Ataque a Irán, respiru pa Ucrania

 

Aínda fúmien los restos de les installaciones iraníes que tienen sío oxetivos del recien ataque aéreu de les fuercies armaes israelíes, y yá se pueden sacar unes cuantes conclusiones sobro los porqués, los cómo y los cuándo, y, en xeneral, llevenmos a afirmar que too, o casi too, entra dientro del guión xeneral de la fola de tensión desencadenada anguaño n’Oriente Mediu a partir del macru atentáu terrorista lleváu a cabu por Hamás el 7 d’ochobre de 2023.

Les tres entrugues xiren, anque pa dalgunos nun seya evidente, en redol al fechu de que nuna selmana llarga tenemos eleiciones nos Estaos Xuníos, au se va escoyer a un Cesar nuevu que va imponer la mayoría de los so criterios sobro tol mundiu, y, si sal cara, van quedar dos meses escarsos pa tratar de solucionar dalgunos problemes enantes de que Calígula y el so caballu entren nel Capitoliu; y si sal cruz, ye posible que ‘l señor Blinken cuente con más tiempu pa reconducir, de forma controlada, l’actual ciscu mundial.

Sicasí, l’ataque recien, acordies tolos nicios, cuntaba col vistu bonu, non namái de Washington, sinon tamién de Pekín, y, quien tenía de recibir la guantada, Irán, foi sollertáu con tiempu abondo, qu’ésta diba impactar na mexella drecha ¿o yera la esquierda? Lo mesmu da, tratábase d’evitar muertos, y, de xacíu, de nun tocar, acordies coles instrucciones yanquis, nin el nuclear –dica agora- nin el petróleu.

Tienen sío les defenses aérees les más perxudicaes, lo que diba dexar la puerta abierta pal casu de que nel futuru vienente se faiga necesario golpiar otra vegada, pero tamién gran parte de les instalaciones au Irán fabrica les estremaes games de misiles y drones colos que tien golpiao a Israel, y que vien suministrando dende va dellos años a Hezbolah y Hamás, lo que, ye un suponer, va incidir direutamente nel númberu d’ataques que recibe Israel.

Y ye equí onde llega’l beneficiu pal pueblu ucranianu, que convien nun escaecer que lleva dos años sofriendo los ataques indiscriminaos, o meyor sedría dicir seleccionaos, escontra los so hospitales, escueles y zones residenciales, ensin que por cierto, se faiga la cobertura mediática de los ataques israelíes en Gaza y el Llíbanu. Un beneficiu marcáu pol posible corte del fluxu loxísticu de drones y misiles iraníes de los tiempos caberos, que cola destrucción provocada por Netanyahu van ver amenorgada la so producción demientres dellos meses.

Ye un bon día pa Occidente. La exa del caos formaáu por Rusia, Corea del Norte, Irán y China debe ser la nuesa preocupación y medrana, anque dalgunos nun quieran güeyalo.

Raúl Suevos

27 díes vencíos d’ochobre de 2024

Torna en castellán en repdiv.blogspot.com

La potencia d'una imaxe

 

Nun va muncho que pasó a meyor vida Josep Piqué, una gran empresariu, y dicen que meyor persona quienes lu conocieron, que tamién se desempeño como ministru en delles ocasiones, con especial mención al so periodu como ministru d’Exteriores, lo que lu llevó nel branu del 2001 a recibir al presidente de los Estaos Xuníos a pie d’avión, el pernomáu Force One, nel aeropuertu de Barajas. Ellí, xunto a la escalerilla, otorgó-y enclinos de tiesta fonderos y repetíos al mandatariu yanqui, con quien el presidente de gobiernu d’entós caltenía relaciones estreches, ensin llegar a encamase.

Les imáxes lluéu se convirtieron en pastu de chistes y comentarios ácidos, creyo que la moda de los memes aínda nun s’estendiera, pal so alliviu, dalgo que, per otra parte, ye d’esperar viniendo de los alversarios políticos, siempre atentos a sacar punta a los detalles más pequeños. Ye lo qu’hai.

El llance, que foi base p’acusar a Piqué de servilismu, escureció demientres muncho tiempu la imaxe del home públicu, que la so trayeutoria foi manifiestamente brillosa, tiénse reproducíu na mio memoria cuando vi a Antonio Guterres, Secretariu Xeneral de Naciones Xuníes, ayeri en Kazán, una vieya ciudá rusa au s’axuntaben los miembros d’un grupu, los BRICS, que pretende facer frente políticu a Occidente, inclinase ostensiblemente al saludar a Vladimir Putin, l’home qu’ordenó invadir a la so vecina Ucrania ensin qu’esistiera provocación previa, y que poro s’atopa en busca y captura pola Corte Internacional de Xusticia, organismu dependiente de les NNXX. Difícil d’entender. 

N’Ucrania, como nun podía ser d’otra manera, la presencia en Kazán, más allá del cabezazu posterior, tien sentao mui mal, amestando un puntu mas de tracamundiu a la posición poco convincente que Guterres caltien tocantes al conflictu, tan pocu nidia como la so reacción dempués del ataque terrorista de Hamas, y ye pa pensar que, quiciabes, y magar el so llabor conducente y apreciáu demientres los años que dirixó l’ACNUR, el puestu de Secretario Xeneral vien-y grande en demasía.

Putin, xefe d’un estáu con drechu de vetu nel Conseyu de Seguridá, tien inflixío, cola invasión d’Ucrania, el mayor guelpe de los años caberos al prestixu, yá esgonciáu, de la mayor y principal organización de seguridá con que cuenta’l mundiu, y lo menos que puede y debe facer, quien ostenta la mayor representación de la mesma, ye caltener una distancia prudente col heriede de Stalin, un demoniu pol que l’interesáu tien manifestao la so almiración.  

El so xestu nun va servir pa amontar la seguridá de los hospitales y escueles ucranianos, baxo bombardéu constante de Putin.

Raúl Suevos

A 25 díes vencíos d’ochobre de 2024

Torna en castellán en repdiv.blogspot.com

El mundiu nes sos manes

 

Foi una película célebre, d’aventures, con Gregory Peck y Antony Quinn nos papeles principales, y con Raoul Walsh como direutor. Una historia d’amores y peripecies marines ente San Franciscu y la entoncenes rusa Alaska. Una película siempres entretenía y amena pa tornar a güeyar, pero estes llínees nun van d’ella, sinon d’un espaciu muncho más estrechu, el del tranvía de Zaragoza nel que me desplazaba dempués d’una comida con un bon puñáu d’amigos y compañeros.

Volvía dende’l barriu del Actur, y nel vagón, enllenu casi a rebosar, la mayoría del personal yera xente mozo, con pinta de venir del campus qu’ellí esiste, o bien dirixendose al tradicional del centru de la ciudá. Toos ellos más o menos pensativos y enfrascaos nos sos propios asuntos.

Una  vegada atopáu acomodu, mediu encastráu nun requexu, pude dedicame a reparar con detenimientu’l panorama, y ellí mesmu, xusto al mio llau, una moza llamóme l’atención, non pol so físicu, nin pol so estilismu, sinon pol so usu desatáu del teléfonu, el cualu manexaba namái con una mano mientes se suxetaba cola otra. La so velocidá y versatilidá nel usu del matapioyos, con xiros pa min inverosímiles, absorbía la mio atención como si nada más dignu d’atención hubiera naquel vagón. Aínda quedaba marxe pa sosprender.

Na primer parada, ensin necesidá d’asegurar la so estabilidá, pasó a dixitalizar con dambes manes, y eso, esa velocidá, yá me paeció inverosímil, increyíble, estupefaciente. ¿Taría yo asistiendo a un primer estadiu d’una evolución anatómica de la especie humana? ¿Sedría esta neña un simple espécimen estraordinariu dientro d’un orde natural? Cola viniente parada, y metanes el mio desasosiego énte lo que me paecía dalgo fuera de la natura de les coses, repantiguéme un pocoñín meyor na mio esquina, y pude dame cuenta de que al mio llau, otra moza tomara’l llugar, y tamién ella manexaba dambes manes y matapioyos con velocidá, a los mio güeyos, estraordinaria.

Dambes dos, que podríen perfeutamente ser dambos, amás de dominar l’equilibrio que’l tresporte públicu requier, taben absolutamente enfrascaes nel mundiu d’esa pantalla pequeñina que les abducía y les llevaba a posar con rapidez almirable y maestría les yemes de los sos pulgares sobro’l cristal, nada paecía interesa-yos más allá de lo que’l so pequeño y personal mundiu-yos esixía, y, al mesmu tiempu, yos entregaba.

Ye un mundiu, l’actual, de dimensiones multiples, de viaxes infinitos, virtuales y tamién reales, pero que, al mesmu tiempu, caltiénmos y encierramos nel nuesu pequeñu mundiu de rellaciones cibernéticas. El mundiu nes nueses manes, ye lo qu’hay.

Raúl Suevos

A 24 díes vencíos d’ochobre de 2024

Torna en castellán en repdiv.blogspot.com

Conciertu priváu de Serrat

 

Non tol mundiu pue presumir d’asistir a un conciertu priváu de Joan Manuel Serrat, y, nel mio casu, va tantu tiempu que yá casi lu tenía escaecío pues asocedió al entamu del añu 1996, en Medjugore, en Bosnia.

Como suel ocurrir nestos casos, too foi frutu d’una casualidá, el güei premiáu col Princesa d’Asturies viaxaba haza Saraxevo cola intención de dar un conciertu nel nome d’una organización non gubernamental española pero les condiciones meteorolóicas, que nos Balcanes n’hibiernu suelen ser mui radicales, decidieron que nun yera oportuno y soltaron un diluviu que, si non universal, si foi abondo bayurosu como pa enchir en dellos puntos el riu Neretva, y tayar la carretera que sube haza la capital bosníaca.

El casu ye que, faltos d’otra solución, vinieron a recoyese con nós, el personal de la Brigada de Montaña “Aragón”, que formábemos naquel entós la fuecia española esplegada naquella tierra, primer como cascos azules y yá entoncenes baxo la bandiera de la OTAN. En la nuesa base’l oficial de prensa yera tamién l’encargáu de les rellaciones públiques, y a él-y tocó “llidiar” con aquella papeleta demientres los tres díes nos que mos acompañó, amosándo-y cuálu yera’l nuesu cometíu y averándolu al problema xeneral de los Balcanes, pero, la nueche cabera, nun sé yo si pola so iniciativa o pola suxerencia d’aquel oficial, acudió a acompañanos na tasca de mala muerte qu’una muyer croata caltenía a les puertes de la base.

Dalgunos de los parroquianos tábemos sobro avisu, nun yera una certidume namái una posibilidá, pero en cuanto que lu vimos entrar garrando una guitarra comprendimos que díbamos a ser agasayaos con dalgo verdaderamente insólitu, un conciertu personal y privao de Joan Manuel Serrat. Y foi memorable.

Atendió toles peticiones, entamando por La Saeta que a todos emocionó, y también la petición de un joven teniente enamorado que le sugirió las “Paraules de amor”. Contentó a casi tol mundiu, a la so iniciativa regalómos un “Fulles mortes” que dixo compusiera demientres el so serviciu militar en Jaca, influenciao poles imáxes serondales de la ciudá.

La parte final del conciertu foi un pocu como homenax al orixe aragonés de la fuercia militar, pero tamién, según mos dixo, al de la so má, natural del pueblu zaragozanu de Belchite, escenariu d’una batalla tarrecible demientres la nuesa Guerra Incivil, y consistió nun repertoriu de les conocíes como Xotes de picadillu, o picantes, tamién se podría dicir, qu’a toos mos dexó estelaos.

Tres ello despidióse de nós. Al día viniente, cola carretera abierta, diríase a Saraxevo, y yo alégrome güei de l’alcordanza, y tamién del so premiu.

Raúl Suevos

A 23 díes vencíos d’ochobre de 2024

Torna en castellán en repdiv.blogspot.com

El cuayu de Barbón

 

Eso del cuayu requier esplicadura previa, y na quinta aceición de la Academia atopámoslu equiparáu a la “ tranquilidá, cachaza”, o lo que vendría a ser n’asturianu vieyu, “coyonazos”. Dicho lo anterior, debo consignar nestes llínees qu’a min lo que me vien a la memoria con esta pallabra ye al mi hermanu mayor, Pepín, diciendo-y a mio pá que si venía con casi toes sospendies ello yera porque los profesores teníen-y rabia. Eso yera cuayu, a lo menos pa min.

Alcuerdome que la viñeta viniente yera la de mio padre sacando’l cintu y el cuayu del mio hermanu disolvíase casi inmediatamente, lo cualo nun esclaria un gran qué, quiciabes namái que la calidá y fondura del cuayu va en proporción direuta cola personalidá del personax, lo que mos dexa, a lo menos pel momentu, a la espectativa de saber cuántos cintazos aguantaría cualquier afectáu énte la coyuntura de recibilos.

Vien esto a cuentu de la visita del ministru, reciente, Oscar López, que cruzó’l Negrón pa dicinos qu’Asturies va camín de ser un gran polu, emporiu, o lo que vustedes quieran, tecnolóxicu. Y ello nun va asoceder en Xixón, nin n’Avilés, sinon en Sotrondio, a tenor del llugar de les declaraciones, anque, si tomamos en consideración les declaraciones/promeses de los ministros en visita al Principáu, meyor garramos estes frases con una cierta prudencia y distancia.

Más fustaxe tuvieron les qu’atañíen a la presidenta de Madrid, la señora Ayuso, declarada pol presidente del gobiernu enemiga oficial, non yá del partíu que sofita al gobiernu, sinon de toa España. La corrupción ye ella, en pallabres del señor López, que nun fai más que facese ecu de les coneñes qu’un día sí y otru también-yos faen llegar los conseyeros de Moncloa, los spin-doctors de la comunicación sanchista.

Detrás del ministru, cuando soltaba los eslóganes anti-Ayuso atopábase’l nueso presidente rexonal, impertérritu, sosteniendo un paragues que l’encuadre nun permitía descifrar si namái lu cubría a él o tamién al señor López, pero que, con pulsu firme, caltenía una güeyada neutral, llonxana, como si tuviera pensando na berrea qu’estos díes tien llugar na reserva de Redes. Una mirada qu’a min recordábame la de Pepín, el mio hermanu, cuando pá lu pillaba non yá con suspensos, sinon coles notes falsificaes. Ehí yera cuando’l cuayu algamaba la so dimensión máxima.

Barbón recuérdame al mio hermanu, el tamién sabe que tarde o tempranu lu vamos a garrar, y como Pepín, va tener qu’apechugar cola realidá, que nel so casu nun creo que pase por buscase la vida na capital, como fo’l casu. Ye lo qu’hai.

Raúl Suevos

20 díes vencíos d’ochobre de 2024

Torna en castellán en repdiv.blogspot.com

ETA tienmos vencío

 

El día tebo cargáu de noticies, desagradables, como nun podía ser d’otra manera. La primer taba anunciada, sabíase que güei diba asoleyase nel BOE la llexislación que va suponer la salida anticipada de prisión d’unos cuantos asesinos d’ETA, y ello produzme aprovecedura, non poles víctimes que motivu tienen pa sentir, una vegada más, el desamparu nel qu’España les dexa, y digo España, puestu que tien sío nes Cortes, au se tien aprobao la midida, ellí onde reside la soberanía del pueblu español, suponiendo qu’eso esista, sinon pola desidia política que representa’l fechu en sí mesmu, y que da cuenta de la clas de sociedá que somos.

La segunda noticia salta en Bilbao, nel estadiu de San Mamés, au homenaxaron a un individuu que llevara a cabu la fazaña de subir al Everest, y dexar ellí, una ikurriña col anagrama d’ETA. Col aplausu total y unánime, al paecer, de tolos asistentes al estadiu, auu nun creo que hubiera muncha representación de los más de doscientos mil vascos “invitaos” a colar del País Vascu demientres los años de chombu. Dalgo que refrenda lo que va tiempu yá pensaba, que lo qu’ellí esiste ye una sociedá falta de los sentimientos, humanidad, más básicos, toa una Patria.

Pero nun tienen sío dala d’estes dos circunstancies les que me lleven a asumir la victoria d’ETA sinon lo que me tien referío demientres la mañana’l mio amigu Xulián, que me cuenta que’l so fiu pequeñu, estudiante de postgráu, un chaval pimpanudu, representante de la mocedá anguaño, confiesa-y nuna parolada que nun tien idea d’ETA, y eso que’l so pá vivió en primer persona aquellos años en Pamplona y Bilbao, llevando pistola encima y güeyando los baxos del coche toles mañanes.

Ye pa min, esta pequeña hestoria, la qu’amuesa con evidencia llaceriante qu’ETA tiénmos vencío, que les victimes namái pueden esperar siguir na desesperación que lleven sofriendo demientres munchos años, porque la sociedá española tien decidío pasar páxina, non namái nel País Vascu, esa tierra de gudaris, porque nada se cuenta nos planes d’estudiu, nin esiste, como la llexislación amuesa, interés per parte de quien mos gobierna, agora, tampocu anteriormente, por caltener vivu y presente ni siquier lae causes pendientes. Ye lo qu’hai.

Y somos toos nós, los españoles, quienes permitimos col nuesu pasotismu, col nuesu hedonismu de baratillu, que los nuesos representantes políticos usen el terrorismu y les victimes como una mercancía más cola que mercadear. Asina mos tien vencío ETA.

Raúl Suevos

A 19 díes vencíos d’ochobre de 2024

Torna en castellán en repdiv.blogspot.com

¿Asesinaos? meyor aniquilaos

 

Estos díes caberos tiénse falao abondo sobro los planes del nuesu presidente de gobiernu pa “controlar” les fake news, los bulos n’español corriente; si bien la mayoría de los que dende la prensa entraron a analizar l’asuntu paecen convencíos de que de lo que verdaderamente se trata ye de “controlar” a los medios, especialmente aquellos que nun son abondo “comprensivos” colos planes, propuestes, o divagaciones de quien mos preside, y el restu de miembros del gobiernu.

L’asuntu, el control, vien mal xustificao por una normativa llanzada na Xunión Europea pa dar publicidá a les entidaes o capitales qu’hai detrás de los medios, pero guetando fondamentalmente torgar que Rusia, que ye anguaño’l peligru principal pa toos nós, ensin escaecer a China, s’infiltre en medios asentaos o financie la creación d’otros nuevos, especialmente nel campu de los dixitales o electrónicos, au tienen amosao ampliamente que ye un área nel que se desenvuelven con suficiencia manifiesta.

Nesi campu, el de la desinformación, u operaciones sicolóxiques si vustedes lo prefieren, anque nel campu militar modernu fálase del dominiu cognitivu, siempres se tien trabayao, dende mui antiguu, pa tratar de confundir al enemigu, tamién anque nun haya  guerra declarada, tamién cuando namái se trata d’un enemigu potencial. Tamién, como ye posible qu’asoceda nel campu español, cuando la contienda ye política, y ye interna.

Poro llámame l’atención estos días, y confieso que me confunde, la insistencia de munchos medios nacionales en falar d’asesinaos cuando se trata de muertos en combate direuto o como victimes collaterales nel conflictu d’Oriente Mediu, y especialmente si estos muertos lo son por aiciones de les Fuercies de Defensa Israelíes; y ye que la carga semántica del calificativu implica toa una aición sicolóxica sobro la mente de quien lo oye.

Desconozo, de xacíu, si esto ye una instrucción de los xefes de redacción, o si siguen consignes, o suxerencies, de más altes instancies, pero tantu nel casu de Gaza, como nel de Llíbanu, y ensin escaecer a Irán, mos atopamos énte un conflictu nel qu’una parte ye un estáu democráticu y de drechu, colos so defeutos ya ineficiencies, como toos, entamando pol primer ministru Netanyahu, pero nel otru llau son organizaciones terroristes como Hezbollah o Hamás, o’l propiu estáu iraní y los so pasdaranes, de tráxica trayeutoria.

Los estaos democráticos nun asesinen a los sos enemigos, si acasu los aniquilen, neutralicen, o eliminen, anque en dellos casos, pasao’l tiempu, eses organizaciones pueden llegar a dictar les lleis del propio país, como nel nuesu casu. Ye lo qu’hai.

Raúl Suevos

A 3 díes vencíos de septiembre de 2024

Torna en castellán en repdiv.blogspot.com

L'apagón aportó a Cuba

 

La historia de Vietnam, más allá de les guerres, ocupaciones y revoluciones, ye un rellatu d’agricultores, de cultivadores d’arroz a lo llargo de los sieglos y los milenios. La propiedá de la tierra tien sío siempres la clave del desarrollu del país.

Tres les guerres y revoluciones del sieglu XX y la llegada del partíu comunista al poder en tol país, impunxose la colectivización del agru vietnamita, primer nel norte, y tres la salida de los yanquis tamién nel sur, col resultáu de los rendimientos decrecientes y l’afamiar pa una gran parte de la población. Pero la sabenciaa asiática prevaleció.

Pa la década de los ochenta y entamu de los noventa, primer semiclandestinamente y dempués de forma oficial, entregóse la tierra a los llabradores pa la so xestión familiar, tamién la posibilidá de comercializar direutamente les sos producciones, que nun se llendaben al arroz, sinon tamién anacardu, café y ñame, lo que diba llevar al país a convertise nun de los mayores productores mundiales, xenerando grandes entraes de divises que permitieron poner en marcha otros aspeutos de la economía del país, güei con un desendolcu puxante.

En Cuba la economía centralizada y la propiedá estatal sigue siendo relixón; les reformes anunciaes del 2010 quedáronse nun res, y el resultáu tien sío una cayida xeneralizada nes producciones agraries de la islla, a lo que se tien sumao l’emplegu de les escarses divises na construcción de complexos hoteleros per parte de GAESA, la empresa-tapadera del Exércitu cubanu, una decisión que cola cayida estrueldosa de los visitantes estranxeros, xunida al recorte de les remeses de los espatriaos, que prefieren pagar a los contrabandistes de persones pa sacar a los sos familiares de la islla, y el recorte de los únvios petroleros dende la Venezuela de Maduro, tienen compuesto una ecuación fatal que tien llevao a la islla al colapsu.

En Cuba táse pasando fame, tanta que’l gobiernu per primer vegada tien pidío ayuda a Naciones Xuníes pa l’alimentación infantil, lo que ye toda una declaración d’impotencia tratándose de los homes de Raúl Castro; tampocu se tien accesu a medicines. Casi namái queden vieyos y familiares de funcionarios del gobiernu, tol que puede cola de la islla, que va siguir metanes el Caribe esperando que se desvanezca esti réxime malignu pa que la otrora perla del Caribe torne a ser el verxel de les dos coseches, y los so arenales y villes coloniales se enllenen de turistes.

Güei hebo apagón xeneral en Cuba. Les centrales cáense a pedazos y nun hai abondo combustible p’alimentar a les qu’entá funcionen. Avérase l’epilogu.

Raúl Suevos

A 18 díes vencíos d’ochobre de 2024

Torna en castellán en repdiv.blogspot.com

La infiltrada

 

“Yes una profesional de la policía ¡Ye’l to trabayu¡” esta ye la esclamación que me tien llamao l’atención del anunciu que nuna de les caenes xeneralistes de la nuesa televisión promociona una película que trata sobro la vida y vicisitues d’una axente de la policía nacional infiltrada demientres dellos años nel sotomundiu radical de los terroristes/independentistes vascos, hasta dar la información clave pa provocar la detención de gran parte de los componentes del los asesinos conocíos como “comandu donosti”.

Al paecer de los publicistes esa frase llanzada pol superior de la policía infiltrada a la protagonista debiera remover la concencia de los televidentes en fondu y forma como pa animalos a dir a ver la película susodicha. Supongo que, en cierta forma, a min tamién, pero, no que me toca, tamién me tien tocao los pies.

Y ye que, nes coses del terrorismu, que ye de lo que va la pelí, d’una infiltrada nes redes d’ETA, pa min, Exércitu, Policía Nacional y Guardia Civil, nun taben desempeñando un trabayo. El so llabor diba muncho más allá, tan lloñe como pueden dir güei los patriotes ucranianos que defienden al so pueblu énte la invasión de les tropes unvíaes per Putin. Ye la mesma historia, ye la mesma llucha. Nun s’enquivoquen.

El guionista, seguramente cola meyor de les intenciones comerciales, tien pensao que la profesionalidá ye un enganche curiosu pa los espectadores posibles, pero non nel mio casu, non. Lo qu’ellí asocedía yera un combate indecente nel que los nuesos soldaos, policíes, guardies civiles, y les sos families, lluchaben na solitú más absoluta, ensin el sofitu del redol popular, gustante de los malos o acoyonáu por ellos, asistiendo a la llimpieza étnica de más de doscientos mil vascos, desplazaos a otres partes d’España. Non, nun yera un trabayu.

Yera “una relixón d’homes honraos”, nel sentíu que’l versu de Calderón de la Barca lo describe, y ye que namái dende la perspectiva d’una entrega total al serviciu de la Patria, dalgo difícil de comprender cada vegada más, y pa más individuos, se puede llegar a entender qu’una persona, no meyor de la so vida, decida esponelo too por un bien superior, como ye la seguridá de los conciudadanos, y ello por una paga escarsa, y, pa mayor escarniu, ensin que’l so desempeñu mereza la consideración de profesión de riesgu pa los gobiernos españoles, hasta agora.

Deseyo-y ésitu a la película, que nun foi seleccionada pal festival de San Sebastián. Voi dir a vela, pues crítica y quien yá la tien visto recomiendenmela, pero paezme a min que nun se trataba d’un trabayu cualquier, más bien d’un combate.

Raúl Suevos

A 18 díes vencíos d’ochobre de 2024

Torna en castellán en repdiv.blogspot.com

Democratura

 

Ye un pallabru, en neoloxismu finu, de fácil comprensión. Compónse en porcentaxes variables de democracia y dictadura, y ensin muncha investigación ye cenciello decatase que vien a espresar la transición nel poder executivu, al que s’aporta per medios democráticos pero, posterior y sistemáticamente, evoluciona apoderándose de los otros poderes, llexislativu, y sobremanera’l xudicial, pa imponer el criteriu propiu con calter cuasi dictatorial. Y nun señalo a naide.

El nominativu tiénme llegao de sópitu. Nun lu conocía, ya, investigando, la so paternidá ye debida a Adam Michnik, premiu Princesa d’Asturies va un par d’años, y más chocante, premiu Ortega y Gasset, otorgáu pol País, y señalo esto cabero porque, el que fuera faru periodísticu de la Transición, tiénse camudao anguaño en llacayu del poder, con tolo qu’ello supón pa un mediu de prensa.

Sicasí, a min gústame más el terminu Cesarismu Democráticu, desarrolláu pol venezuelanu Laureano Vallenilla allá pel llonxanu 1919, y que si güei resucitara, al ver al so país, tornara corriendo a la tumba. Pero, la democratura, de toes maneres, saltóme nun artículu que nun falaba de va un sieglu, tampocu de Venezuela, sinon d’España, y tampocu de la del caudillu Franco, tachada de dictablanda na so fase cabera. L’artículu trataba de describir la situación española anguaño, a la que güeyaba con nidies y evidentes disfuncionalidaes, y con una vergoñosa tendencia nel ejecutivu –a lo menos en comparanza colos nuesos pares europeos- haza’l cesarismu o la dictadura.

Y ye que, nel casu de nueso, dánse yá tolos indicadores tocantes al control y obediencia de los otros poderes, cola salvedá o carauterística particular de la imputación de los allegaos del presidente del gobiernu, dalgo que nin con Franco asocedía, au los escándalos solíen llegar de la mano de la tendencia al furtivismu cinexéticu del nietísimu. Y ye que lo de la señora del presidente, polo que se va sabiendo, contien similitues tremendes colo que facía la difunta señora de Ceascescu nel ámbito universitariu rumanu. ¡Señor¡

Agora entramos nun capítulu nuevu de la democratura. L’encargáu de perseguir los delitos, el fiscal xeneral del estáu, ye perseguíu pol Tribunal Supremu por eso, por delinquir, nesti casu por divulgar secretos, lo que va suponer, posiblemente, l’anulamientu del sumariu del “novísimu” -de noviu- por indefensión. Vamos ver.

Y nun pasa un res, el tipu, el fiscal, ehí sigue, enrrocáu, porque se sabe respaldáu pol líder, esi que llamen Uno, para disgustu mayúsculu del mio amigu Salva, que ve como la España de los so nietos pazese cada vegada más a aquella Rumania, o a esta Venezuela. Ye lo qu’hai.

Raúl Suevos

A 17 díes d’ochobre de 2024

Traducción en castellán en repdiv.blogspot.com

¿Qué foi de la UDEF?

 

Demientres un tiempu foi l’acrónimu más pernomáu d’España, Unidá de Delincuencia Económica y Fiscal; una unidá de la Policía Nacional dedicada a la llucha escontra la corrupción que punxo de moda aquel señor pequeñín y cabezudu que dende’l Palaciu de la Xeneralidá se dedicaba a asegurar el futuru económicu de los so atoños, de forma tan concenzuda como’l so enfotu por desarrollar el nacionalismu escluyente ya insolidariçu qu’anguaño impera en Cataluña.

Y ye que’l señor Pujol, coles mesmes molt honorable president, soltó aquello de “qué coño ye la UDEF? cuando lu informaron que taba siendo investigáu, él y tola so familia, por esa unidá policial. Muncho tien llovío dende entoncenes.

Adulces, los titulares pasaron a ser casi esclusivamente de la UCO, Unidá Central Operativa de la Guardia Civil, que nun ta tan especializada como aquella pero que, coles so estremaes secciones, toca tolos palos con igual o mayor fondura, profesionalización y rixu que la UDEF, y, amás, paez ser más de la preferencia de los distintos xueces que son, en definitiva, quienes los ponen a cargu de les diferentes investigaciones en calidá de policía xudicial.

¿Y esto por qué? Pues  pa un observador esterno, como quien esto escribe, la clave taría nel secretu de les actuaciones, muncho más hermétiques y zarraes al escrutinio de personal ayenu a les mesmes, preferentemente si esti pertenez a la clas política, como los casos del coronel Corbí, nel so momentu xefe de la UCO, o’l coronel López de los Cobos, xefe de la comandancia de Madrid, pueden refrendar.

Dambos xenerales futuribles y dambos cesaos direuta o vicariamente por Marlaska, coles sos carrieres cortaes abruptamente, magar toles victories xudiciales de dambos nel so ámbitu personal, pero que, xunto a la direición impuesta por Marlaska na UDEF, tienen llevao a la xudicatura a preferir nidiamente que seya la Benemérita quién desendolque les pesquises más complicaes y peligroses, les de la corrupción política. Ye lo qu’hai.

Tamos estos díes, otra vegada, énte una cascada d’informaciones a partir de los atestaos de la UCO, siempres secretos hasta qu’aporten a los xulgaos, y too paez indicar que’l gobiernu se ve acosáu políticamente pola so debilidá nes Cortes, y xurídicamente poles diverses causes abiertes na vía principal d’Ábalos, y nel redol familiar del presidente del gobiernu, y nada se diz de la UDEF, que sigue esistiendo, anque “domesticada” pol gobiernu, y a min apéname que los so miembros, tean sufriendo les consecuencias de la dondura de los so cuadros de mandu güeyando como, una vegada más, ye la Guardia Civil la deseyada polos xueces.

Raúl Suevos

A 11 díes d’ochobre de 2024

Torna en castellán en repdiv.blogspot.com

El mensaxe de la Castellana

 

Regaba güei media España una umbada atlántica entrada pel suroeste, pa gayola de l’agricultura nacional y llantu d’otra parte d’ella. En Zaragoza y Madrid, día grande institucional pasáu per augua, y ye que la gran Ufrienda de flores a la Virxen del Pilar que protagonizen los aragoneses tiénse visto empapada a lo llargo de tola mañana con auténtica abondanza, si bien tien sío nel Paséu madrilanu de la Castellana au se tien visto y vivío’l diluviu masivu demientres el desfile de les Fuercies Armaes, Guardia Civil y servicios de proteición civil.

Ye un día qu’últimamente vien marcáu con elementos numbéricos, d’un llau los decibelios que’l paisanaxe otorga al presidente del gobiernu, crecientes, y del otru los metros a los que la organización pon al públicu en xeneral, tamién amontando. Peo esti añu va pasar al recuerdu pola cantidá de litros cayíos xusto nel momentu que desfilaben les tropes a pie. Una auténtica cortina d’augua que por un momentu paecía capaz de sospender el actu, si bien, y con aciertu del mandu, l’asuntu tien tirao p’alantre, con unos uniformes cargaos con los litros d’augua que los empapaben d’arriba abaxo, y el chaplotéu de zapatos y botes nes balses de la magna avenida. Hasta los lexonarios se tienen visto obligaos a amansar el so pasu, faltos de los tambores colos parches ablandaos pel augua, y los vistosos plumeros de los Ros, qu’otros años llucíen formosos col pasu del personal, güei desapaecíen precavidamente baxo les fundes d’augua de los cubrecabeces. Namái los tricornios charolaos rellucíen como siempres. Ye lo qu’hai.

A min tiénme gustao ver, dende la comodidá del salón, la escena, pues nella paecióme acolumbrar un mensaxe non premeditao per parte de les nueses Fuercies Armaes, el de “esi Exércitu que ves, vagu al xelu y al calor” que cantara don Pedro Calderón de la Barca, esi qu’anguaño se pretende herieder d’aquellos Tercios, dende la humildá de la su condición anguaño, pero que siempres ta dispuestu a dir a onde’l gobiernu de la nación considere, y si yá entoncenes “nun adornaba’l vestíu al pechu”, tampocu lu quieren facer anguaño los so homes y muyeres, baxo la güeyada atenta d’un rei, que representa’l presente d’España, a quién secundaba una Princesa d’Asturies qu’anuncia’l futuru col so uniforme de guardiamarina.

Lloñe esa imaxe de la del besamanos posterior en Palaciu Real, na que podemos ver a una España d’oropel que nun sé yo si mos representa tan bien como los uniformes empapaos de los nuesos militares.

Raúl Suevos

A 12 díes vencíos d’ochobre de 2024

Torna en castellán en repdiv.blogspot.com

Franco y chapote. Coincidencies

 

Paez difícil, casi imposible, atopar semellanzes ente estos dos individuos, especialmente porque la so coincidencia cronolóxica foi escarsa, ún entamando la so “carriera” y l’otru nos años caberos de la propia. El casu ye que, como estos díes se fala, y se discute, en redol a dambos nes Cortes españoles, ello tiénme llevao a entrugame enónde o en qué podríen tener coincidío, atopando dos momentos claves na vida de dambos. Circunstancies importantes, puesto que nel so casu, y nel de la mayoría de persones, son díes nos que se define la trescendencia o la trayeutoria d’un individuu; son los veintinueve años d’estos dos personaxes.

Chapote, n’español, puestu que nu domino’l vascuence, foi, a los so veintinueve años un de los participantes nel asesinatu de Gregorio Ordoñez, pa siguir algamando méritos con el de Fernando Múgica, y algamar l’ésitu mayor cola liquidación d’un mocín Miguel Ángel Blanco, dalgo de daría pie a una reacción de la ciudadanía que marcaría l’aniciu del fin d’ETA, actos que lu convierten nun gran gudari –de mierda, acordies coles pallabres de Corcuera, vieyu ministru socialista d’interior- lo que lu lleva al cumal de la organización y que, a buen seguro, va reporta-y grandes acoyíes nesa tierra enllena de valientes cuando recobre la llibertá. Veintinueve años, un finxu importante na vida de les persones.

Esa yera la edá que tenía Francisco Franco cuando al frente de la Bandiera del so mandu aporta como primer fuercia a socorrer la ciudá de Melilla, cercada polos rifeños tres el desastre d’Annual, consiguiendo, coles so aiciones, el reconocimientu eternu de los so habitantes ¿eternu? Bono, el casu ye qu’ehí s’acababen les coincidencies, a lo menos no que a les sos biografíes se refier.

Pero la vida política de les naciones da munches vueltes y l’azar, o’l calendariu de les Cortes, quiso que güei se falara de dambos en Madrid, nel Congresu de diputaos, au les víctimes del terrorismu pudieron oyer la faragaña que la indecencia socialista y la fatura de la oposición tienen provocao tres l’aprobadura d’una llei que va dexar na cai a Chapote y munchos de los so correlixonarios, muncho enantes de lo previsto. Pero tamién de Franco se tien falao, pues tiénense dao los primeros pasos pa poner fuera de la lle a la fundación que lleva’l so nome, y ye que, los sucesos históricos tocantes a esti señor, al paecer, preocupen a los políticos de nueso muncho más que Chapote o los asesinatos aínda ensin esclarar de la so banda. Ye lo qu’hai.

Raúl Suevos

A 9 díes d’ochobre de 2024

Torna en castellán en repfiv.blogspot.com

El mundiu de Sofía

 

Los títulos, a vegaes, lleven a engañu. Nesti casu daquien pue creyer que toi pensando nel mundiu nel que la Infanta se desendolca nel so colexu nel extranxeru, o’l más arrequexaú y conspicuu de la so egrexa güela, que tampocu, porque nesta oportunidá’l referente ye un pernomáu llibru d’autor noruegu, Jostein Gaarder, que monta una trama novelesca lixera pa, pente medies d’ella, averar la filosofía occidental a los adolescentes del so país.

L’oxetivu fracasó, pues nun foron los adolescentes los so lectores sinon los adultos de más de sesenta países quienes abrazaron la estoria, na qu’un comandante de los cascos azules noruegos esplegaos nel Llíbanu  cumplía un papel de conector de rellatos al traviés de les so cartes. Y ye ehí, nel país de los cedros, u tornamos a tar, anque esta ocasión nun son los noruegos sinon los españoles los protagonistes.

Y ye que, tres abandonar la coalición de la Segunda Guerra d’Iraq ensin avisu previu, y a toa la velocidá que la nuesa loxística foi a facer, ensin que naide los felicitara, por ciertu, el nuesu prestíu ente los aliaos cayó a niveles nunca enantes conocíos, lo que llevaría al presidente qu’entoncenes mos gobernaba, creador del Pensamientu Bambi según Gustavo Bueno, a guetar una compensación cola creación de la nunca abondo comprendía Alianza de civilizaciones, y, pa lo que mos ocupa, l’únvio d’una Agrupación española a sostituyir a los noruegos en Llíbanu, que yá taben hasta’l moñu de perder el tiempu, y recursos, naquella tierra.

Y ellí siguimos, metanes l’aruelu, perfeutamente inoperantes magar lo que diga la ministra, con un Hezbollah al que se-y permitió caltener les armes tres los alcuerdos de paz interna caberos nel país, y namái hasta que se formara de nuevo l’exércitu llibanes, pero que lloñe d’ello tiénse convertío na mayor organización terrorista esistente anguaño, mayor que Hamás, tan mortífera como l’Estáu Islámicu.

De retirada de los cascos azules tien escomencipiao a falar Georgia Meloni, qu’ellí tien más inclusive que nós, y que tampocu ve’l sentíu de caltenelos, si bien el nuesu gobiernu, al que se-y llena la boca de paz nestes ocasiones, prefier que los nuesos sigan ellí, acovecíos nos búnkeres, porque, como siempres, piensen qu’eso dámos prestixu, si bien, como los fechos y los años tienen dío amosando, de nada sirve la nuesa presencia, ONU, más allá de servir de blancu d’atentaos esporádicos o cañonazos de les partes, que se lleven per delantre la vida de los nuesos, pa nada. Ye lo qu’hai.

Raúl Suevos

A 2 díes vencíos d’ochobre de 2024

Torna en castellán en repdiv.blogspot.com

Entretiempu infernal milanés

 

Llévame la familia davezu a Milán, y si bien ella ye lo primer, siempres queda la oportunidá de visitar dalgún de los so requexos, inclusive’l mesmu centru, como nesta ocasión cabera, na que’l pronósticu meteorolóxicu nun agoraba nin sol nin temperatura, lo que mos llevó a adoptar una indumentaria más bien serondiega pa dar un paséu pela siempres vistosa redolada del Duomu.

El casu ye que la mañana, branillu de San Miguel, amosóse rescamplante, y yá baxando pel corsu Buenos Aires notábemos en forma de calor escesivu’l nuesu erru neso qu’agora los modernos llamen “out-fit”. Superada la Porta Venezia entramos na zona más glamurosa de la ciudá, más que la Vía Napoleone, see de marques pernomaes, yá que nesta parte final del Buenos Aires, amás de tiendes, atópase la see de delles firmes perimportantes, lo que fae que la densidá de xente guapa que pellí pulula seya superior a la de cualquier sitiu. Belleza física, estilu y elegancia son la tónica. Ye lo qu’hai.

Una imaxe distante de la que tamién esporta la capital de la Llombardía dende la otra parte de la ciudá, San Siro, cola so curva sur ocupada polos impresentables tiffosi rossoneri, inspiradores de los nuesos madrilanos roxiblancos, y que cola so estética madmax de tercera, encanten a los rapper italianos encabezaos por Fedez, l’exmaríu de l’anguaño desapaecida Chiara Ferragni. Un mundiu de referentes.

Más alantre, en vía Dante, la que conduz a la parte posterior del Duomo, afayamos una tienda de cosméticos y perfumes bien famosa na que, pala nuesa sorpresa, malapenes hai personal y toa transacción tien de facese electrónicamente, dalgo que ensin dulda abarata los costes de la firma pero que me da muncho que pensar, anque xusto enfrente descubro a la nuesa Zara nacional na qu’una riada de personal da cuenta del ésitu continuao de la firma. Velos y pensar nes donaciones hospitalaries d’Amancio devuelveme l’humor tres lo anterior.

Nes Galeríes de Vittorio Emanuele dámonos la vuelta énte’l xentíu que, amás, fai’l calor más apolmonante. El Duomo como s’espera, atestáu, y, per otra parte, unos cubos coloraos descomanaos son imán pa coles enormes de neñes que s’alleguen al reclamu d’un llanzamientu de belleza au-yos van facer, gratuitamente, dellos tratamientos.

Tres saludar, xinete nel so caballu, al héroe de dambos mundios, Garibaldi, encaminamonos al Nero dieci, la coqueta y eficiente trattoría, na vía dei Neri, onde un risotto con ossobuco a la milanesa mos recupera pa tornar a casa con alegría nel cuerpu.

Raúl Suevos

A 2 díes vencíos d’ochobre de 2024

Torna en castellán en repdiv.blogspot.com