Visión depués de la batalla

En xunu de 1859 tuvo llugar la batalla de Solferino, d’un llau l’Imperiu francés y adláteres y del otru l’Imperiu austríacu y los suyos. Hubiere sio una sangrienta batalla más de les daquella dómina pero, pa la suerte de los soldados d’entoncenes y los que depués vinieron, ellí taba Henry Dunant, un comerciante suizu al que les hostilidaes pillaron en medio, algo asina como si los CDR,s t’atrapen subiendo haza la Xunquera en ún d’estos díes.

Dunant implicóse enforma na engarradiella ayudando a monxes y civiles tratando de dar un pocu d’alliviu a los ferios d’ún y otru bandu. Fo testigu de les otomíes qu’entá naquella dómina cometíen sobro’l caíu, les sos llargues y terribles agoníes ensin alliviu medicinal nin de dalu calor humanu allegáu. Daquella esperiencia saldría “Recuerdu de Solferino”, un rellatu en primera persona daquella hecatombe que sería la base pa la creación darréu de lo qu'anguaño conocemos como’l Comité Internacional de la Cruz Roxa.

Enantes de Solferino yeren los cuervos y utres los primeros qu’aportaben al campu, depués los chacales y rapiegos, a estos seguíenlos los carroñeros de dos pates, y too asocedía mientes se podíen oyir los llamentos de los morrebundos, abandonaos a la so suerte. En dómines más antigues la caridá consistía en rematar los ferios ellí mesmo.

Güei n’España, tres la batalla eleutoral tamos na fase de los carroñeros. Nos medios de comunicación dexen oyír, sobre too, aquellos que faen leña del árbol cayíu. Pocu análisis en fondura cuando se da la voz a aquellos que falen de parte y aínda menos algame si se fala de los dos grandes campeones; los de siempre, los que mos llevaron a esta caleya ensin salida aparente.

Como un observador d’artillería, dende la distancia, percibo delles coses. En Cataluña’l cáncer nun mengua y namái maxino dos tratamientos, una ciruxía fondera a cargu d’un ciruxanu de fierro -nomémosla 155- del que nun veo esistencia en plantilla; o un tratamientu llargu a base de químiu y radiu –alta inspección y xudicialización mediante-pa lo que faría falta una direición d’idees nidies y decidies nel hospital ¿gobiernu de gran coalición?

Soi pesimista y nun gúeyo a dengún de los anteriores posibles protagonistes de mou que, témome, el cáncer va siguir tando ehí, foliando les fuercies de la nación, y nun sería de descartar una metástasis, notres partes, o en forma d’accesu violentu en forma de grupúsculos terroristes, pa los qu’esta vegada creyo que tamos más preparaos.

Nes Provincies vascongaes el sofitu socialista al PNV nun paez paga-y pues baxa llevemente nes tres, al igual que Podemos. Son los sabinistes y Bildu los que crecen preocupantemente, a lo menos pa quienes pensamos en clave nacional, y lo mesmo asocede en Navarra en rellación con unos y otros; a Chivite nun paez renta-y el so cambéu de chaqueta posicional y tamién pierde porcentaxe y votos.

Podría deducise de lo cabero que l’independentismu, más o menos radical, ehí sigue y nun recula. Nun lo va facer demientres nun se camude la situación anguaño en rellación cola formación de les xeneraciones nueves, esto ye, la escuela. ye ehí, na escuela au se tuvo xugando too dende va cuarenta años, demientres los gobiernos de Madrid güeyaben pa otru llau y al ciudadanu contaben-y películes. Solo cabe una política pa compensar la situación, recuperación de competencies o aplicadura dura de l’alta inspección; y esto durante años.

En Teruel aprendieron del señor Revilla, esi vieyu falanxista tan simpáticu él que llogró pa Cantabria maraviyes con un garrapiellu de votos. L’Agrupación turolense algamó un diputáu, creo que tamién un senador, y ta dispuesta a cobrar el so sofitu, a quien seya. Ye una forma nueva de facer política de la que nun se pue culpar a los sos siguidores; son los dos grandes partios que demientres años abandonaronlos los verdaderos responsables desta situación que da un Congresu con 16 partios. La 

Italia de los sos meyores tiempos ¡qué barbaridá¡

Na parte gruesa toos paecen haber ganao, sacantes Ciudadanos, con una debacle épica, y toos paecen negase a la evidencia de que’l sentíu común amenorga, puesto que’l centrismu, más o menos de drecha, enantes d’esquierda, bátese en retirada, lo cual nun me paez que seya una bona noticia; fundamentalmente porque les tensiones qu’agora van a recibir los dos grandes vienen de los sos estremos, nacionalismu de drecha y populismu d’esquierda, presaxando nada bono pal país.

El doctor Sánchez, oyéndolu anueche, paez nun dase por enteráu. La so posición debilitóse y la d’Iglesias, perdiendo votos, reforcióse. Per esi llau, el d’un posible gobiernu, qu’él noma progresista, les coses ponense perdificiles, los independentistes, amás de Podemos, van cobralo mui caro y p’aprobar los presupuestos van querer cobrar de nuevo. Paez cosa de bruxos más que de políticos. Veremos.

La otra opción ye la del gobiernu de gran coalición. PP y PSOE sumen más de 200 escaños, lo que-yos daría marxe sobráu pa llevar a cabu polítiques pa enfrentar la llexislatura con solvencia y, sobre too, pa intentar empobinar el futuru en rellación colos movimientos centrífugos actuales, que son más que los de País Vascu y Cataluña, y la situación de les pensiones y el necesariu pactu pa un cambéu 

de paradigma económicu ensin el cual esti país ye duldoso qu’algame caltener el pasu de la vertixinosa evolución pola que pasa’l mundu anguaño.

¿Cómo se pue algamar un pactu desti tipu? Non con dos tipos como los que dirixen los dos grandes partios, productos arquetípicos salíos de les mocedaes de les sos organizaciones. Dambos tán cortaos pol mesmu patrón, el so sillón ye de so y de naide más, nun ye cosa de compartir nin de ceder, y vanlo defender a costa de lo que seya. La posibilidá desi pasu esixe qu’un d’ellos dé un pasu atrás y eso nun lo van ver ustedes. ¿Cabría otra solución? Yo creo que sí, pero tamién ye mui difícil.

Pa emtamar, la llei 50/97, que defín la formación del gobiernu, nel so artículu 11 pauta les condiciones del presidente, y ente elles nun consta la de ser diputáu, esto ye, que pa presidir el gobiernu sirvemos una figura ayena al congresu ya inclusive a los partios que lu sofiten. N’Italia dieronmos múltiples exemplos desta solución con más que bonos resultaos.

Por embargu, la evolución de los partíos n’España foi haza’l reforzamientu cuasi dictatorial de los secretarios xenerales o presidentes lo que mos lleva otra vegada a la personalidá de los líderes anguaño, qu’a min me paez d’una escualidez moral más qu’aparente. El doctoráu d’ún y la llicenciatura del otru nun son la meyor presentación. De mou que tamos de nuevo nel puntu de salida, o meyor, nel campu depués de la batalla, colos dos bandos camín los sos cuarteles, banderes al vientu y proclamando la so victoria. Nun paez que s'enteraren de nada y el ciudadanu normal, na so casa, encloyase como si viere aproximase los xinetes del apocalipsis.

Cuando llego a esti puntu salta la noticia de la dimisión d’Albert Ribera, el más decente desta xeneración de líderes, llegáu a la política cuasi por casualidá y énte la dexación de responsabilidá de los grandes partíos en Cataluña, colos sos estudios d’abogáu impecables y trabayu de talu na so Barcelona natal. Fizo mui bon trabayu mientes se caltuvo fiel al adn del so partíu, el centru, el trabayu de bisagra, pero anició a perder el norte cuando camudó socialdemocracia por lliberalismu y depués un segundu guelpe de timón llevólu a lluchar pola drecha tradicional del PP ensin que la mayoría de los sos votantes lo entendiere, cosa que-y comunicaron anueche en forma de fuxida masiva. La so dimisión ponlu en valir en medio los campeones del onanismu políticu que representen Sánchez y Casado y espero que namái dimita del cargu y non de la política puesto que la so edá y esperiencia entá son mui aprovechables pal país.

Por cierto, güei vuelen SSMM a Cuba, unviaos por un gobiernu en funciones que vien de perder unes eleiciones convocaes por él mesmu. ¿O ganoles? En fin, pa qué más.

Raúl Suevos

A 11 de payares de 2019