Les cien doncelles

 

El mío amigu Pedro marcha cola familia a pasar unos díes a Florencia, y dí-y dellos conseyos de visita fora de lo habitual, como la terraza del hotel Baglioni, au se puede xintar, llapar o cenar –percaro- demientres se esfruten les vistes espectaculares de la ciudá, o tamién tomar daqué –más algamaizu- col mesmo placer visual.

Averao d’ellí, tamién-y tengo recomendao visitar la ilesia de Santa María Novella, menos allegada que los grandes claustros de la ciudá pero igual de plasmante y que guarda una capilla con un frescu renacentista bien guapu que recuerda’l perenomáu ya inesistente tributu añal de les cien doncelles, que la so responsabilidá atribuye la lleenda al probre rei Mauregato, supongo pola so condición d’usurpador del tronu, que se sometía a tamañu desafueru pa contentar al califa cordobés y asina enzancar la posible invasión del reinu astur.

La lleenda tamién mos cuenta que los soldaos del rei esbillaben les más guapes a lo llargo y ancho del país, lo que mos confirma la falsedá de la hestoria pues con tala discriminación xenética, anguaño debería prevalecer la fealdá y, pol contrariu, les asturianes son pernomáes  pola so galanura. Ye lo qu’hai.

El cuentu sirve pa ilustrar lo que ye un estáu vasallu, qu’aporta tributos, paries, y, si necesario fora, soldaos, al so “protector”, pa torgar males peores, como pudiera ser la invasión por esi mesmu patrón o por estaos vecinos. Una situación que tenemos visto a lo llargo de la historia como nel casu de Roma, o del imperiu Otomano, por poner dalgún exemplu, si bien paecía dalgo que quedara arrequexao más allá del sieglu XIX.  

Sin danos cuenta, n’Europa, cayímos nuna situación abondo semeyante al dexar a los EEXX a cargu de la nuesa seguridá, sofitada na OTAN y na que, magar l’esporpolle políticu de la Xunión Europea, nun fomos a dá-y esi cacarexáu y nunca desendolcáu Pilar européu de l’Alianza. Lo que mos dexa agora, tres la invasión d’Ucrania, coles nueses vergoñes al aíre y dependientes del gran patrón yanqui que, a la so manera, vános imponer les sos paries.

Los probes ucranianos tienenlo peor. Demientres dellos años tierra pa adopciones de neños, o moces casaderes, si non coses peores, agora, tres amosar al mundiu hasta onde llega’l so argullu y valir, paecen abocaos a entregar les sos bayures minerales al imperiu pa poder caltener una soberanía retallada en munchos aspeutos, y a espenses  de per ú sople’l vientu en Washington.

Pasa’l tiempu pero, magar les Naciones Xuníes, sigue habiendo paries, tributos y estaos vasallos. Como nós, los europeos.

Raúl Suevos

A 23 díes vencíos de febreru de 2025

Torna en castellán en repdiv.blogspot.com

La hora 25 d'Europa

 

A dalgunos, el títulu sonará-yos a programa de radio, pero’l conceutu naz con una novela de calter parcialmente autobiográficu qu’escribió un rumanu, Constantin Gheorghiu, tres los avatares de la Segunda Guerra Mundial; “La hora venticinco”, na que sufre padecimientos tremendos, y que va servir pa qu’Anthony Quinn se luzca con un papel protagónicu na película del mesmu títulu.

El mensax qu’aporta ye que nesa hora la humanidá pierde toa esperanza, porque too s’esbarrumba, non namái les estructures físiques, qu’a la fin y al cabu son recuperables, sinon los principios y los valires, el conceutu mesmu d’humanidá desapaez, como asocedió n’Europa coles atrocidaes que traxo’l nazismu, y qu’en delles zones foron respondíes pol comunismu estalinista.

Nestos díes atopamonos los europeos con una sensación, en ciertu mou, semeyante a la que la novela mos representaba. Aquello que creyíemos sólido, casi inmutable, como yera’l sistema de seguridá que los Aliaos, lideraos polos Estados Xuníos, punxeron en pie tres los desastres de la guerra, y que mos tienen caltenío, demientres más de setenta años, confiaos en que la tranquilidá de les nueses vides nun se vería alterada nel interior de les nueses fronteres, especialmente tres la desapaición del Muru de Berlín y el Pactu de Varsovia, vemos agora que nun yera más qu’un trampantoxu, tres el cualu en realidá nun había más qu’una pared desnuda, fría y fea.

El guelpe tien sío mayor porque, con cifres na mano, Europa tien echao’l restu na ayuda a Ucrania, penriba de los EEXX, nel convencimientu de facer lo correutu doblemente; por sofitar al débil énte la invasión inxustificable del poderosu, que se saltaba toes les normes del drechu internacional, y amás defendíase a si mesma énte la posibilidá, casi certidume, de que nun futuru la menacia s’estienda haza l’oeste si non se para a tiempu. Y too ello cola anuencia y el sofitu del líder de l’Alianza, los EEXX.

Agora tolos nuesos presupuestos esmorecieronse cuando comprobamos que’l rei non namái ta desnudu sinon que ye una especie de reencarnación de Caligula, por citar un de los emperadores alloriaos de la vieya Roma, qu’únvia a la papelera tolos alcuerdos previos, posiblemente, en dalguna forma, tamién la propia Alianza, lo que mos obliga a tomar decisiones, rápidamente, radicales, como si la menacia fuera direuta, que lo ye. Decisiones como si Europa fuera un estáu unitariu, decisiones qu’únvien un mensaxe fuerte, al nuesu vieyu líder y a Rusia. Decisiones como si tuviéremos énte la hora venticinco.    

Raúl Suevos

A 20 díes vencíos de febreru de 2025

Torna en castellán en repdiv.blogspot.com

Nun güeyes penriba

 

Hai un meteoritu rondando perende. Dicen que nunos pocos años, llegáu’l casu, cutiría, en llugar esconocíu entá, sobro la Tierra; y yá tien entamao un baille pequeñu col cálculu de posibilidaes sobro la certidume del impactu o, lo más probable, que pase a unos cuantos miles de kilómetros del nuesu planeta, queríu ya irremplazable.

Esti meteoritu llega con un ciertu retrasu sobro una película, protagonizada por Leonardo Di Caprio, qu’anque a min paecióme perinteresante, la realidá ye que pasó ensin pena nin gloria, tantu equí como nos Estaos Xuníos, au se desarrollaba la trama. Un historia basada nel descubrimientu de la llegada ya impactu seguru d’un meteoritu descomanáu que diba acabar cola esistencia terrestre, y, magar l’esfuerciu del protagonista, asuntu tratáu con indiferencia suicida per tol mundiu, con un mensaxe xeneralizáu pa tratar el tema de “nun güeyes penriba”. 

A min, aparte del meteoritu actual, la historia tiénme recordao la intervención, oyía na radio, del nuesu simpar ministru d’esteriores, falando del aconceyamientu que van tener unos cuantos líderes europeos en Paris pa tratar de la situación ucraniana, tres les intervenciones intempestives de Trump y los sos delegaos tocantes col futuru del conflictu.

Y ye qu’oyer al ministrín de nueso, cola so dicción edulcorada, y discursu cargáu de llugares comunes, tan vacíos de conteníu como’l propiu exerciciu del ministeriu pol susodichu individuu, que caltien siempres nes sos intervenciones una actitú tan  llambía que, a lo menos no que me toca, provoca l’arrebol de quien lu escucha, cuando non la risión. Ye lo qu’hai.

El señor Albares, nel casu ucranianu, y la afeutación europea del mesmu, paez querer convencenos pa nun güeyar penriba, com’l casu del meteoritu, anque nesta ocasión sedría l’Este más bien. Pero’l tiempu pasa, tien pasao, y, magar les cantidaes económiques descomanaes invertíes nel sofitu a Ucrania, nada se tien fecho nos aspeutos políticos en rellación col Exércitu Européu, o cola so Defensa, mientes el meteoritu Trump s’averaba, y equí esperábase que pasara de llargo, dexándonos tranquilinos con Kamala.

L’elefante yá entró na cacharrería, y nun ta nidio que la xunta convocada pol decepcionante Macron, nin tampocu la qu’al mesmu tiempu se tien nel superáu Conseyu de Seguridá de la ONU vayan a servir pa muncho (nun sirvieron). El meteoritu yá ta equí, como l’otru, el de la ultraderecha, al que tampocu se tien querío ver, y al que, posiblemente, tamién ye tarde pa tratar de parar. Pero’l señor Albares tien una dicción perfeuta, too hai que dicilo.

Raúl Suevos

A 17 díes vencíos de febreru de 2025

Torna en castellán en repdiv.blogspot.com

San Remo 2025

 

Nel mes de febreru, dende va yá munchos años, Italia paralizase, de forma tala que nin siquier les salíes de tonu de Donald Trump algamen a amenorgar l’atención que los italianos presten al so festival de San Remo. Una exhibición artística nun país que lidera’l mundiu de les artes dende va más de 2000 años, dende que-y torgaron el primao a los griegos, y que, por comparanza, dexa al nuesu Benidorm Fest como si d’un guateque de gañanes se tratara. Ye lo qu’hai.

A min gústame siguilo a distancia; la RAI nun entra ente los canales a los que tengo accesu, y trato de discriminar lo que güeyo en diferíu a lo llargo d’esa selmana musical. Con ello y lo que la prensa me tresllada acabo por faceme una bona imaxe de lo asocedío, y esti añu nun foi menos.

El ganador tien sío Olly, un mozu que nel desendolcase sobro l’escenariu, y el canciu que presentaba, “balorda nostalgia”, recuerda muncho al Ramazotti de siempres. Una balada solvente y típica que va facer mui bon papel n’Eurovisión, con seguridá muncho meyor que nós. Acompañábalu ente los finalistes esi rapper conocíu como Fedez, nos años caberos maríu de la galáctica influencer Chiara Ferragni, y agora felizmete divorciaos.

Presentábase con una canción, “batitto”, que facía referencia a les depresiones que davezu lu tienen atacao, y que personalizaba nuna muyer, a la que munchos identificaben cola so ex. Un canciu que nun me tien emocionao, magar la solvencia de la so actuación, y al ésitu de ventes que yá supón en tol país.

Pero’l festival aporta muncho más, ente otres coses la nueche de los duettos, na que figures conocíes versionen grandes canciones, y esti añu taba prevista l’apaición de Marco Masini, xunto a Fedez, pa cantar la pieza “bella Stronza”, del primer, y que se traduz como bella gilipollas. Y ye que Masini, nun ye un cualquier, ye l’autor de “T’innamorerai”, un superclásicu de les balaes italianes, que cantó xunto a Annalisa de forma conmovedora, va dellos años, notra nueche de duettos.

El resultáu d’esta “bella stronza” queda pa min como lo meyor d’esti añu, pues aparte de la lletra, modificada por Fedez pa facer velaes alusiones al fracasu del so matrimoniu, debío ente otres coses a l’actividá de la pitonisa bella stronza, de pitones, cornamenta, y eses coses, aportaba l’ensamblaxe perfeutu de dos voces mui estremaes nel tonu, y na forma, pues l’ún cantaba y l’otru rapeaba. Un resultáu espectacular que vos invito a esfrutar.

Raúl Suevos

A 16 díes vencíos de febreru de 2025

Torna en castellán en repdiv.blogspot.com

Montaos nel cohete...como los rusos

 

Ye’l nuesu presidente de gobiernu mui dao a les frases cortantes, tantu qu’hasta suel refocilase nelles, y escúchase a sí mesmu, sobremanera nel púlpitu del Congresu de diputaos. Dalgún de los sos siguidores, o alversarios, hasta podría pensar, en términos organo-sesuales, que se-y pon “gorda” cuando suelta dalgún dellos sos llatiguillos al xefe de la oposición, la so némesis eleutoral, anque nun colleche resultaos tanxibles no tocantes a gobernar.

Últimamente anda con aquello de qu’España marcha como un cohete, amosando, una vegada más, los sos conocimientos perescarsos de la cosa militar, quiciabes porque, quitando la mili d’enchufáu que me cuenten fizo, nunca tien amosado interés; al contrario, la so actitú avérase más a la del despreciu, como’l so colega de cargu, que non de poder, Donald Trump.

Va lo del cohete porque ye ésti un inxeniu bélicu que, al contrario del misil, nun cuenta con guía, esto ye, llánzase, y dempués va dir a cayer más o menos onde-y pete; non como’l so collaciu de categoría superior que, por medios estremaos, puede dir haza un oxetivu a miles de kilómetros con un érru mínimu. Y d’unos y otros tenemos exemplos diariamente nes martirizaes tierres y ciudaes ucranianes.

El cohete rusu, el de la economía, va mui bien, aparentemente, con un PIB en 2024 del 4.10%, mui superior al que’l nuesu Pedrín del alma presume; pero detrás d’ello escuendense les primes d’enganche que se paguen a los inxenuos que s’alisten al exércitu rusu pa morrer n’Ucrania, y les indemnizaciones que reciben les viudes, o los lisiaos de por vida; ensin tener en cuenta los milenta de cadávres que se dexen ensin recoyer pa asina, baxo la escapatoria del desapaecíu en combate, aforrase la prima a les sos families.

Eso son perres qu’entre al texíu económicu, como les inversiones estatales descomanaes na defensa en xeneral, 40% del presupuestu estatal; mientes se disparen los salarios, porque ente los muertos y los fuyíos, falta mano d’obra; y al tiempu dispárase la inflación, muncha demanda/poca oferta. Un espectáculu dantescu, sobremanera pal futuru del país; pero a Vladimir nun paez importa-y, o yá nun tien vía d’escape.

Equí nun hai guerra, pero’l nuesu cohete alimentalu una delda demencial, que van pagar yá los nietos de nueso; unes cifres de paru fantomátiques, especialmente no que toca a los fixos discontinuos, y una creación d’emplegu sofitada no estatal; una corrupción rampante, como amuesen los estudios internacionales; y los primeros d’Europa en consumu d’opiáceos y ansiolíticos. Hai más; va ser otru día, y va venir de la mano de lo que decida Trump. Ye lo qu’hai.

Raúl Suevos

Torna en castellán en repdiv.blogspot.com