Encelada real en L'Habana

Antemana la prensa que SM el Rei va viaxar a L’Habana darréu depués les eleiciones xenerales del 10 d’avientu, con ocasión del 500 cabudañu d’esta formosa, al empar qu’escayente, ciudá iberoamericana. Escrito asina, de forma curtia, paez una bona oportunidá pal viaxe pero si lo analizamos ye difícil atopar motivos que lu xustifiquen y, pol contrario, sí qu’apaecen elementos que lu desaconseyen magar que nunca enantes visitó la islla un monarca español en viaxe d’estáu, pues el d’el rei Xuan Carlos foilo como integrante d’una cume iberoamericana qu’ellí se celebraba.

Les naciones iberoamericanes nacieron por causa sobrevenida, la invasión francesa de la España borbónica, y ello fizo que necesitaren construyir la identidá nacional de forma apresurada. L’indixenismu yera despreciáu polos criollos, los amos nuevos de la situación, asina que mientes lo pensaben sofitaronse nos próceres de la patria, los caudillos, y deconstruyeron la idea d’España que pasó a ser la esplotadora y tiránica metrópolis colonial. En Cuba, con cuasi cien años de retrasu’l procesu foi semeyante.

Ye un fechu qu’allá lo de la madre patria nun furrula; namái nes élites cultes s’asume. La masa de la población ye educada na creyencia d’una lleenda negra adaptada a cauna de les necesidaes nacionales; y Cuba nun ye la esceición. Ellí, magar la mutua almiración de Fidel Castro y Franco, les coses son abondo semeyantes. El ciñu nun ye a España, ye, como en toa Iberoamérica y gracies a la llei de nietos, dañu collateral de la llei de Memoria Histórica, al pasaporte del Reinu d’España.

Cuba ta en plenu procesu de cambeos, cosméticos, de xacíu. Nueva constitución con imperiu del partíu únicu, el partíu comunista cubanu; nueva llei d’emigración pa qu’emigre la mocedá y asina amonte’l fluxu de remeses al país al empar que mengua’l riesgu de balasmes; nueva llei eleutoral na que se caltien el control del votu y la imposibilidá de votu pasivu dende fuera'l sistema; nuevu conseyu d’estaú ensin xerontocracia militar qu’agora se enroca nel politburó del partíu comunista, autenticu dominador del sistema; nuevu presidente, el señor Díaz Canel, un gris mediocre y obediente apparátchik a les ordenes de Raúl Castro; y too ello arreglao con un aumentu de la represión de baxu nivel –detenciones arbitraries curties, somantes, retención de pasaportes, etc.- a la más qu'estrinxia oposición política y prensa independiente; de la situación económica meyor nun falar. Esta ye la maraviosa Habana que los nuesos reyes van visitar y que, en ciertu mou, van sofitar cola so presencia. Ye duldoso que’l cubanu d’a pie tenga de qué alegrase.

El rei reina pero nun gobierna, l'axenda real ye cosa del gobiernu; un gobiernu, nesti casu, en funciones qu’organiza un viaxe de tanta trascendencia ensin pensar nes  consecuencies pa la imaxe de la Corona y d’España, o quiciabes sí. Solo falta que tamién se presente per ellí, pa una foto, dalgún de los amigos de Raúl Castro, Evo Morales, Humberto Ortega o Nicolás Maduro, entós la encelada real sería perfeuta.

Raúl Suevos

A 26 d’ochobre de 2019

Más sobro Cuba en:

https://www.academia.edu/36908470/CUBA_La_Guerra_de_todo_el_pueblo_de_Fidel_Castro_Un_diseño_español
https://www.academia.edu/37532345/La_Base_de_Guantánamo
https://www.academia.edu/40414789/60_años_de_Revolución_en_Cuba
https://www.academia.edu/37551050/La_Toma_de_La_Habana_por_los_ingleses