El ballet clásicu, como espectáculu artísticu, foi pa min un descubrimientu cubanu. Aporté a él por una invitación namás llegar a La Habana y pue dicise qu’asistí por compromisu, pero darréu quedé apoderáu pol conxuntu d’armonía y guapura que representa. Ellí taben, pal mio prestu, el ballet nacional de Cuba, cola so prima ballerina al frente, Viengsay Valdés, una diminuta diosa de la danza casada con un asturianu, la orquesta nacional de Cuba y, presidiendo dende’l palcu central, Alicia Alonso, la prima ballerina assoluta. Nun recuerdo si yera Giselle o’l Lagu los cisnes, poco importa yá, quedé engancháu.
A la entrada del teatru entá resistíen los frescos que amosaben escenes galleges y la catedral de Santiago; a lo último la instalación yera namái una parte del Centru Gallegu de La Habana, el so dueñu y constructor hasta 1961 cuando Fidel Castro lu espropió xunto col Centru Asturianu y restu d’entidaes. La sala, abondo escayente naquel 2010, aínda llucía enriba l’escenariu l’escudu de Galicia.
Alicia Alonso, de familia acomodada cubana, anicióse nel ballet na islla pero formarase en Nueva York y Londres, y pa finales de los cincuenta yá fundara la Compañía nacional de Cuba y hasta se enfrentara a Fulgencio Batista, lo que-y daría una posición privilexada cuando Fidel se fizo col poder nel 61. El ballet sería protexíu pola Revolución y Alicia prestaríase a convertilo nuna importante ferramienta propagandística del réxime.
A finales del 2010 tuve’l privilexu de vela baillar per vez cabera, yera’l so nonaxésimu cumpleaños y malapenes foi un mediu xiru dexándose cayer nos brazos del baillarín pero l’aplausu, incluyíu’l de Raúl Castro presente na sala, foi atronador. Ciega dende diba munchos años tovía caltenía con puñu de fierro la disciplina de la compañía.
Dalgún tiempu depués algamé aportar a ún de los ensayos. Llevemos el ramu flores más grande que pudimos consiguir pues Alicia, magar la edá, siguía siendo mui receptiva a los obsequios y falagos. El casu ye que pudimos sentanos al so llau y güeyar cómo, pesie la so ceguera y col sofitu d’una ayudante de gran nivel, facíase describir les evoluciones de los baillarines ya imponía les repeticiones que ficieren falta hasta que’l movimientu se llograba.
La instalación de la Compañía atopase cabe’l Malecón, ellí u más se siente la humedá caribeña de La
Habana. L’espectáculu d’aquellos cuerpos mozos esculpios pol trabayu d’años, empapaos de sudu, con una cierta medrana nos güeyos énte’l posible regañatu d’Alicia, ye otra de les visiones perenales d’aquella dómina.
Alicia, nel so exerciciu de direutora, dicíen que yera mui dura, dictatorial, ya inflexible na aplicadura de castigos. Tamién se comentaba que nun yera gustante de los “morenos” y per aquel entós la xente de color malapenes tenía representación ellí. Magar too, siempres había una llista llarga d’espera pa entrar y tamién una llista non menos llarga de deserciones en cauna de les sos xires pol estranxeru, de mou qu’anguaño podemos contar con baillarines cubanos en cuasi toles compañíes del mundu.
Ayeri nel so funeral, nel antepar del Gran teatru, nun había munchu xentíu, de fechu nun había alpenes personal, la so infrayable adhesión al réxime, y posiblemente la falta de tresporte en La Habana, paez que-y pasaron factura na so función cabera.
Raúl Suevos
A 20 de ochobre de 2019
Torna en castellán en repdiv.blogspot.com
No comments:
Post a Comment