Esta selmana, creo, vase a carauterizar polos estremaos y múltiples análisis de la operación, ésta sí qu’especial, que los ucranianos tiene llevao a cabu na Siberia fondera, y que suponxo la destrucción d’un terciu de la flota de bombarderos estratéxicos, que ye lo mesmo que dicir nucleares, del exércitu rusu. Con un costu económicu, seguramente inferior al del prestixu, de varios miles de millones de dólares pal presupuestu de Vladimir Putin. Ye lo qu’hai.
Si d’un llau cabe falar de la eficiencia de los servicios secretos ucranianos, responsables de la operación, del otru ye preciso resaltar la precariedá de tol aparatu rusu; en tolos órdenes, non namái’l militar. Y ye que los sistemas corruptos ye lo que tienen, básense na apariencia y, siempres, per baxo amuesen unes costures que malapenes resisten un tirón mínimu. Ye lo qu’entama a asoceder col imperiu putinescu. Veremos cuanto aguanta.
La guerra convencional, la que supuestamente se desarrolla n’Ucrania, namái lo fue, convencional, demientres los díes primeros. Dempués, les xentes de Zelensky, sofitáronse nos entoncenes pernomaos drones Barayktar, de factura turca y que dieran dellos meses enantes una victoria entartallante a los azeries sobro los armenios. Anguaño la realidá diznos que los más importantes fabricantes mundiales ponen a disposición de los ucranianos los sos prototipos pa ser chequeaos nel combate que caltienen énte los rusos. Quien nun ta ellí nun representa un res nesta área de la tecnoloxía militar. Los rusos, una vegada más, tienenlo comprobao en Siberia.
Ellí, nel Oriente llonxanu, tien habío otru perxudicáu, y esti tien sío’l prestixu de los norteamericanos, que descubrieron como una operación de talu calibre se llevara a cabu ensin dici-yos una pallabra primeramente, dalgo impensable nun va tanto. Y ye que, dende que nos díes primeros de la invasión Zelensky contestó a la ufierta de Biden aquello de “nun me pongas un avión, dame munición”, la confianza de los cosacos zaporogos anguaño nun tien fecho más qu’amenorgar, tocando fondu, o quiciabes non, cola alministración actual de Trump, toos ellos alluchándose nel acosu a Zelensky naquella encelada memoriable y anoxante nel Despachu oval de Washington.
Agora debemos tar preparaos pa les menacies nucleares d’un ca día más arrequexáu Putin, al que nun-y queda más esperanza qu’una salida inesperada del mazcayu Trump, tayando’l suministru d’intelixencia y armamentu a Ucrania; a lo qu’Europa debería responder como Fonteovexuna, toos a una, si nun quier ver cómo, ella tamién, pierde’l pocu créditu que-y queda. Atentos.
Raúl Suevos
A 2 díes de xunu de 2025
Torna en castellán en repdiv.blogspot.com
No comments:
Post a Comment