Cesarismu democráticu n'América

 

El términu foi definíu y desendolcáu por un intelectual venezolanu, Laureano Vallenilla, guetando sofitar les polítiques del caudillu qu’entoncenes mandaba nel so país, Juan Vicente Gómez. Un militar que, como tantos otros n’Hispanoamérica, aportó al poder pente medies l’apelación al “pueblu” y l’apoyu de los fusiles del exércitu, el propiu o’l del país, tanto da. Esti sistema políticu básase n’adautar les instituciones a los intereses del personax o del partíu que lu sofita; y ello algámase col asaltu “democráticu” al poder llexislativu que se va nutrir colos sos siguidores –güeyen a Maduro y enantes a Chávez en Venezuela- pa lo cualo hai que someter al poder eleutoral p’asegurase’l resultáu eleutoral –esa parte falló-y a Evo Morales en Bolivia- depués, yá nel poder, avasállase o camúdase la estructura xudicial –como nos amuesa Cristina Kichner n’Arxentina- p'asegurase sentencies favorables. Too esto debe de combinase coles prebendes a los siguidores más importantes y, por supuesto, a les fuercies armaes, clave de seguridá de tol sistema –como anguaño Andrés Manuel López Obrador, AMLO, en México-, nin que dicir tien que too se debe combinar col acosu, ya ilegalización si necesario, de partíos políticos alversarios, prensa independiente y, en xeneral, cualquier opinión de pesu discrepante col Cesar.

Siempres s’asoció esti tipu de procesos coles “repúbliques hermanes”, pero nos tiempos caberos asistimos a un tipu nuevu de populismu que paez crecer ensin descansu nos países de democracia representativa, y que nun paez necesitar del apoyu o sofitu de fuercies armaes p'aportar al poder y, dend’él, intentar enllantar un sistema de cesarismu democráticu. Los sos poderes atopense nos sistemes de comunicación pública nuevos; vímoslo na victoria sorprendente del Brexit nel Reinu Xuníu, y tamién na no menos desusada llegada al poder de Donald Trump. Esto último representa’l cenit d’una deriva de la política interior norteamericana haza una polarización estrema na que la negación de l’alternancia nel gobiernu supón un puntu culminante nel deterioru institucional.

L’asaltu al Capitoliu lleváu a cabu por partidarios de Trump, nun intentu final de forciar la mano a los llexisladores que recuerda descomanadamente al Guelpe de Brumariu realizáu por Napoleón Bonaparte, ye un recordatoriu de la fraxilidá de los sistemes políticos, inclusive como los que, hasta ayeri, se proponíen como exemplu pal restu del mundu y qu’agora van tener muncho más difícil presentase, como nel so momento ficiera Alexis de Tocqueville, como referente y lluz pal restu del orbe. Día de llutu pa la democracia representativa y pa Occidente.

Raúl Suevos

A 7 díes vencíos de xineru de 2021

Torna en castellán en repdiv.blogspot.com

Amazon y el mundu que vien

 

Dicen los que d’esto saben, que son mui pocos pos les multinacionales operen nun ambiente de secretismu que pa sí quisieren los de la CIA y demás axencies d’intelixencia, qu’Amazon ta a puntu d’allugase en Bobes, conceyu de Pola de Siero, au va llantar un gran almacén que va dar trabayu a unes mil persones, pa alegría de los agraciaos y tamién de les estremaes alministraciones implicaes puestu que, nestos tiempos de probeteria económica, too esto suena a música gayaspera y cuasi celestial.

Si güeyamos a Zaragoza, nun estremu de Plaza, la plataforma loxística que nel so momentu inspiró la construcción de la Zalia xixonesa, vemos que s’afanen nuna explanación descomanada pa instalar el centru de devolución de paquetería d’Amazon n’España. Too foron facilidaes, nos plazos, nos trámites, y dicen qu’hasta nos informes, que de negativos pasaron a revisables, y depués a favorables en tiempu record. Too seya pola llegada de puestos de trabayu, como los de los tres centros de xestión de datos que Amazon Web Services construye nestos momentos n’Aragón.

Vivimos tiempos que se correspuenden a la post-globalización, daqué que, si ún nun ye economista, suena como a resaca de Nuechevieya; ardor d’estomagu, cruxir d’articulaciones, dolor de tiesta, desgana y muncha sede. Tarrécese l’alcohol, el desallugamientu d’empreses, la fabricación a baxu coste de los chinos, y en xeneral toes esas aiciones que llevaron a la desapaición de puestos de trabayu en toa Europa, especialmente nos países del sur, y la cayida o conxelamientu de los salarios de los supervivientes. D’ehí la entrega de los nuesos políticos énte cualquier ufierta de instalación de gran empresa. Como pa dexala pasar y que la garre otru.

Nel centru de Zaragoza, ciudá u s’alluga Puertu Venecia, el centro comercial más exitosu d’España, reina la desolación. Enantes del aportar del coronavirus podía apreciase un milenta de pequeños comercios zarraos por incapacidá para competir coles grandes superficies y colos xigantes del comerciu online como Amazon; comercios que de la mano del covid recibieron l’emburrión definitivu y que va ser la puntilla pa munchos de los que entá subsisten. Ye una situación que, independientemente de la tristura urbana que representa, dexa pol camín una cantidá enorme de puestos de trabayu y d’impuestos de tou tipu, qu’en dalu mou algama a compensar l’allugamientu d’estes grandes multinacionales que se carautericen tamién pola inxeniería fiscal y la repatriación de beneficios.

En Xixón  el paisax urbanu anicia a paecer tamién el d’una posguerra, nel centru puen vese cais cuasi completes con llínees de tiendes piesllaes pol efeutu combináu de la crisis anterior y l’actual pandemia del covid, y la noticia de Bobes va ser allegre pa dalgunos, resignaos a esa condición nueva d’asalariaos, y un responsu pa munchos, abocaos al pieslle énte la presión irresistible de los moos económicos nuevos.

Raúl Suevos

A 3 díes vencíos de xineru de 2021

Torna en castellán en repdiv.blogspot.com

Napoléon y la gran Pirámide

 

Napoleón, tres la conquista d’Exiptu en 1798, decidió pasar una nueche na cámara real de la pirámide de Keops p’amugase coles sensaciones que, suponíase, calteníense ellí dientro. A la so salida, maciu y apavoriáu, comentó-y a los sos intrigaos ayudantes, “anque vos lo contara nun me díbeis a creer”. Y asina quedó la historia d’aquella pernoctación sorprendente.

Enantes d’eso’l gran corsu embarcarase nuna aventura militar de calter estratéxicu pa soliviar la presión que’l bloquéu naval imponía a la primera República francesa. Con él llevárase un cientu de sabios, que inorantes del destín final de la espedición sedrien los responsables de trayer a Europa la cultura exipcia y l’orientalismu. Tamién tevo tiempu d’aniquilar 700 años de victories mameluques na batalla percélebre de les Pirámides, llibrada n’inferioridá de condiciones y vencida gracies al so xeniu militar. Poco dempués Horacio Nelson afondaría la flota francesa n’Abukir, dexando a los franceses aisllaos nel valle del Nilo au los estudiosos tendríen tiempu de facer descubrimientos sorprendentes, como’l de la piedra de Rosetta que permitiría  más tarde a Champollion descifrar el significáu de los xeroglíficos.

Pa entós Napoleón yá abandonara Exiptu, dexándo-y la tostada al so segundu al mandu, el xeneral Kleber, que nun lo fizo nada mal y tornó a vencer n’Heliopolis, hasta que lu asesinó un fanáticu exipciu, y que a la so memoria dedica Estrasburgu la más mundana y prestosa de les sos plazes. Entrín y non, en Francia, Napoleón daría’l guelpe de Brumario y faríase col poder que lu faría inmortal magar la derrota final nun Waterloo entoncenes desconociu nesta Cataluña qu’agora güeya pa Bélxica.

Too esto recordómelo’l señor Illa, mariscal del covid, que güei enteramonos qu’abandona la so tropa de sanidá pa dir a conquistar el febrero viniente, si la pandemia nun lo enzaca, la Xeneralidá catalana. Quiciabes seya un pocoñín gloriable comparalu, anque seya asolapamente, col pai del códigu civil de nueso, pues arriesgome a que’l gran doctor Sánchez, cobiciosu de gloria, reclame pa sí tamañu afalagamientu. Sicasí, convien nun escaecer que, magar les munches victories de la Grande Armée, a la fin foi’l créditu y la potencia del comerciu británicu les que se ficieron col triunfu definitivu gracies a les múltiples coaliciones qu’algamaron a armar. 

Nesta engarradiella política que se llibra na nuesa sufrida patria, en febreru toca la batalla de Cataluña, paez nidio’l papel de capitán araña, qu’a toos embarcaba y él se quedó n’España, pero pue ser entretenio axudicar papeles a los demás xenerales, como Iceta, el propiu Sánchez, o la señora Roldán, que güei mesmo pasóse a los ingleses. Toos paecen guetar la gloria, nesti casu política; convien que nun escaezan qu’ésta suel presentase a vegaes esquiva y siempres voluble; amás, en tiempos del covid, too ye cambiante.

Raúl Suevos

A 30 díes vencíos de nadal de 2020

Torna en castellán en repdiv.blogspot.com

O último rei do Brasil

 

Paeciera que Brasil, el xigante americanu, siempres fuera una república pero nada más lloñe de la realidá. Cola entrada de Napoleón na Península, al entamu del sieglu XIX, la familia real portuguesa, más lista que la española, embarcó a la so corte lisboeta y zarpó pal Brasil au esperó a quel nuberu pasare, dexando entós al meirazu real como rexente, daqué que nun debió presta-y puestu que se declaró independiente de Portugal col títulu d’emperador del Brasil, Pedro I.

Les turbulencies de la dómina llevaronlu a abdicar unos años más tarde dexando’l tronu al so fíu Pedro II, entá un neñu y que llegaría a reinar demientres 58 años con gran aciertu y dedicación. Dicen les cróniques que yera un home por completo dedicáu a los sos súbditos pa lo que se formara fonderamente a lo llargo de los años; tamién el so calter, tremendamente humanu y compasivu, facíenlu apreciáu pola xeneralidá de los brasileiros.

Un grupu pequeñu de militares nun yera d’esi paecer y promovió un guelpe que’l rei nun quiso abortar prefiriendo l’esiliu parisino onde viviría entá dellos años ente estrecheces económiques. El so funeral na capital francesa reunió más de 300 mil persones y foi lloráu per tol país brasileiru au se instaurara una república baxo’l lema d“Orden y Progreso”, daqué que, visto la historia posterior, amosaríase como un gran sarcasmu.

Na España anguaño tenemos un gran rei, una persona especialmente preparada pa representar la primera maxistratura de la nación. Daquien que, dende’l so accesu al tronu, tevo que lidiar con un periodu especialmente difícil no económicu y no social. Tamién él se vio “abandonáu” pol so augustu padre, como Pedro II, y, polo que podemos observar, paez qu’un grupu pequeñu de combatientes políticos, que como aquellos brasileiros namái representen a una parte mínima de la nación, tienen como principal oxetivu de la so aición política la desapaición de la monarquía n’España; y tamién como en Brasil, me temo, si nun se pon frenu a les sos acciones, podríen llevar a España a una situación tan dolorienta como la vivida pol Brasil a lo llargo del tiempu, ensin orde nin progresu.

Esta nueche SM recordónos la gran nación que somos y tamién la importancia de la Constitución y la Transición exemplar que supunxo; nun escaeció referise a la ética y la exemplaridá de les persones públiques. Too mui midío y too mui nidio pero que seguro que va xenerar refugu nalgunos, los de siempres. Quiciabes el problema seya que, como don Pedro II, tenemos demasiáu Rei pa lo que mos merecemos.

Raúl Suevos

A 25 díes vencíos de nadal de 2020

Torna en castellán en abellugunelcamin.blogspot.com

...Y Mambrú marchó a la guerra

 

El protagonista llamábase Marlborough y yera un duque inglés antepasáu de Winston Churchill que mandaba los exércitos de la so británica maxestá nuna de tantes guerres ente franceses ya ingleses. Diéronlu equivocadamente por muertu en campaña y los franceses ficieron-y un canciu que, nun se sabe cómo, llegó tamién a España anque, quiciabes pola nuesa perenal ineptitú pa los idiomes, equí camudóse-y el nome pol d’un soldáu desconocíu en cualquier guerra anónima, Mambrú.

Los más veteranos recordarán una dómina na que la play station, pa les neñes, consistía nuna simple tiza cola que se pintaba nel suelu’l cascayu, la rayuela o’l descansillu según la rexón, sobro’l que podíen pasase delles hores xugando en grupu mientes cantaben el vieyu canciu de “Mambrú marchó a la guerra, nun sé sa cuándo vendrá, do re mi, do re fa”. Yeren otros tiempos.

Güei, anque dicen que vivimos meyor, siguen esistiendo munchos Mambrús que se van a la guerra. Va non muncho allá marchó Aram Grigoryam, podría llamase asina, que naciera en Marsella, una ciudá de Francia au los franceses son minoritarios, y onde llegaron miles d’armenios tres el xenocidiu lleváu a cabu polos turcos a la fin de la primera guerra mundial, y au siguieron aportando a lo llargo del S. XX  como parte de esos ocho millones que formen la diáspora d’esa vieya y atristayada nación.

Aram, como otros, sintióse obligáu a acudir a defender el vieyu país cuando llegaron les noticies d’una nueva guerra col enemigu tradicional azerí. Paecía un trámite, contaben con un tratáu de defensa colos rusos y bonos armamentos; nun tenía por qué saber que’l gobiernu armeniu, confiáu, dexara de güeyar lo qu’asocedía nel país vecín, au s’invertía en tecnoloxíes nueves y abrazábase al vieyu enemigu turcu dexando de llau a l’antigua metrópoli rusa. Los equilibrios vieyos yá nun furrulaben.

Aram nun tevo tiempu nin de sosprendese. Los ensames de drones turcos ya israelíes llegaron metanes la oscuridá nocherniega ensin que los radares armenios los detectaran. Los misiles guiaos yeren casi infalibles y en poques selmanes too concluyó con un alcuerdu de paz, varios miles de muertos y munchos más desplazaos. Y nun paez que’l gobiernu armeniu, en casa, vaya díse de rosites depués del desastre.

Nun tengo mui nídio que nos países occidentales queden munchos Aram dispuestos a dexalo too pa defender al so país, pero si ye posible que dalgún gobiernu, como l’armeniu, dexe de llau’l so deber de vixilancia sobro lo qu’asocede na so redolada y s’atope cola sorpresa desagradable de qu’aquel vecín, sobro’l qu’históricamente  prevaleciera, seya agora un enemigu énte’l que nueves circustancies, aliances y tecnoloxíes lu lleven a claudicar. 

Raúl Suevos

A 20 díes vencíos de nadal de 2020

Torna en castellán en repdiv.blogspot.com