Ye quiciabes la de más sonadía de la historia de México, la del xeneral don Antonio López de Santa Ana, toyía por un cañonazu francés en 1838, demientres la curtia Guerra de los pasteles, primer intervención francesa nel país y exemplu de lo que lluéu los yanquis diben llevar al nivel superlativu cola so Diplomacia de les cañoneres, que demientres dellos años sofrieron los iberoamericanos.
El talu Santa Ana, demonizáu convenientemente na hollywoodiense “El Álamu”, fo peor qu’una plaga de saltapraos pal so país, anque los sos recambios posibles nun yeren muncho meyores, pero a la so pierna ficieron-y un funeral d’estáu en Veracruz, escenariu de los fechos, y lluéu, yá presidente, un mausoléu en México capital, pa más tarde, con ocasión d’un motín capitalinu, afaralu y quemar los restos.
Equí n’España somos más comedíos colos fastos perniles, anque non menos dadivosos, pues a Eduardo Madina, el resentíu caberu, en boca del orangután oficial del nuesu gobiernu, solmenaron-y un millón d’euros pola de so, arrebatada por una bomba llapa d’ETA, está sí, non como la del capitán Bonilla, no que constituyó la indemnización mayor pagada pol terrorismu de la banda. Anque nun quiero pensar que’l so estatus nel organigrama socialista, como’l del xeneral Santa Ana, tuviera daqué que ver.
Al xeneral García Frías, tiroteáu nel Cuartel de Loyola de San Sebastián demientres la so alocución nuna Xura de Bandiera, nin siquier lu incluyeron na llista de víctimes, muncho menos indemnizalu, tampocu lo aceptara. Años dempués, reparando con atención, podía vese, na pernera del so pantalón d’uniforme, el repasu que la muyer-y ficiera al furacu de la bala pa siguir tirando. Ye lo qu’hai.
De Madina, y la so pierna, ye posible que sigamos oyendo falar, pues dalgunos venlu como’l tapáu auténticu pal periodu postsanchista, dao que’a Page tanta llume podría llegar a xamuscalu. La so salida a los medios, tres l’apaición de la fontanera cabera, asina paez anuncialo, pues el doctor Sánchez tien eliminao, sacantes al manchegu, toa tiesta pensante nel so partíu, y l’aldéu de Santa Ana, con perfil perbaxu estos años caberos, torna referenciándose a Zapatero y Rubalcaba, quiciabes pensando que’l populacho votante y militante tien memoria curtia, y yá nun tienen alcordanza de qué ye lo que representen estos dos caudiellos del Rellatu, qu’equí consigno con mayúscules pues ellos foron virtuosos na so manipulación.
Va haber un dempués, d’eso nun hai dulda, y nun tengo yo nidiu que’l fénix socialista, llamináu na so estructura interna, tenga los recursos pa tornar a ser una ofierta creyíble pa la mayoría d’españoles. O sí.
Raúl Suevos
A 7 díes vencíos de xunu de 2025
Torna en castellán en repdiv.blogspot.com
No comments:
Post a Comment