Ye un nome que, mui probablemente, va haber qu’entamar a retener, pues too paez indicar que lluéu se va camudar nel canciller alemán nuevu tres les eleiciones xenerales vinientes, a celebrar nel so país el 23 de febreru. El señor Merz ye agora’l xefe de la CDU, dalgo asina como’l Partíu Popular, por poner un exemplu nacional, y marcha en coalición histórica col partíu conservador de Baviera, l’estáu federal más potente del país. Ye’l partíu al que pertenecía Ánxela Merkel, y enantes d’ella Helmut Kohl, el canciller de la Reunificación alemana.
Tamos falando d’Alemania, la gran locomotora d’Europa, magar los tragos amargosos que la economía-yos ta faciendo pasar nos trimestres caberos, que ta llamada a liderar, xunto a la otra “enferma”, Francia, el periodu social y políticu que s’abre énte toos nós cola llegada de Donald Trump a la Casa Blanca. Ye lo qu’hai.
El señor Merz nun tebo en Davos, como otros, sinon que se fue a Berlín, onde ayeri esplicó demientres un encuentru colos sos siguidores cuáles son les sos idees pal casu que gane les eleiciones, y forme gobiernu, dalgo, como yá indiqué, más que probable. Y nun dexa duldes a los sos votantes sobro’l xiru históricu que piensa da-y al país, y en la midida de lo posible a Europa.
Refuerciu de los llazos con Francia, a la qu’entiende como socia pa encabezar Europa, xunto con Polonia; incrementu mayúsculu de los gastos de defensa ya impulsu de la homogenización ya interoperabilidad de la industria de defensa europea; centralización na Cancillería de la política esterior y de seguridá, cualquier que seya’l gobiernu y la coalición que pudiera salir alantre; mayor coordinación de los exércitos europeos, lo que significa potenciar el mandu y control a nivel européu; sofitu ensin fisures a Ucrania na so defensa y soberanía énte la invasión rusa; endurecimientu de la política migratoria y d’asilu. Y too ello partiendo de la ideya de que tamos énte una “ruptura epocal”, acordies les sos pallabres, sobrevenía pola apaición del “exe de les autocracies”, al frente del cualu llantense Rusia y China.
Tamos énte una declaración d’intenciones pernidia qu’a toa Europa implica nalguna midida, como por exemplu a los rabeliscos pro-rusos Fico y Orban, per Eslovaquia y Hungría, y a los que, como’l nuesu presidente pretenden, en ciertu mou, “enfrentase” al Cesar yanqui, y bailen las cifres absolutes del nuesu gastu en defensa, tratando de despintar que somos los caberos na OTAN.
Vien el señor Merz, con mucha fuercia y ganes, ye’l so discursu recuerda’l vieyu “si vis pacem para bellum”.
Raúl Suevos
A 24 díes vencíos de xineru de 2025
Torna en castellán en repdiv.blogspot.com
No comments:
Post a Comment