Falten aínda unos díes, casi dos meses, pal entamu de la segunda presidencia de Donald Trump, pero, no que toca a Ucrania, dellos aspeutos anicien yá a perfilase, como’l tipu de solución que prefier el Cesar nuevu norteamericanu. Una que seya rápida, anque tamién puerca, especialmente polos sapos que los ucranianos, tamién los europeos, van tener que tragar.
Al paecer yá Zelensky tien unviáu a parte del so círculu próximu a Washington pa sondear cuálos son los presupuestos colos qu’ellí se xuega, y paez que nun son falagueros, nin muncho menos esperanzadores, pa ellos, los que tres ser invadíos ven cómo muerren los sos fíos nel frente y cómo les bombes ruses destruyen el texíu económicu del país nun Holomodor nuevu, con Putin como verdugu en llugar de Stalin, y pal restu d’europeos, que tendríemos qu’apechar colos costes de la operación.
El señor Trump quier dedicar la so atención al “problema” chinu, y pa ello interesa-y desentemangase del follón cazalbu ucranianu, ofreciendo-y a Putin un parón nes llínees de combate, con una fuercia d’interposición europea, unos doscientos mil, que pagaría Europa, naturalmente, con unos medios defensivos que vendríen en parte de la industria estadounidense, pagaos con fondos europeos, y una reconstrucción d’Ucrania, pa la que los fondos europeos sedríen otra vegada necesarios. Esto ye, que tamos énte un chollu pa Europa, y, too ello, dándo-y tiempu a Putin pa recomponese y rearmase.
Nin que dicir que del ingresu d’Ucrania na OTAN nun se fala, que ye lo mesmu qu’invitar a Rusia a que lo torne a intentar nunos años, con Putin o col que toque, y tou esti enxagüe que’l señor Trump, a tenor de les informaciones que van aportando, pretende que traguen los so socios europeos, faríase como si la historia, y Chamberlain, nun tuvieran ehí p’alvertinos, o inclusive más recien, los alcuerdos de Minsk, polos qu’Ucrania se desfizo de tol so arsenal balísticu nuclear a cambiu de la seguridá perpetua, jajajaja, de nun ser atacada por Rusia. Vienen tiempos duros pa Ucrania, y pa Europa.
Estaos Xuníos, casi siempres cabileñu na so política internacional, ta a puntu de cometer un erru históricu nuevu, cuando Rusia, qu’avanza nos frentes ucranianos a un coste en vides propies insanu y absurdu, tá económicamente nes últimes, a puntu d’esbarrumbase, lo que daría a tou Occidente, y especialmente a los Estaos Xuníos, una palanca terrible que-y permitiría afrontar el “problema” chinu con tranquilidá. Ye lo qu’hai.
Raúl Suevos
A 12 díes vencíos d’avientu de 2024
Torna en castellán en repdiv.blogspot.com
No comments:
Post a Comment