Entámase güei en Múnich, capital de la Baviera alemana, la conocía conferencia anual de seguridá, d’ecos planetarios, pola repercusión que la prensa suel da-y, si bien los sos resultaos y algames nun paez que dieran muncho de sí a lo llargo del tiempu, más alló del prestixu rellacional induldable que consiguen los organizadores. Y esti añu anicia de la peor manera posible.
L’asuntu escomencipia mal porque tamos en plena marexada de la parlla telefónica que’l cesar yanqui tevo col zar rusu, p’amarguriu de los líderes europeos, que quedaron al marxe de la mesma mientes el mandáu secretariu de defensa norteamericanu poníalos firmes a toos ellos nel aconceyamientu xeneral de la OTAN en Bruxeles; y tamién pa lloru de los probes ucranianos y el so presidente Zelensky, que ven cómo los miles de muertos y la invasión de la so nación pueden quedar ensin castigu y nes manes de dos autócrates; pues nun hai que s’enquivocar, por más eleiciones mediante que dambos alcagamaren el poder, l’exerciciu del mesmu ye idénticu en dambos casos, autocracia imperialista. Ye lo qu’hai.
Y ye que tamién en Múnich, en 1938, tevo llugar otra conferencia con Adolph Hitler d’anfitrión, y con Chamberlain pola Gran Bretaña, Daladier por Francia, y Mussolini por Italia, como contrapartes pa tentar de controlar a un líder alemán que yá s tenía pasao pel arcu del triunfu la mayor parte de los Alcuerdos tráxicos de Versalles, y qu’ellí, en Múnich, recibió l’aprobadura de los líderes europeos pa anexonar parte de Xecoslovaquia, los Sudetes, habitaos por personal d’orixe alemán.
Fo lo que se conoció como l’Apaciguamientu, que daría llugar, seis meses dempués a l’anexón forciosa de toa Xecoslovaquia, y lluéu, a la fuyida desaforada haza alantre del tipu hasta’l so suicidiu nel bunker de Berlín. Toa una historia qu’entamó, tocantes a les cesiones a la gueta de la paz, cola Conferencia de Múnich, y que güei paez obligao recordar, polo que mos toca.
Trump va a lo de so, cola so mentalidá de tiburón empresarial, y cola so política personal d’entamar les negociaciones con menacies, y muncho me temo que los nuestros líderes –nunca Europa tevo más güérfana de dirixentes- nun tán en condiciones de tomar la solución única que tenemos al nuesu algame: la refundación de la Xunión dando un pasu más haza los Estaos Xuníos d’Europa. Tolo demás, inclusive l’aumentu de los presupuestos de defensa, nun va servir un res, vamos siguir al azar de lo qu’autócrates como Putin y Trump puedan decidir por nós. Y Xi Yinping güeyando.
Raúl Suevos
A 14 díes vencíos de febreru de 2025
Torna en castellán en repdiv.blogspot.com
No comments:
Post a Comment