuviera tratando d’aprobar quedaba refugada.

Ye fácil maxinar cómo finó aquella Polonia que, ente otres desgracies, metanes el XVII sufrió lo qu’ellos nomen el Diluviu Suecu, y que consideren peor que la propia ocupación nazi y soviética. La nación polaca tevo al borde de la desapaición gracies, ente otres coses, a esi derechu de vetu, el Liberum Veto. Como-y puede pasar a la Xunión Europea.

La Xunión ye’l mayor y meyor exemplu d’integración rexonal qu’esiste nel mundiu, pero güei nun basta. Nel restu del globu vemos como’l Cesarismu democráticu, formula preciosista pa denominar a les autocracies modernes, amuesase rampante y en plenu esplendor, como nos evidencien ese tríu de cantautores formáu por Putin, Xi y Trump, que, en conxuntu, nun paecen cuntar col acompañamientu de la Xunión nin siquier como guitarrista. Yá cuenten cola Intelixencia Artificial pa poner los efeutos especiales, musicales o del tipu que faiga falta.

Fáise necesario, si nun queremos quedamos arrequexaos nel marxe del camín de la historia, dexar de llau la unanimidá nel votu del Conseyu Européu y pasar yá a les mayoríes cualificaes, a lo menos en dalgunes aérees, como la Defensa y les Rellaciones Esteriores. Vános nello la propia esistencia, por más que dalgunos líderes nun vean más alló de les fronteres nacionales.

Raúl Suevos

A 29 díes vencíos d’ochobre de 2025

Torna en castellán en repdiv.blogspot.com

Funeral de Mazón y mitín de Sánchez

 

Yera inevitable ayeri nun prestar atención al actu que tenía llugar en Valencia. Nun marcu incomparable como ye la Ciudá de les artes, y un añu xustu dempués de la Dana tráxica que se llevó la vida de 237 persones. Cómo nun tar atentu.

El casu ye que, con un pocu d’imaxinación –nun facía falta muncha- un podía prever lo qu’ayeri asocedió con abondo esactitú, especialmente tocantes al reptante presidente de la Xeneralidá valenciana, quien nos meses caberos más qu’avanzar o caminar, paeciera que s’arrastra pel camín de la so esgotada carriera política. Victima ayeri, ente les families de los muertos, de calter políticu y casi ofrenda que’l presidente Sánchez amosaba al mundiu gracies a la televisión.

Lo d’ayeri, en cuantu a Mazón, foi un esquite orquestráu al milímetru pol gabinete de Moncloa, que nun sé cuántos réditos llegará a da-y, pues en pocu tiempu les imáxes van quedar pa ilustrar los aniversarios caun de los años vinientes. Nun dan más de so, pero, sicasí, alcuentro una carga de más algame nes pallabres del Rei cuando apeló a estudiar lo asocedío y sacar les conclusiones necesaries pa enzancar que’l desastre vuelva a producise.

Quiciabes la Casa del Rei yá nun tenga’l nivel de los tiempos de don Sabino Fernández Campo porque eses pallabres paecen dar a entender que SM nun ta al tantu del trabayu del xeneral Gan, con dos documentos, un que da cuenta de los daños causaos y el procesu y cuantificación de la so recuperación, y un segundu nel que propón midies pa torgar que torne a asoceder, o alo menos desanciar les sos consecuencies.

Al xeneral Gan quiciabes-y asoceda como al xeneral Cassola, nomáu’l reformador, que la so propuesta de modernización del Exércitu fo refugada en Cortes pero que, dempués, foi recuperada puntu per puntu por gobiernos posteriores, y ello siempres va ser meyor que lo asocedío al xeneral Picasso,  que’l so informe foi “secuestráu” por Primo de Rivera y nun llegó a ver el llume. El del xeneral Gan ehí ta, pa usu, si ellos quieren, de los valencianos.

La rabia d’ayeri de dalgunos familiares escontra Mazón, nun sé hasta qué puntu azuzada pola redolada de Compromís que controla’l mundiu asociativu de la zona, tapó, en ciertu mou, la solemnidá del actu, que se dedicaba a les víctimes, en definitiva, d’un actu provocáu pola ñaturaleza, y a mín, que yá tengo dellos años, veníame l’alcordanza d’aquelles víctimes d’ETA, protagonistes silenciosos munches vegaes de funerales semiclandestinos y qu’aínda güei, munchos d’ellos, esperando xusticia. Ye lo qu’hai.

Raúl Suevos

A 30  díes vencíos d’ochobre de 2025

Torna en castellán en repdiv.blogspot.com

Una flotilla pal Dnieper

 

De xemes en cuando, pente medies de dalgún concursu televisivu o d’eso que llamen reel y que daquien que se supón amigu t’únvia ensin dalu tipu de prevención, algamo a dame cuenta de la precariedá xeográfica de les xeneraciones que me siguen, nes que con ca llei ñueva d’educación mos averamos más al analfabetismu funcional. Ye lo qu’hai.

Dalgún va dicir que coles tecnoloxíes ñueves yá nun fai falta estudiar eses coses. Asuntos tan escasos d’interés como la xeografía o la historia. Y asina atopamonos que, d’aquella conocencia del mundiu qu’empapaba les xeneraciones vieyes, güei tenemos pasao a los llocalismos, non yá a lo nacional, y poro, falar del Volga, el Don o el Dnieper, grandes ríos de la Rusia europea, esto ye, la que s’alcuentra al oeste de los Urales ¿Que qué son los Urales? Pues eso, que ye materia que nun interesa a naide.

Sicasí, equí manifiesto, son los grandes ríos europeos de Rusia que discurren haza’l sur, esto ye, que van desaguar al mar Caspiu, el d’Azov, y el Negru. Vamos dejar de llau el primer, el Volga, porque’l Caspiu nun llenda colos asuntos que mos interesen, pero vamos sorayar que’l Don, acaba en Rostov el Don, nel norte del mar d’Azov, y representa la frontera legal y xeográfica ente Rusia y Ucrania; mientes que’l Dnieper, acaba un pocu más abaxo de Jersón, n’Ucrania, y onde agora s’alluga la frontera artillera y de drones ente los dos países. P’asitiar meyor la zona, voi añeder que, metanes ambas desembocadures atopamos la formosa, martirizada ya histórica península de Crimea.  Y les llanures ente dambos ríos correspuenden a los tarrenos au cabalgaben los famosos cosacos zaporogos, ente ellos aquel novelísticu Taras Bulba, interpretáu maxistralmente nel cine por Yul Brynner.

Tornando agora al tema del conocimientu, dalgo muncho más escarsu anguaño de lo que los medios de mases pretenden facenos creer, y al posu d’esperiencia, know how creo que-y dicen los pijos, alquiríu por esos marineros de pantalla que recien, y demientres un mes llargu, mos entretuvieron cola so singladura haza Gaza ¿Nun sedría una pena que tou esi cuelmu de saber obteníu nel Mediterráneu se perdiera? ¿Nun podríen planteyase un proyectu ñuevu que subiera pel Dnieper reclamando a Vladimir Putin y los sos mozos un Alto el fueu? O meyor ¿Un repliegue?

Yá m’imaxino a la señora Colau y a la señorita Thumberg, espertes “navegantes” elles, flamexando les banderes de Rusia y Ucrania en comunión fraternal ¿A que va ser que no? Pues eso.

Raúl Suevos

A 27 díes vencíos d’ochobre de 2025

Torna en castellán en repdiv.blogspot.com

Federalismu pragmáticu nos Premios

 

Préstame güeyar la entrega de los Premios Princesa d’Asturies, anque estos tengan llugar n’Uviéu y non en Xixón, qué-y vamos facer. Tolos años me planto énte la pantalla pa reviciar de les imáxes de la capital del Principáu y, de siguío, la ceremonia nel Teatru Campoamor, qu’entama siempres emocionándome al comprobar lo bien que suena l’Himnu nacional arropáu pol soníu de les gaites asturianes.

Estí añu, amás, premiaben al Muséu antropolóxicu de México, que me sorprendió enorme y positivamente va yá dellos  años cuando tevi ocasión de visitalu de la mano del mio cuñáu Carlos, vecín d’aquella ciudá demientres un tiempu y conocedor fonderu de la cultura del país. Pásmome pola bayura de les sos coleiciones sobro dalgunes de les munches cultures d’esa gran nación; tantu en cuantu a los artefactos amosaos, como pola reproducción de sales y recintos a escala ñatural y con un realismu estraordinario.

El muséu, que yo creyía obra recien, fo creáu por iniciativa del presidente Lázaro Cárdenas, quien unvió una nutrida comisión de sabios nun viaxe añal al traviés del mundiu pa presentar una propuesta museística que ficiera honor a la cultura mexicana, y el resultáu fo esti maraviosu muséu premiáu esti añu n’Asturies, y una meta d’interés estraordinariu p’aquellos viaxeros que tengan la oportunidá de pasar pellí.

Nesti ritu añal de visión televisiva, valga la redundancia, sigo con atención variable los discursos de los premiaos, esta vegada con particular al filósofu Byung-Chui Han, surcoreanu y católicu, desacreditáu pol mío amigu Salustianu, qu’asistió a una de les sos conferencies esta selmana, pero qu’a mín dexóme ablucáu nos sos curtios minutos, pos autodefiníu como mosca coyonera, solertó sobro la deriva del neoliberalismu modernu, que, según él, conduz al populismu y la autocracia. Un discursu que recomiendo vivamente la so llectura.

Don Mario Draghi, figura que nun necesita presentación, traxomos el so conceutu de Federalismu Pragmáticu, única solución pa qu’Europa pueda subsistir nesti mundiu anguaño cargáu de tensiones y peligros. Un conceutu que’l mío conocimiento precariu de los rellabicos europeos m’avera a la Cooperación Estructurada Permanente, yá en vigor, pero ensin los resultaos esperados, y, poro, non afitada a les necesidaes actuales. Tamién pa lleer con procuru.

Eduardo Mendoza, l’únicu profesional de la pallabra nel grupu, fo’l más espurechu, curtiu, y, como s’esperaba, socarrón, pero dexando esi posu de señalda cuando espresó que nun-y prestaba’l mundiu actual, quiciabes, como yo, por cuestión d’edá, quiciabes porque ye feu.

Y pa piesllar, l’Asturies patria querida coles gaites. Ye lo que hay.

Raúl Suevos

A 24 díes vencíos d'ochobre de 2025

Torna en castellán en repdiv.blogspot.com 

La moza neumática

 

Yá nun se puede falar de veranín de San Miguel, escontra trás quedaron los figos setembrinos tamién; y les terraces, con esti tiempu anormalmente braniegu, resistense a ser abandonaes. Y a mín, que siempres me prestaron, paezme un regalín del cambiu climáticu, por más que los cuerpos resientense yá de tanta calor y, xunto colos comerciantes de textiles, echen de menos los fríos primeros serondales, que ye lo que procede.

El casu ye qu’ehí andaba yo, reviciando un merecíu vermú mientes lleía la prensa del día, y n’esto que pasó ella, la moza neumática, en descripción d’Aldous Huxley naquel inolvidable Mundiu Feliz de los adolescentes 70. Una neña de formes rotundes que, lloñe de despintar, llucía na brevedá d’un paxellu aínda braniegu, unes formes ayenes a les voluptuoses y un pocoñín esparnaes redondeces de Rubens, y más averaes al deseyu divinu que la Proserpina de Bernini provoca. Unes formes, como les de Huxley, potenciaes pola mui posible visita cotidiana a un ximnasiu, o palestra que diríen na Roma de Bernini, pero que nun algamen tampocu pa muscular por demás, al estilu de les partes del día representaes por muyeres na florentina capilla medicea creada por Miguel Angel, a la moza neumática.

La moza d’esta mañana, amás, ye empoderada. Amuésalo colos sos andares altivos, cazu arriba, griespu, y güeyada al frente; nun sé si pola fuercia del so calter o por azorronar una miopía con iñerizu a les gafes. Quién sabe, sicasí, lloñe de la mirada baxa que’l recatu imponía a les fémines de xeneraciones anteriores, y pude apreciar que los sos brazos, potentes y fuertes, allonxabense d’eses nervosidaes musculaes que dalgunes presentadores televisives y consortes esiben, argulloses del so trabayu nel ximnasiu y, quiciabes, inconscientes de que los escesos, anque s’amaruten de vezos saludables, pueden esconder pequeñes, o grandes, psicopatíes. Ye lo qu’hai. La mañana, polo demás, daba más apuntes sobro cómo camuden los tiempos; tamién los ñaturales, como esos árboles que, lloñe de lo qu’asocedía antaño, nin siquier tienen entamao a tiñise colos colores dela seronda, y cuando lo faigan, van resistir demientres dellos meses coles sos fueyes, como si quisieren negase a aceutar la llegada d’un fríu, ca vegada más cortiu y tardíu.

A mín, que toi lloñe de manexar la pluma como aquel Moraes que cantaba a la moza d’Ipanema, prestaríame tener la capacidá de tresmitir los sentimientos, toos nobles, que me provocó nunos instantes breves la visión de la rotunda guapura y xoventú d’esta neña neumática, que, creyo, yera plenamente consciente, non yá de la mío güeyada, sinon de la so capacidá pa triunfar sobro la mediocridá de la redolada.

Raúl Suevos

A 22 díes vencíos d’ochobre de 2025

Torna en castellán en repdiv.blogspot.com

El trabayu y el vientu de la hestoria

 

A midida que se van cumpliendo dellos años tamién se va ganando perspectiva, o eso creyo. Nel mio casu dame pa ver la evolución del nomáu barriu marineru de Xixón, Cimavilla, güei más botelloneru y terraceru qu’otra cosa, con hostelería y pensiones como motores económicos; lloñe d’aquellos tiempos nos que los bonos xornales de minería, naval y siderurxia, amás de les cigarreres, completabense coles que l’abareque o’l chipirón aportaben. Tiempos felices, a lo menos no llaboral.

Pa 1987 fumos portada nacional los asturianos porque n’HUNOSA entraben a trabayar les muyeres nel pozu, dalgo que, díxose, yera una meyora pergrande na llucha pola igualdá, escaeciendo que, en 1937, en plena guerra incivil, aprobóse n’España, lo que la Organización Internacional del Trabayu presentara como un llogru hestóricu, esto ye, la prohibición del trabayu de muyer y neños nes mines. Ye lo qu’hai. El vientu de la hestoria.

En Grecia, un país, nun perdamos l’alcordanza, qu’acaba de salir de diez años de fiscalización europea tres un rescate dramáticu, aprobaron esta selmana, magar les fuelgues xenerales convocaes y los disturbios provocaos, la xornada ñlaboral de trece hores, a petición de la empresa, demientres un máximo de díes añales, y, de xacíu, mui bien pagaes, guetando una flexibilización mayor nel mercáu llaboral según el gobiernu. Y ello dempués de que yá tubieran aprobao una selmana llaboral de seis díes, tamién poles mesmes razones y oxetivos ¿Un pasu atrás? ¿O la fuercia de los tiempos?

Nesti pozu Grecia metióse tres dellos años d’adulterar les cuentes nacionales y delles polítiques de subsidios irracionales y suicides que-yos tienen llevao a diez años, yá superaos, con un cinturón tan apretáu que se quedaron emsin furacos. Anguaño paez qu’aprendieron la lleición y, ensin tener asegurao’l futuru, traten a lo menos de poner un pan enriba de la mesa.

Nel nuesu casu nun tengo nidio, magar la mio visión perspectiva, otorgada pola edá, haza onde vamos, yá que, pola parte del gobiernu paecen querer ceganos col rellume d’esi PIB nacional, que despinta’l PIB per cápita, más averao a la microeconomía, anque nun mos cuente la realidá de les families corrientes, a les que se-yos diz que deben comer sano cuando la inflacción galopante, especialmente na cesta de la compra, torga-yos de facelo.

España nun va tan bien, y lo que ye peor, nun tamos preparaos pa dir mal, nin aprendemos de les noticies qu’arribaron y lleguen de Grecia, y a la fin la olla enllenase con patates, non con soflames.

Raúl Suevos

A 18 díes vencíos d’ochobre de 2025

Torna en castellán en repdiv.blogspot.com

Espaguetis al pedreru

 

Asina ye como se nomaríen los spaghetti allo scoglio n’Asturies, pero los que cooperé a afitar va dellos díes n’Italia, averao a Monza, teníen toles carauterístiques del país transalpín. Y ye que, pa entamar, tengo que referenciame al riu Isonzo, na llende ente l’italianu Friuli y Slovenia, pues desemboca ellí onde anicia la península d’Istria. Un riu, l’Isonzo, que dio nome na Primer Guerra Mundial a doce batalles, hasta la cabera, una derrota pergrande pa los italianos énte los austríacos que fizo cayer tol frente, y que, dende entós, en términos xenerales, se fale d’un Caporetto pa significar un gran desastre.

Vien esto a cuentu de que, p’aviar la, mercamos n’ufierta un par de botelles d’un chardonay del Isonzo, de factura tan escelente que casi mos quedamos ensin liquidu tan preciáu demientres la preparación. Un trabayu, debo dicir, al que, como n’ocasiones anteriores, sofité abriendo les botelles y aportando lo meyor de les mio carauterístiques conxustones.

L’asuntu escomencipió, como siempres, cola preparación de la zona cocina y el xéneru. Llimpieza de los mejillones y almexes, cortao de la sepia, separación de los gambones, tiestes per un llau y coles per otru, el trociao del pixín, cortao de los tomatinos cherry, y tamién del perexil arrogante, que n’Italia usen con abondanza.

Pa entoncenes la primer botella taba en plena batalla, acompañada d’un fueu artilleru potente en forma de pelotines de mozarella de buffala afumicatta, una verdadera delicia que recomiendo nun dexar pasar si se tien oportunidá de mete-y mano.

 La primer fase, amás de los primeros tragos llegaos del este italianu, entamó con un sofritu pequeñu, con tantu d’aceite, los tallos del perexil, con dellos ayos y dellos tomatinos, a los que s’amestaron les tiestes de los gambones, convenientemente esprimíes na sartén, y un chorrín del ricu chardonay. Una fase que finó cola dexebradura del caldín nuna tarterina aparte, y el caldu resultante de la cocción de los moluscos.

Dempués llegó’l turnu de los cácabos de sepia y pixín, tamién con un puntín d’aceite y chorrín de vinu; a los que s’añedieron los tomatinos tayaos posteriormente, y, controlando’l tiempu y el fueu, añedíase vinu o, nel so casu, dalgo d’aquel caldu que reservamos al entamu, y too ello demientres un tiempu midíu cola tapa enrriba pa que los humores se entemezan perfeutamente.

Llegaos equí llega-y-el turnu a los spaghetti, que nun van esgotar el tiempu que marca’l fabricante pa la so cocción porque unos minutos enantes pásense, ensin caldu, a la sartén onde esperen pacientemente los tropiezos la so llegada. Ellí vánse-yos amestando les coles de los gambones, les almexes y los mejillones, y, una cantidá suficiente d’aquel caldu; pa finar col añedío abundante del perexil picadín, al que tan aficionaos son los italianos.

La pinta del resultáu ye formidable, y el nuesu estáu d’ánimu tamién, tantu que abrimos una segunda botella d’esi blancu del Isonzo enantes d’aposentamos na mesa. 

Raúl Suevos

A 3 díes vencíos d'ochobre de 2025

Torna en castellán en repdiv.blogspot.com