Tren de borrasques atlánticu sobro España

TREN DE BORRASQUES ATLÁNTICU SOBRO ESPAÑA

La llegada de la seronda na tierra de nueso suel venir marcada pola entrada d’un tren de borrasques dende l’Atlánticu; tres díes d’augua siguíos de dos de descanso y asina hasta que nel llonxanu norte s’escosa la masa d’aire frio o’l anticiclón atlánticu garra fuercia abondo como pa unvíales más al norte, haza les costes de Francia. Si se retrasa muncho pue afeutar la llantadera en Castilla y eso, sieglos atrás, significaba la ruina de tol país.

Nel mundu de la política pasamos por daqué paecío; un tren d’eleiciones infinitu que nun  da dalu frutu y nun dexa poner a trabayar a plenu rendimientu les fuercies del país. Un suma y sigue que namái apurre incertidume a los factores productivos, retrasando o descartando por completo decisiones y proyeutos. Y mentanto, fuera, el mundu sigue llaráu de tensiones xeopolítiques y comerciales, o a la inversa, y España, con gobiernos en funciones o minoritarios, nun ta en condiciones de facer valer el so pesu como potencia media.

Los resultaos de güei otra vegada mos dexen nuna situación de bloquéu que solo un gobiernu de coalición ente los dos grandes partíos pue solucionar pero los antecedentes de la historia recien y la personalidá narcisista de los líderes facen que los presaxos seyan abondo negativos. Sicasí hai dellos detalles adicionales que se puen estrayer y tampoco agoren nada bono.

L`elementu de mayor importancia ye’l crecimientu los estremos. Podemos resistió muy bien magar l’apaición de Más País que namái algama dos míseros escaños, ensin llograr grupu parlamentariu y col duldosu llogru de restar un ciertu númberu d'escaños a PSOE y UP  nel xuegu de los restos. El crecimientu de VOX nun fai más que confirmar que los populismos, d’esquierda y drecha, son a llegar al ánimu del votante de forma más conducente que los partios tradicionales y ello faise más patente y dramáticu cuando s’aprecia’l descomanáu descensu sufríu por Ciudadanos, antiguu centru socialdemócrata y agora lliberal.

Esti aspeutu caberu ye quiciabes el más esmolecedor pues l’elementu de moderación o equilibriu qu’enantes representaba C,s desapaez pa ser sustituyíu poles tensiones a esquierda y drecha, o lo que ye lo mesmo, va amontar considerablemente la polarización política, y esto nunca ye pa bien.

Al doctor Sánchez podría pasase-y pola cabeza la formación d’un gobiernu colos nacionalistes, que siguen ehí, potentes y aportunantes, pero yá pudo comprobar, cuando va bien pocu nun pudo aprobar 

los presupuestos, qu’esa asociación ye inestable por naturaleza y, amás, nesta oportunidá ye duldosu que la propia estructura interna del PSOE pudiere soportar tala apuesta magar la reforma d’estatutos implementada por él. El PNV trabaya nun estatutu nuevu nidiamente anticonstitucional polo que hasta’l momentu se supo y el “drechu a decidir” paez un preciu demasiáu altu a pagar a ERC.

To esto llevamos a un nuevu bloquéu coles tensiones amestaes polos estremos. ¿Podríemos venos abocaos a unes eleiciones nueves? Too ye posible nesta España anguaño pero d’esa polarización y de les pacífiques manifestaciones de Barcelona, asina como de les esperimentaciones de los simpáticos CDR,s detenios pola Guardia Civil, cabe sospechar qu’un nuevu Terra Lliure pueda tar yá n’embrión y nel País Vascu tampocu sedría pa refalgar la reapaición de la violencia cuando otra vegada se pieslle la vía estatutaria anticonstitucional.

España tien demostrao a lo llargo la historia la so resiliencia, tamién en tiempos recien, y nun tengo dulda de que la Guardia Civil va tar pronta colos sos servicios d’información pa dar respuesta inmediata, quiciabes tamién cola ayuda del CNI, quién sabe.    

Raúl Suevos

Adivín

A 9 de payares de 2019

Torna en castellán en repdiv.blogspot.com