El rellatu, y la OTAN

 

Si vustedes se fixen van decatase de que yá va tiempu que nel mundiu de la política, tantu a nivel nacional como internacional, reconozo que nel llocal ye más difícil, mos encontramos con una ausencia casi total de Polítiques, escrito asina, con mayúscules, de manera intencionada.

Y ye qu’eso, lo qu’enantes conocíemos como talo, tien quedao reducío a enunciaos simples reservaos pa los programes que los partíos políticos mos proponen en tiempu de campaña eleutoral, y que dempués pasen ignominiosamente al escaezu más fonderu, y, si acasu, xustificase’l so arrequexamientu por razones varies, siempres ayenes a la voluntá del gobernante.

Agora, y dende va yá años, lo que prima ye’l Rellatu, esto ye, la construcción, con intención persuasiva, d’acontecimientos, idees y/o valires que se presenten a una audiencia, por medios varios, de forma intencionada y coherente, cola intención de influyir nes sos emociones y comportamientos. Y neso, dede aquel pernomáu “Nun ye non” el doctor Sánchez paecía un maestru.

Anguaño paeciera que, como aquel hilarante Austin Powers, daquien-y robara’l moxu. Too, tocantes la comunicación, nun digamos yá no xudicial, paez que-y sal mal. Na so apaición tarrecible na sala de prensa baxo l’influxu d’un maquillaxe siniestru namái-y faltó que, como a Rudy Giuliani, se-y corriera’l rímel. Too lo que vien faciendo últimamente consigue l’efeutu contrariu al deseáu. Ye como si ente los centenares de asesores naide pensara nel rellatu.

Dende xineru del 24, cuando morriera Barroso, el que fuera maríu d’aquella ministra, Chacón, a la que Zapatero llevó a defensa vestía de blancu y embarazada de munchos meses, no que fue una aición efectiva y efectista del rellatu, da la sensación de qu’en Moncloa tiénse perdío’l rumbu. O quiciabes ye que l’arroyón de noticies negatives ye tan apolmonante que nun hai forma de contrarrestalu. Quién sabe.

Lo cabero tien sío la salida de tonu cola cimera de la OTAN, cuando toos s’enfotaben en salir del pasu col Cesar americanu, infláu d’argullu colos sos bombarderos Stealth, y el Secretariu xeneral arrastrándose epistolarmente nuna gueta implícita del apaciguamientu del masmanda. Toos sabiendo que’l gastu futuru va ser en función del apriete fronterizu de caún, esto ye, más cuantu más averáu tea Putin, pero toos pendientes de nun anoxar al Cesar. Menos él.

Trump ta volcáu, dende la so primer presidencia, con Marruecos, al que ta rearmando concienzudamente. Ehí ta la nuesa frontiera, y el rellatu que construye, aparentemente ensin tiesta, el nuesu presidente, nun mos va ayudar nel sur. Ye lo qu’hai.

Raúl Suevos

A 25 díes vencíos de xunu de 2025

Torna en castellán en repdiv.blogspot.com

Tán en Primera, pero siguen ensin tener playa

 

El nun ser apasionáu del fúbol, más alló de la conocencia superficial que permite participar en munches de les converses varoniles de los españoles, agora tamién de les fémines, dáme llibertá pa meteme nesti tipu de charcos cola tranquilidá de saber que, por muncho que chisque, nun voi llegar a manchame.

Y ye que nun puedo dexar de remembrar, nos mios tiempos d’escolinu nel Xovellanos xixonés, dómina d’autostop desinhibíu casi enfrente del aulariu pa averamos a aquel Uviéu más finu y universitariu, y tomar unos vinos na mítica Logos. Cómo fardaba aquello d’escapase hasta la capital. O eso creyíemos.

Dempués llegaba xunu coles rebaxes y el branu pasáu peles clases de recuperación na Academia Junior, na Carretera de la Costa, xunto a la Puerta la villa. Pero Uviéu siguía tirando, y aínda nun llegaren los tiempos universitarios y les escapaes nochirniegues a la discoteca Faust ¡Qué coses¡ y el casu ye que Xixón yera ensin neñún xéneru de duldes la capital económica rexonal, tantu que’l Sporting taba a puntu d’entamar, en Primera, la so dómina dorada, y dalgunos de coña retorcía nun tuvieron meyor ocurrencia, de nueche y con alevosía, que dar cambiazu a la señal de tráficu de salida d’Uviéu y poner, en llugar del cartel oficial, aquello de “Xixón, a 28 km, playa y equipu de primera división”. Yeren otros tiempos.

Ta güei Uviéu de fiesta. Y nun ye pa menos, dempués de la batalla épica d’anueche, conducíos por un capitán memorable, Cazorla, frutu de la cantera, y un entrenador que sufrió, como xugador, el descensu caberu. Y tamién con un propietario, Martínez, veracruzano mexicanu, al que secunda un Peláez de raigañu asturianu; a los qu’en Xixón, debemos güeyar con esperanza, esperando, redundo, que los del grupu Orlegi, alversarios deportivos de los Pachuca, se sientan obligaos a echar el restu y dar un emburrión a los del Sporting.

Pasiones aparte, l’asuntu del ascensu ye bonu pa la rexón, qu’amás de los Princesa d’Asturies va cuntar con un escaparate nuevu na so capital, dalgo, la mercadotecnia institucional que nunca hai que dexar de llau pues aporta intanxibles difíciles de valorar, pero que siempres acaben por dar dividendos, y nello incluyo’l marquesáu de López Otín y el llabor universitariu qu’hai detrás.  

En Xixón, dende la nuesa sablera, ca añu más de moda, vamos tener que mirar con envidia sana los domingos de fúbol, esperando que los nuesos mozos tean más atinaos, y que nun plazu curtiu tornen a haber derbis fubolísticos na rexón. Mentanto, ¡Norabona, Uviéu¡ y ¡Aupa, Sporting¡

¡Xoder¡ Qué políglota me quedó’l pieslle.

Raúl Suevos

A 22 díes vencíos de xunu de 2025

Torna en castellán en repdiv.blogspot.com

Cuando espertó, Ucrania tovía siguía ellí

 

Quiciabes me tengo pasao cola entradilla, a lo último, yo toi mui lloñe como escribidor de Monterroso, l’autor del que se considera el microrellatu de más sonadía de la historia. Anque’l mio dinosauriu, creo, tien más talla o valumbu qu’aquel PRI, Partíu revolucionariu institucional, al que se supón que facía referencia l’autor mexicanu.

El PRI, fo un inventu que xestionó, por dicilo de forma fina, el poder en México demientres setent’años, y anguaño, al traviés de MORENA, el partíu inventáu por López Obrador, nacíu y amamantáu naquel, sigue güei mamonexando la nación americana. Sicasí, el dinosauriu européu ye muncho más preocupante, a lo menos pa nós, europeos.

El conflictu sigue ehí, con muertos inocentes ca día, non namái nos frentes de batalla sinon tamién nes ciudaes y pueblos del país, pero, col aportar de Donald Trump otra vegada a la presidencia de los USA, too paez entrar nuna especie de Mar de los sargazos nel que la guerra mos llega como con sordina; como si yá nun fuera tan importante énte otros asuntos de mayor fustaxe. Los qu’interesen al cesar americanu.

A Europa, pente medies la OTAN, impónse-y un rearme porque agora l’interés ta n’Asia y debemos defendemos por nosotros mesmos, derogando con ello’l pactu implícitu que supunxo’l fin de la Segunda Guerra Mundial y los sos corolarios. Y y’entendible. Tamién s’aceutó‘l sofitu a mediu gas qu’implementó l’alministración Biden, al que siguió la masacre de Hamas y les posteriores aiciones israelíes en Gaza y Llíbanu, cola mochila del sofitu USA al exércitu xudíu.

Mentanto, nes llanures ucranianes, tien siguío la matanza, l’heroísmu de soldaos y civiles, y el desarrollu de téuniques y táctiques que tienen servío pa caltener a raya al segundu exércitu del mundiu, con un millón de baxes a estos altores, con aiciones de guerra convencional y operaciones especiales espectaculares, y, col exemplu constante pal restu d’Europa sobro lo que ye’l drechu de defensa.

Y agora llega’l conflictu con Irán, dalgo que los observadores daben como escontao, que va suponer recortes ulteriores na ayuda, agora previu pagu, que los yanquis de Trump otorguen al bandu ucranianu, y que, amás, puede llevar a dalgunos a adormilitiase tocantes lo d’Ucrania, el nuesu, de los europeos, real y autenticu problema, y que, una y otra vegada, vános llevar a despertar y descubrir que’l dinosauriu sigue na habitación, y tien el rostru malapenes inescrutable de Vladimir Putin, anque a Zelenski lu nascondan en Bruxeles. Ye lo qu’hai.

Raúl Suevos

A 21 díes vencíos de xunu de 2025

Torna en castellán en repdiv.blogspot.com

Bien por Barbón, y bien por Ayuso

 

Ente les disfuncionalidaes del nuesu sistema políticu atopamos al Senáu en primer llínea. Una institución, acordies el drechu comparáu, que cumple col oxetivu de dar una llectura segunda, dende la madurez teórica, a la llexislación producida na primer cámara, el Congresu; y tamién da representación rexonal, o estatal nel so casu, a les estremaes sensibilidaes xeográfiques de la nación. Esto ye, misiones que nun se dan nel casu de nueso, y que dexen al Senáu, según dalgunos, ensin razón de la so esistencia. Ye lo qu’hai.

L’alcuentru teatral de la selmana cabera en Pedralbes inscribíase na conocía como Conferencia de presidentes. Un foru inventáu pol presidente Zapatero, necesitáu del sofitu de fuercies nacionalistes –como pa la nuesa desgracia suel asocedé-y a tolos presidentes de gobiernu- y que dende la so creación nun tien producío neñún resultáu dignu de pasar a la historia, nin siquier a la pequeña.

Nesta oportunidá cabera, como nes anteriores, nun s’esperaba algamar dalu alcuerdu, como asina asocedió, pero, dientro del ambiente de xeneral cesión que carauteriza la gobernanza del doctor Sánchez, decidióse dar entrada al usu de les llingues cooficiales, que non oficiales como dalgunos pretenden facer creer. Y ye que namái l’español ye oficial en tol territoriu de la nación.

Aportaos ehí, la xuntanza de los presidentes venía precedía de nuberos bien negros metanes una situación política abondo tirante, na que ca selmana ye escenariu de dalguna noticia aínda más sorprendente y pavorosa que l’anterior, lo que facía abarruntar, una vegada más, una ausencia total de resultaos. Como asina fue.

Na parte vistosa, aquella que tien como fin unviar mensaxes a la parroquia de caun, los presidentes de Cataluña y País Vascu, obligaron a los sos compañeros a facer usu de los famosos pinganillos proveedores de traducción simultánea, a esceición de la señora Ayuso, que, como previamente avisara, ausentóse de la sala, y por parte del restu de representantes con llingua tradicional, que non propia, hebo una salutación inicial curtia nes sos llingues respeutives.

Ellí ye au’l  nuesu Barbón sacó pechu con unes pallabres na Llingua, escaeciendo los munchos años que los socialistes, tamién él, dexaron de llau la Llei d’Usu, a la que ningunexaron, y sobro la qu’agora, por necesidaes numbériques na Xunta, quieren saltar haza la cooficialidá. Bien sicasí esa pincelada pequeña.

Y bien la señora Ayuso que mos recuerda que la Constitución mos diz que los españoles tienen el deber y el drechu de conocer el español, y qu’usar pinganillos en tala reunión nun ye más qu’una interesada, pa dalgunos, patoxada.

Raúl Suevos

A 9 díes vencíos de xunu de 2025

Torna en castellán en repdiv.blogspot.com

El toru y la Xusticia

 

Ye Xixón ciudá au abonden los animales y los animalistes. Per baxo de la mio ventana pasen tolos años munchos de los segundos, acompañaos por dalgunos de los primeros, manifestándose escontra de la Lidia y tolo que l’arrodia. Supongo a munchos d’ellos inorantes de que, casu d’algamar los sos oxetivos, desapaecería’l toru bravu y les deheses, esos espacios ñaturales onde se cría a esi preciosu animal.  

A min, eso de manifestase, nun me va, quiciabes porque demientres la mio vida profesional túvelo prohibido por llei; magar ello, dalguna vegada rompí los preceptos pa facelo énte la barbarie terrorista d’ETA. Tampocu son xente dada a la manifestación los miembros de la xudicatura, que güei protagonizaben un fechu inusual, pues salíen a les doce en puntu, demientres diez minutos, a la puerta de los xulgaos pa espresar la so oposición, non a les salíes de tonu, por dicilo finamente, de dalgunos miembros del gobiernu lacayos del doctor Sánchez, sinon pola so oposición a la llei ñueva que va camudar pa siempres l’accesu a la carriera xudicial, faciéndola muncho más dócil al poder executivu, lo que xunío al estatutu ñuevu de la Fiscalía que promueve’l señor Bolaños, ministru de xusticia, qu’elimina la instrucción de los xueces y caltien la dependencia de la fiscalía del gobiernu, déxamos a toos, ensin esceición, más averaos a convertinos en súbditos d’una república bolivariana. Ye lo qu’hai. 

La situación, y la manifestación, paecíenme de tala importancia que dexé de llau’l mio ociu deportivu cotidianu y atravesé la ciudá, en compañía de la muyer, cola pretensión de dar sofitu mudu a los representantes de la Xusticia, y ellí, pal mio desconsuelu, pude comprobar que nun llegábemos al centenar los preocupaos, supongo yo, pola deriva que l’asuntu toma, con un final previstu nel que la xusticia yá nun va llevar tapaos los güeyos, pues va mirar de regüeyu a quién xulga, y va actuar en consecuencia; y tampoco va usar la balanza, pues yá nun va ser necesario caltener un equilibriu ente les partes. Y qué dicir de la espada, yá un pocu roma, y que, si a esta banda-ye lo permitimos, va acabar limándo-y los dientes caberos, cola disolución, o l’embridamientu, d’esa UCO tan nomada nestos tiempos d’aflicción.

Dalgunos glayaben “nun táis solos”, anque’l númeberu nun daba muncha esperanza, máxime si descontamos los miembros de la clas periodística ellí presentes; y a min díbame embargando un sentimientu de desolación al pensar que somos una nación de bóvidos que nun ve más alló de la pación que-y ponen delantre.  

Raúl Suevos

A 11 díes vencíos de xunu de 2025

Torna en castellán en abellugunelcamin.blogspot.com