Tercermundismu en Cataluña

TERCERMUNDISMU EN CATALUÑA

Cuando van pasando los díes, siempres suel asoceder asina, los fechos son analizaos con más calma y, amás, noticies que nun momentu pasaron desapercibies van aportando y con ello ún pue facese una composición más completa de determinaos sucesos que, en caliente, namái s’apreciaben en blancu y negru, ensin matices.

De la kale borroka catalana, primeramente, les conclusiones de mio algamaben pa valorar el comportamientu exemplar de los llimitaos efectivos policiales esplegaos en Barcelona. La valoración política de tol asuntu va tiempu que ta fecha y pasa pola conderga de tolos gobiernos españoles dende l’aniciu la democracia, ensin esceición, por desdexación nidia de funciones en rellación col problema independentista, tantu en Cataluña como nel País Vascu, funciones rellatives a la educación fundamentalmente.

Les imaxes d’asaltos de comercios nel centru de Barcelona cutieronme enforma pero, como munchos, cayí na trampa promovida por parte la prensa en rellación coles credenciales personales de dellos de los autores. Yeren foriatos, emigrantes, inclusive MENA,s , yeren de too menos mozos catalanes de bona familia catalana, esos nun faen eses coses. Y ehí mos quedamos.

Ayeri tuve noticia -cuasi desapercibida nes grandes cabeceres sacantes La Vanguardia- del saquéu d’un tren na provincia de Lérida, metanes una zona rural abondo habitada, na Cataluña fonda; esa que vota independentismu, la mesma qu’en cuantu son llamaos únvia los sos tractores a cortar carreteres o bloquiar Lérida, o Barcelona si ye preciso.  

El tren descarriló va yá más d’una selmana, tres les intenses tambascaes cayies na rexón, y ellí quedó esperando qu’ADIF tomare l’asuntu nes sos manes. La noticia foi asuntu de curiosos al entamu pa depués camudar n’oxetivu de saquiadores que, armaos con tractores –p’amontar la capacidá de carga- y radiales pa forciar los contenedores, dedicáronse con percuru mientres dellos díes a desvalixar la variada mercadería de tol tren, hasta les ruedes los vagones dicen que se llevaron anque esto, debo reconocelo, paezme esaxerao. Y equí vien lo más  llamativu la situación, too ello, según manifiesta la prensa, baxo’l güeyar atentu los mozos d’escuadra quienes, interpelaos polos plumilles, manifiesten que nun habiendo denuncia ellos nun tienen capacidá pa intervenir ¿Ú finaría’l delitu flagrante?

Eso de pillar la carga siempres lo asociara yo a les costes del norte au, de cuando en cuando, llegen 

restos de naufraxos y tala rampiña amparase na Llei del mar, creo, pero, en tierra firme, el saquéu siempres lu vi como un asuntu de pueblos tercermundistes nos que la probetería económica, en combinación con gobiernos tiránicos, lleven a los sos ciudadanos a comportamientos indignos. Nunca nun maxiné que n’España podríemos llegar a talos niveles, y en collaboración coles Fuercies d’orden públicu ¿Acasu tampocu se podía identificar a los malfechores?

L’asuntu va acabar nes manes de tribunales y aseguradores pero, al paecer y acordies colo que me cuenten, una de les empreses perxudicaes, esportadora ella, yá decidió que camuda’l puertu de 
Barcelona pol de Valencia pa les sos cargues loxístiques. A lo cabero, el tercer mundu, siempres ye un
 llugar probe y llóbregu.

Raúl Suevos

A ún de payares de 2019

Torna en castellán en repdiv.blogspot.com