Lleí qu’a los reis-yos obligaren a retratase col Che en La Habana; supongo que quien lo escribe desconoz que’l homenax oficial a José Martí nel so memorial habaneru ta diseñáu de tala forma que ye imposible sustrayese a esa fotografía con Frank País, Camilo Cienfuegos y el Carniceru la Cabaña. Un memorial y una plaza que construyó’l réxime de Fulgencio Batista –quien por cierto contó col sofitu del Partíu comunista cubanu pal so primer gobiernu- y que depués sedría adornada por Fidel Castro con esos rostros revolucionarios.
La visita xustificóse per parte del gobiernu como reparación d’una anomalía institucional –nunca enantes el xefe del estáu español visitara la islla de forma oficial- y aprovecháronse los 500 años de la fundación de La Habana pa facelo anque Baracoa, nel oriente cubanu, yá celebró los de so como primer ciudá del Nuevu Mundu y esa tamién yera una bona oportunidá. Too sirve pa xustificar lo inxustificable.
Pa min ye inxustificable porque vien a sofitar cola so presencia un réxime dictatorial –nun merez otru calificativu- que caltien la so ciudadanía nun estáu de semiesclavitú dende va 60 años cola escusa d’un bloquéu estadounidense, d’esencia criminal y que España enxamás lu tien sofitáu, col qu’amazcara una ineficiencia económica estructural hermana a la de tolos rexímenes comunistes que tienen esistío, reforciada cola llocura de un líder absolutu.
Ayeri los reyes visitaron La Habana Vieya; aportase a ella normalmente dende el Parque central, dende va 200 años coral urbanu de la ciudá, baxando ente’l Muséu de belles artes –enantes Centru asturianu de La Habana- refechu coles perres que-yos dio Tinín Areces- y la Manzana de Gómez, agora hotel Kempisky, una propiedá que pertenecía a la condesa de Revilla Camargo y que como’l restu de lo que tenía espropiaron-ylo, ensin compensación claro, pola Revolución.
Ellí los güeyos van haza’l Floridita, panal pa enxames de turistes, y déxase de llau la estatua del xeneral Albear, un militar español nacíu en Cuba, que foi responsable de renovar la red d’augues de La Habana, augua de boca y augues fecales. Esta red ye la mesma que sigue funcionando en La Habana Vieya, supongo que poro lu caltienen ellí enriba, impasible nel so pedestal.
A SSMM paseáronlos poles guapes cais que nos 30 años caberos foi recuperando Eusebio Leal Spengler, Historiador de La Habana –daqué asina como ministru de recuperación urbanística de la ciudá antigua-, cola ayuda esterior, muncha d’España, nun proyeutu qu’aúna esa recuperación física y
los habitantes del barriu, torgando qu’aquello se convierta nun parque temáticu, vacíu y muertu cuando marchen los turistes.
La recuperación va per cais; escoyíes con procuru. Ye per au llevaron los reyes, a bona distancia los “salideros” –emanaciones d’augues fecales, que cutien la vista y l’olfatu- y de los edificios derrumbaos –con cada periodu de lluvia desmorónense varios dellos, xeneralmente con varies víctimes- y los qu’entá resisten n’estáu ruinosu. Esa parte nun s’amuesa y los turistes nun suelen visitala.
Agora a Leal, un descomanáu orador de los que yá nun esisten nel mundu hispanu, quitáron-y‘l mandu y Raúl Castro dio-ylo a GAESA, el conglomeráu d’empreses de les FAS lideráu pol so xenru, el xeneral López-Calleja, que tamién suena pa primer ministru, y que mui probablemente va retomar la obra de Leal pa convertila nesi parque temáticu muncho más rentable no económicu.
De La Habana la pareya real viaxa a Santiago de Cuba para rendir tributu al Almirante Cervera, esi facha al que l’alcaldesa de Barcelona quitó-y la so cai pa da-yla a un gran actor que la so nomadía cabera consistió en cagase na puta España. Espero que tamién tengan tiempu pa rendí-ylo al ibicencu xeneral Vara de Rey, cayíu n’El Caney énte los yanquis nuna resistencia comparatible a la de
Leónidas nes Termopiles, y al que dellos na so tierra natal quieren baxar del pedestal erixíu por suscripción popular nel centru la so ciudá, dicen que por que lu derrotaron. Ay España, como me dueles.
Supongo qu’a estes altures SM el rei yá sabrá que’l doctor Sánchez, esta vegada sí, yá algamó un alcuerdu pa un gobiernu progresiiiiiiiista. Que seya pa bien.
Raúl Suevos
A 13 de payares de 2019
Torna en castellán en repdiv.blogspot.com
No comments:
Post a Comment