En Hollywood tán ablucaos. Aínda nun tien fecho dala película pero yá hai dellos productores que quieren contratala, y ye qu’hai que reconocer que ye mui prestosa y resulta familiar al primer guelpe de vista. Dalgo que ye lóxico si tenemos en cuenta qu’ella nun esiste, ye, simplemente, el resultáu d’un algoritmu y la intelixencia artificial, que metieron na so xenética los güeyos, la barbadiella, la ñariz, el pelu, y la boca de personaxes yá coñocíos, familiares y guapos, esto ye, lo meyor de cada cara, pa llograr un rostru absolutamente encantador. Tilly Norwood.
Nos sindicatos estremaos del gremiu cinematográficu anden cola mosca tres la oreya, pues, anciosos ellos, incluyeran como prohibida esta posibilidá demientres la dura fuelga que caltuvieron nun va munchos años. Y ye qu’ellos sabíen de qué taben falando, pues yá Schwarzenegger, nuna peli del 87, dirixía por Paul Michael Glaser, de nome El Fuxitivu, the running man, y mui mala, yá que tal, permala, llevábamos a un 2017 qu’anguaño ye pasáu, nel que, nun mundiu d’autoridá dictatorial, que mieu, al protagonista, Arnold, sustituyíenlu nel programa televisivu de persecución a muerte, y audiencia global, por un sosias creáu por, nun recuerdo cómo lu nomaben entoncenes, intelixencia artificial. Ye lo qu’hai, vamos retrasaos con esta Tilly.
Con Arnold tamién de prota, viénme l’alcordanza daquella Desafiu Total, Total Recall, de Paul Verhoven, 1990, abondo meyor que la primer, y con una perguapa Sharon Stone faciendo de mala malísima, na que nun Marte de 2090, salía un taxi de conducción autónoma, y, sobremanera, pal plasmu y descoyone nacional, un mutante de paecíu descacharrante con Jordi Pujol que salía de les costielles del mutante portador. Y que muerre metanes una engarradiella, por cierto.
Con Terminator, de 1984, ambientada en 2029 y dirixida pol posteriormente oscarizáu James Cameron, entramos notru nivel, el del armamentu autómata o teledirixíu, nesti casu en forma de ciborg, dalgo que la guerra d’Ucrania col panel de drones perampliu de toa mena mos ta amosando yá como una realidá a la que-y falta mui poco p’aportar a esi terminator, como Francisco Rubio Damian mos cuenta na so “La Guerra de los robots”.
Hai munches más amueses de lo que Tilly Norwood mos promete, con Blade Runner, y la so distopia de replicantes basada nuna novela de 1968, ambientada nuna fantomática Los Angeles de 2019, y dirixida por Ridley Scot en plenu esplendor creativu, o la, pa mín, fabulosa Gatacca, de 1997, que mos amuesa una sociedá, entoncenes futura pero que s’asemeya dramáticamente a l’actual, na qu’impera la euxenesia y la selección xenética pa la concepción de los neños.
Hola Tilly.
Raúl Suevos
A 4 díes vencíos d’ochobre de 2025
Torna en castellán en repdiv.blogspot.com
No comments:
Post a Comment