Muerte na estremadura europea

 

La pallabra estremadura vien de tiempos medievales. Yera la tierra qu’había más allá, la que taba fuera del control los castellanos, pero que tampocu rexíen los agarenos ;enantes, en tiempos del reinu d’Asturies yera’l desiertu del Dueru, dende la ciudá de Lleón al gran riu, baleráu por Alfonsu y Fruela como colchón defensivu y repobláu tiempu depués por Ordoñu cuando Asturies se fizo más fuerte.

Agora España yá nun tien estremadura, ye Europa quien la tien y, como entoncenes, nesa zona de fronteres intanxibles tamién se combate. Nun hai aceifes nin algaraes como en tiempos del Cid, pero sigue siendo un tarrén mui peligrosu. En Somalia, en Llibia, na República Centroafricana, en Níxer o en Mali, en toos estos países la Xunión Europea espliega les sos misiones, civiles, militares o mistes. Una mestura, según los casos, de construcción de país, fortalecimientu del estáu, formación o sofitu militar; en toes elles hai un peligru nidiu y el gotéu de baxes ye constante.

Amás deses operaciones, Francia, en cuantu antigua potencia colonial y entá con importantes intereses económicos nel área, caltien la operación Barkhane qu’algama tola inmensa zona conocida como Sahel, zona inclemente, semidesértica, na qu’operen estremaos grupos terroristes, como Ansar al din o Al Morabitun ente otros, toos ellos de raigañu salafista y franquiciaos d’Al Qaeda o del Estáu Islámicu. Francia nun ta sola, diversos países, ente ellos España, cooperen na operación porque’l peligru afeuta a toa Europa. Si se pierde’l control los fluxos de drogues, emigración ilegal y terror van tener vía llibre.  

Son tiempos cruciales pa la Defensa Europea, metanes un tirante xuegu de les grandes potencies, y con catalizadores como’l Brexit de un llau, o Donald Trump d’otru; tiempos de grandes decisiones pa Europa. Ayeri, mientres una operación de combate, dos helicópteros franceses en vuelu tácticu topetaron col resultáu de trece soldaos franceses, trece soldaos europeos, muertos. Ye’l tributu a pagar pola seguridá de los ciudadanos europeos, un tributu que va haber que siguir pagando tamién nel futuru.

Francia va despidilos nos próximos díes cola pompa y solemnidá que correspuende al casu, seguramente nel marcu incomparable del patiu d’armes del Hospital de Los Inválidos de París, col presidente Macron como maestru de ceremonia y el restu de grandes autoridaes del estáu acompañándolu. Ye lo que cumple en Francia, país con un gran sentíu del valir de les instituciones y lo que representen los sos actos públicos pero yo tamién quiero espresa-yos dende equí y cola mio pluma humildosa el mio agradecimientu y almiración pola so entrega hasta les consecuencies caberes, y el mio conduelu a los sos allegaos.

Que descansen en paz los soldados europeos de Francia.  

Raúl Suevos

A 26 de payares de 2019

Torna en castellán en repdiv.blogspot.com