La continuidá de la Corona

Fo’l d’ayeri un día abondu completu no político, llenu d’imaxes, prometedores en dellos casos y confirmaciones pesimistes notros. Nel casu de la maxistratura cabezalera de la nación la xornada nun pudo ser más positiva puesto que significaba la confirmación de qu’entramos na fase de preparación del relevu, momentu crucial en toles instituciones y particularmente nuna que conlleva sobre sí’l pesu de la historia, l’escrutiniu del día a día y la esperanza d’un futuru pa una gran parte de la ciudadanía.

Yera esti un añu perimportante na vida de la princesa Leonor, como nel so día lo foi pal pá. L’entamu oficial de la so vida pública cola entrega de los premios Princesa deAsturies, títulu del heriede dende va sieglos, nos que se desendolcó con singular desenvoltura. Cuenta la princesa con simpatía natural, acoldu y cuidada dicción, y solo un reproche me cumple como asturianu na so falta de complicidá cola llingua tradicional d’Asturies, que nun siendo cooficial sí que se sofita dende va años nuna Llei d’Usu que l’ampara y torga’l so emplegu como arma política.  

Ayeri, coincidiendo col alderique eleutoral de los líderes políticos, piesllabase esti pequeñu ciclu bautismal cola entrega de los premios princesa de Xerona, de la fundación del so mesmu nome creada va diez años, posiblemente cola intención de incardinar la figura de la Corona cola siempres viciada situación social y política catalana. De nuevo SSMM tuvieron ocasión de comprobar hasta qué puntu la situación llegó a ser tóxica.

La heriede espresóse nun catalán esquisitu, según me diz un bon amigu d’aquella tierra, ensin dulda más delicáu que’l qu’amosaben les turbes babexantes d’odiu que nel esterior del recintu acosaben, cuspíen y, en dellos casos, cutíen los invitaos qu’aportaben a pie al actu; too ello énte la güeyada impasible de los mossos –como los que va pocos díes contemplaben inanes el saquéu d’un tren en Lérida- constreñios por órdenes superiores pa nun socavar les posibilidaes eleutorales del gobiernu autonómicu anguaño.

Les imaxes amosabenmos primeros planos de la madre la princesa, argullosa del bon facer de la neña, en que la so preparación ye probable que l’antigua profesional tuviere muncha responsabilidá, pero yo prefiero quedame coles repeties miraes de la principiante, como yá asocediera n’Oviéu, haza’l Rei, a la gueta de l’aprobamientu paternu y real, lo que fai patente esa complicidá necesaria nel deprendimientu d’un oficiu tan difícil como ye’l de ser Xefe del estaú n’España.

Pela nueche, nun horariu pensáu p’asustar al enemigu, los nuesos líderes políticos dieronmos amuesa de la so insuperable escualidez moral y política. Unos y otros esforcíaronse pa, otra vegada, dexanos a los españoles acoraxaos énte un futuru llenu de solombres y, probablemente, bloquiáu ya incapaz de dar solución a los munchos problemes que tiñacen la nación nun momentu nel qu’Europa y el mundu s’amuesen cargaos d’incertidume. Ye por tolo anterior qu’a min namái me queda’l semblante espladiente de la Princesa d’Asturies como presaxu de que, a lo menos, la continuidá de la Corona ta asegurada.

Raúl Suevos

A 5 de payares de 2019

Torna al castellán en repdiv.blogspot.com