Parolaes de paz en Casa Trump

 

Anueche quedéme esperando la conferencia de prensa en Mar-a-Lago, la residencia privada del presidente de los EEXX que nesti segundu mandatu paez que se tien convertío en residencia oficial. Y la espera mereció la pena, non polo anunciao nella sinon más bien pol “show” que, una vegada más, mos ufertió l’ogru anaranxáu.

El resultáu, como cabía esperar, ye más de lo mesmo. Un 95% d’alcuerdu en pallabres del presidente Zelenski, que vien a ser lo mesmo qu’un res, pues esi 5% restante ye pocu menos que inalgamable, y, nel supuestu de lograllo, que lo duldo, necesitaría l’alcuerdu del sátrapa del Kremlin. Esto ye, que los ucranianos tienen que siguir esperando que’l temporal amaine; dalgo improbable nel términu curtiu.

Na parte de comunicación pública l’espectáculu tamién dio abondo de sí. Trump, a diferencia de lo que suel facer el nuesu presidente inefable, retrucó a un númberu ampliu de periodistes, entemeciendo rempuestes sobro l’interés del asuntu con referencies a la parva arrogante que-yos ufiertara a los visitantes, como si eso tuviera dalguna importancia, dexando ente elles la información de que va siguir trabayando en mou equipos de trabayu, col so xenru y el so amiguete como elementos principales en la parte yanqui, y dexando cayer, en delles ocasiones, l’actitú positiva y “pacífica” de Putin, conclusión estrayía por él  tres una parolada telefónica d’una hora.

Ala fin, a mí quédame la perceición de que Zelenski, que de profesión ye cómicu, tien deprendío d’aquella encelada que-y ficieron en Washington, y sabe que tien que inundar l’egu de Trump con toa mena de xigomencies y agradecimientos, pues como tou ególatra ye mui sensible a los falagos. Tamién cabe reconocer que’l tonu de la conferencia fo francamente amable y simpáticu, lo que’a lo menos paez asegurar la continuidá nel aportar de la intelixencia imprescindible a los ucranianos, y quiciabes tamién del armamentu qu’agora paga Europa. No negativo la equiparación trumpiana de los dos contendientes, l’asesín y los asesinaos, llegando a espresar tres una referencia periodística a los bombardeos del día sobro Kiev, que los ucranianos tamién bombardeaben Rusia, resalvando qu’estos fanlo, sistemáticamente, sobro oxetivos militares.

Dende la mío visión eurocéntrica creo que tenemos ganao tiempu, sobremanera, magar lo que los sos xenerales dicen a Putin, porque Rusia nun avanza, o faílo a un preciu inhumanu, mientes la so economía esbarrúmbase, y nós, lo europeos, desensolcamos mentanto la idea de que necesitamos más Europa, de la Defensa güei, y quiciabes mañana de los Estaos Xuníos d’Europa, y ello gracies a la llocura de Putin y el sacrificiu de los ucranianos.

Raúl Suevos

A 29 díes vencíos d’avientu de 2025

Torna en castellán en repdiv.blogspot.com

Mensaxes institucionales

 

La Navidá ye tiempu de mensaxes. Enantes mayoritariamente pente medies les Postales navidiegues, anguaño en regresión, casi meyor dicir en periodu d’estinción; y na actualidá colos consabíos guasap, que a toes partes lleguen, en forma curtia unos, y otros cola ayuda de fotografíes o memes diseñaos por terceros. Confieso que yo tamién lo fago. Pero hai otros mensaxes de más fustaxe, los de calter institucional.

Yo’l periodu importante d’esta Navidá pasélo n’Italia, cola familia qu’ellí reside, y, pala mío sorpresa, nun pude gueyar el mensax de So Maxestá en direuto, porque la mío suscripción española nun furrulaba ellí, al contrario d’años pasaos. El casu ye qe, poro, pude dedicar tiempu a ver lo qu’ellí asocedía nesi aspeutu, y descubrí el mensax curtiu de la presidente del gobiernu italianu, Giorgia Meloni, con fondu del so Pesebre familiar, y pallabres cargaes de concordia y paz, ensin escaecer resaltar la historia que se celebra no qu’ellos nomen Vixilia di Natale, la nuesa Nuechebona.

Tamién pude sorprendeme col Comandante del Arma de Carabinieri, el cuerpu hermanu de la nuesa Guardia Civil, qu’aprovechó la circunstancia p’averase a un puestu metanes un cruce de dalgún puntu del país, onde una patrulla del Cuerpu cumplía col so deber de velar pola seguridá de los italianos. Carabinieri a los que’l so Comandante felicitó pola so dedicación nuna nueche tan importante, y colos que se sumó pa felicitar a tolos componentes del Cuerpu.

Un detalle magníficu que l’equipu de comunicación del Cuerpu punxo d’arréu nes redes, con gran éxitu y encomiu xeneral polo que pude decatar, y que la señora Meloni aprovechó al día siguiente pa resaltar en tonos mui positivos sorayando el llabor que Carabinieri y restu de Cuerpos y Fuercies de Seguridá lleven a cabu.

Too ello en fuerte contraste col mensax del nuesu presidente de gobiernu, un exerciciu d’equilibriu tan evidente, en cuanto los esfuercios pa nun nomar la Natividá del Señor, que contrasta tarreciblemente colo qu’asocede notres partes y, creo yo, colo que afortunadamente ye güei’l sentir mayoritariu de la población española.

A otru día pude ver el mensax de So Maxestá. Dempués de lleer dellos comentarios de parte, esto ye, de persones y personaxes a los que-yos prestaría que’l Rei asumiera la ideoloxía propia, de caún d’ellos, y se espresara en consecuencia, esto ye, que fuera un políticu más, y que se reboten ca vegada que Don Felipe se pronuncia dende la responsabilidá de la so alta maxistratura, o lo que ye lo mesmo, por y para España.

El Rei ta obligáu a dexar de llau’l sentir de los Partíos políticos, ta penriba d’ellos. Namái l’interés d’España y los españoles marca’l so mensax, y esti añu, una vegada más asina tien sío. Anque, na mío opinión, nun necesita esplegase per Palaciu como si d’un presentador televisivu se tratara. Ehí, los sos asesores equivoquense, como tamién al camudar de sastre y adoptar la americana curtia y los pantalones estrechos, más propio de mozucos sometíos a les modes. Ye lo qu’hai.

En Zaragoza a 28 díes vencíos d’avientu de 2025

Torna en castellán en repdiv.blogspot.com

Mensaxe navidiegu

 

Nun sé per ónde entamar. ¿Quiciabes peles puertes de los mío vecinos que faen paecer esnuda y escarnada la de mío casa? Unu tien llantao unes tires descomanaes con llazu que la faen semeyar como un paquete de regalu enorme, como anunciando una especie de centru comercial tres d’ella mesma, o dalgo asina. Los otros dos cuelguen adornos d’árbol navidiegu, con pinta de tener aportao a preciu amenorgao dende la China aballadora de Xi Jinping, cola salvedá de que proponen una mui yanqui Merry Christmas. Casi que me quedo cola mío puerta afarada, la mesma que nun s’abre cuando los pocos y azogosos neños de la comunidá vienen a pidir caramelos con ocasión d’esa fiesta importada del Halloween. Nun me presten les importaciones culturales populares, y menos les yanquis. Ye lo qu’hai.

A min prestábame la Navidá de la mío infancia. Que nun yera probe de solemnidá pero sí espurecha en bienes y regalos. Trayía, en cambiu, a lo menos nel mío barriu popular de La Calzada xixonesa, un montón de vivencies, muncho más arriquecedores que los caramelos arribaos de los USA; como aquelles castañueles feches con dos listoncillos de madera, colos que dalgunos algamaben percusiones dignes d’un conservatoriu. Yo non, yo diba abondo xustu nel asuntu. Pero con elles axuntábemos el grupín de guaḥes y díbemos a cantar villancicos a les puertes del vecindariu, con un repertorio del que’l tiempu namái me dexó l’alcordanza d’aquel: “nel picu d’aquel monte hai un perru cagando, pa los dueños d’esta casa que nun mos dan aguinaldo”. Pieza que supongo nun cuntaba con más estrofes pues siemprs salíemos d’estampida tres la primer. Ye lo qu’había.

En Cimavilla, el mío barriu segundu, alcuérdome de l’ansiedá de la Nochebona, yá mozucu, pues tres la Misa de Gallu, lo de so yera recorrer en cuadrilla les cases de les moces coetánees, au yéremos gasayaos por unos pais que, supongo, consideraben más prudente y seguru caltenemos al algame del güeyu que nun vagando peles cais d’entoncenes. Un vezu que duldo que’l tiempu tenga caltenío.

Na decoración urbana tampocu m’emociona lo que reparoo. Una abondanza de lluces y colores de toa mena na que l’ausencia de motivos tocantes la Navidá-Natividá del Señor, ye’l llugar común na mayoría de ciudaes d’España, cola esceición, en Xixón, de la Estrellona y el Pesebre lluminosu de San Pedro. Poro en casa esforciamonos en caltener el Belenín, col amestao de los dos guardiaciviles dándo-y seguridá al Neñu, un pocu como la UCO fae con toos nós.

Feliz Navidá

Raúl Suevos

A 19 díes vencíos d’avientu de 2025

Torna en castellán en repdiv.blogspot.com

La matricula AFI

 

Propiamente tendría de falase de placa, o n’italianu targa, esto ye, l’indicador que correspuende a la matricula, y que nesti casu, la placa AFI, paga-y a Allied Forces Italy. Una placa que s’otorgaba a los vehículos militares y los de particulares d’aquellos que, perteneciendo a les Fuercies Aliaes, preferentemente la OTAN, yeren destinaos al país transalpín. L’asuntu nun yera trivial puestu que, polos alcuerdos algamaos al finalizar la Segunda Guerra Mundial, la placa torgaba munchos de los impuestos amestaos al tresporte; un privilexu que revicié demientres un tiempu.

Va yá dellos años que, creyo, desapaecieron por razones de seguridá, pero traigo equí’l conceutu polo d’Aliaos, dalgo que nesti momentu, tres la asoleyadura de la Estratexa de Seguridá Nacional del señor Trump, munchos n’Europa entamen a entrugase si podemos siguir pensando que sigue vixente. Y ello vien de la mano de la llectura del documentu, au atopamos que ye Europa la única parte del mundiu que l’ogru anaranxáu trata con despreciu nidiu y, a la vegada, trata d’amedranar. Una actitú que taría lloñe de lo que s’espera d’un aliáu ¿Non?

Per otra parte, la so inxerencia na política de los países europeos algama el nivel d’impertinencia pola so declaración escrita de sofitu a partíos del estremu del espectru políticu allegaos a la so propia y personalista doctrina. Dalgo, esto cabero, que recuerda espantiblemente a la decisión de la Komintern en 1935, dirixía por Stalin, de crear los Frentes Populares, siguida nel congresu del PCUS pola aceutación de pactos colos partíos burgueses. Unes decisiones que conduxeron a la esclavitú de munchos países europeos demientres un par de xeneraciones. España libróse pel anchor d’un bigotín.

Fala’l documentu trumpianu de falta de llibertá n’Europa, quiciabes la collecha de la qu’andamos más sobraos, xunto col imperiu de la Xusticia, y la llimpieza nes eleiciones, aspeutos nos que, nos tiempos caberos, el gran país americanu paez más carrancu; y nun debiera importar muncho si namái fueran declaraciones del Gil y Gil yanqui, pero esi documentu marca la política del Imperiu, y d’él deduzse que yá nun somos aliaos, más bien debiéramos guetar l’antónimo na ALLA, que mos devuelve los términos d’alversariu o nemigu. Una constatación perdura, pero ye lo qu’hai.

Escosasemos el tiempu a los europeos, con unos líderes mediocres nel puente de mandu pa la nuesa desgracia, y yo concluyo que nesta hora escura la única solución ye la propia Xunión, pero más federal y fuerte, más integrada; y si ficiera falta, más pequeña y decidida.

Raúl Suevos

A 9 díes vencíos d’avientu de 2025

Torna en castellán en repdiv.blogspot.com

Una Constitución coxa

 

Confieso que tenía previsto pasar del tema; pero dempués aporta’l día y resulta poco menos qu’imposible sustrayese a l’ábanu d’aportaciones periodístiques empalagoses, o quiciabes debiera dicir opinionístiques, en toa mena de soporte, prensa escrita, radio, televisión o redes. El día 6 d’avientu suel ser el día en que los españoles, al estilu d’aquel inolvidable mister Wolf de fonderes convicciones filosófiques que creara la maxinación de Quentin Tarantino, mos refalfiamos nes escelencies de la nuesa Constitución.

Lo cierto ye que, si non lo ye yá, va camín de ser la más llonxeva de la nuesa historia constitucional, lo que yá-y da un ciertu nivel y reconocimientu. Tamién cabe empoderar l’altísimu grau d’aceutación qu’algamó cuando los españoles d’entoncenes fumos llamaos a votala en referéndum. Y a nivel institucional nun va nin un mes asistimos a la imposición del Toisón de oro a los dos supervivientes del grupu conocíu como padres de la Constitución, lo cualo amesta un plus a la importancia del documentu y los sos autores. Ye lo qu’hai.

A mín garróme recién llegao al mundiu real, esi nel que se supón que te toca buscate la vida, yá ensin el sofitu de los pás, y, supuestamente adultu. Y anque aquel votu, tremendamente influyíu pol ábanu de comunicación institucional de calter positivu, paecía cantao, anque tevi tiempu y ganes pa lleeme el panfletín que’l gobiernu mos fizo llegar a tolos españoles, y, magar too y acabar votando por ella, nun m’acabó de convencer el Títulu VIII de la Carta. El de la organización del estáu. Esi tan foliáu anguaño.

L’asuntu venía mosqueándome dende l’artículu 2, el que fala de nacionalidaes, y, conociendo a los españoles, en cuantu un d’ellos, paecíame que la solidaridá interrexonal y la igualdá ente españoles que’l títulu VIII proclamaba yera dalgo de mui difícil algame; y el tiempu paez que me dio la razón. Les nueces que’l PNV lleva recoyendo dende va munchos años, y la independencia interruptus de Puigdemont tán ehí p’amuesa y alcordanza costante. El restu de taifes rexonales, ca una al so nivel, siguen el rastru d’estes dos.

Nel planu operativu, nestos tiempos caberos, tengo comprobao tamién que no qu’a control del Executivu la nuesa Constitución tampocu ye a damos rempuesta. Esi Gobiernu, que se supón fiscalizáu pol Llexislativu, lleva yá tres años ensin Presupuestu, el preséu fondamental de gobiernu, y nun pasa un res. Nun esiste mecanismu constitucional que simplemente sirva pa que l’Executivu dé cuenta de la so aición énte los españoles, incluyíos los cambeos unilaterales en política internacional. Preocupante.

Raúl Suevos

A 6 díes vencíos d’avientu de 2025

Warmth is coming

 

La calor t’aportando, en contradicción con aquel “winter is coming” que rexía, penriba de los dragones de Daenerys, tola pernomada serie televisiva Xuegu de Tronos. Nella zarrábase la promesa d’un futuru distópicu pal mundiu, nel que’l fríu glacial diba invadir too, hasta les almes de les persones, convertíes en Caminantes blancos. Afortunadamente la mano vengativa d’Arya Stark algamó a conxurar el maleficiu y enzacar el fin de la humanidá. L’hibiernu nun acabó por llegar.

Nel planu real, aquel territoriu tiñazáu pol friu, au los Caminantes se desenvolvíen, taba allugáu na estraordinaria Islandia, onde se rodaron munchísimes de les escenes de calter invernal y qu’anguaño reciben aínda más visitantes de los que yá atrayíen los sos paisaxes gracies a la celebrada serie televisiva.

Y d’ellí, de la islla norteña, llégame la noticia, non recoyía, creo, polos grandes medios de mases, de que prindaron dellos mosquitos per primer vegada na so historia, lo que tien alarmao descomanadamente a los científicos, pues representa una señal inequívoca, una más, de que la calor ta avanzando, inesorable, y ensin que tengamos a una Arya Stark pa detenelo.

Na mesma noticia comentase que nel condao de Kent, na Gran Bretaña, prindaron exemplares del Aedes Egyptus, y del mosquitu Tigre. El primer vector tresmisor de enfermedaes como’l dengue, el zika o’l chikunguña, por citar dalgunes de les que nesti momentu asuelen la islla de Cuba, meta turística de dalgunos connacionales. mosquitos que, equí n’España, ya lleven un tiempu instalaos.

Hai otru aspeutu d’esi “warmth is coming” que nun debemos dexar de llau, y ye’l de la agricultura, que los sos rendimientos van vese afeutaos col amontar de les temperatures, especialmente nel sur mediterráneu, u yá son mui altes, y nun digamos  n’África, onde la combinación d’esa calor y la inestabilidá política y el terrorismu atópense detrás de les folaes de cayucos y pateres que de forma cotidiana recibimos nes costes de nueso. Ye lo qu’hai.

La calor t’aportando y un de los sos corolarios debiera ser el de la proteición de los nuesos recursos alimenticios, esto ye, de la nuesa agricultura, que ca vegada va facese más fondamental y estratéxica, pero que, en cambiu, por parte de los gobiernos autonómicos, nacional y européu, vése ca día más desasistida, inclusive acosada, con unes polítiques incompresibles -col recién suicidiu paradigmáticu d’un mozu líder agricultor- que n’Asturies articulense  interesadamente en redor de los dictámenes de animalistes y urbanites, abocándonos a situaciones peligroses nun futuru que yá ta llamando a les puertes. 

Raúl Suevos

A 23 díes vencíos d’ochobre de 2025

Torna en castellán en repdiv.blogspot.com

Ucrania, un exemplu pa toos

 

Estos díes fálase muncho de la patria de los cosacos zaporogos, aquellos xinetes indomables qu’escribieran una carta de lleenda al sultán d’Estambul, y qu’agora, al traviés de los sos descendientes siguen dando lleiciones de coraxe al mundiu. Faluquiase darréu a cuenta la capitulación, en forma d’alcuerdos de paz impuestos, que l’ogru anaranxáu de Washington, en conchabanza col sátrapa del Kremlin, pretende imponer al gobiernu lexítimu d’Ucrania.

Los partidarios de Moscú, encabezaos poles esquierdes occidentales autodenominaes progresistes, piden qu’Ucrania aceute la rendición, na que s’incluye eleiciones inmediates col oxetivu de desentamangase de Zelensky. Fácenlo sofitándose nel casu recien de corrupción escubiertu nel senu del gobiernu, y escaeciéndo, interesadamente, que tienen sío la NABU, National Anticorruption Bureau of Ukraine, conxuntamente cola SAPO, Specialized Anticorruption Prosecutor Office, les dos axencies encarregaes de velar pol imperiu de la llei tocantes l’alministración n’Ucrania, los responsables.

A min, lloñe de recriminar a los ucranianos, el cuerpu pídeme aplaudilos, puestu que, va un añu, dende’l gobiernu intentóse disolver dambes axencies, dalgo que les multitudinaries manifestaciones y ello magar los bombardeos rusos, algamaron a paralizar, col resultáu actual del desenmascaramientu de los implicaos, ente ellos el poderosu xefe de gabinete de Zelensky, Yermak, quien, tres la entrada de los investigadores na so casa, y magar nun ser deteníu, tien dimitío y alistao pa dir al frente, en llugar de Soto del Real.

Ucrania nació como país independiente col desmembramientu de la vieya URSS, esto ye, con unos niveles de corrupción descomanaos que necesiten más d’una xeneración pa ser eliminaos. La serie de televisión que ficiera famosu a Zelensky y fondamentó la so eleición como presidente diba d’eso. Una corrupción que la Xunión Europea esixe eliminar pa poder plantegar la so entrada na mesma y que, con esta actuación de les sos axencies principales, independientes del gobiernu, vien a confirmar que sigue la ruta fayadiza, nun momentu, sicasí, nel qu’España tien algamao la fazaña, duldosamente honrosa, d’entrar nel elencu de les quince naciones más corruptes del globu. Ye lo qu’hai.

Zelensky, que tiene per delantre un calvariu aínda por superar no qu’a los rusos se refier, ye’l capitán de guerra d’una nación que combate pola so supervivencia. Ye’l líder que’l so pueblo mayoritariamente tien escoyío, y al que, una vegada algamada la paz y pente medies eleiciones, van tener que refrendar si él decide postulase  otra vegada, mientes tanto toca sofitalu ensin fisures, dalgo que facen los sos compatriotes, y lo que tamién debe facer la Xunión Europea.

Raúl Suevos

A 30 díes vencíos de pallares de 2025

Torna en castellán en repdivblogspot.com

Breakeven pa Rusia

 

Pudiera escribir Puntu d’equilibriu, que ye la torna del anglicismu n’asturianu, pero como la tribuna va de temes petrolíferos, y ehí’l breakeven márcalo y defínlo casi too, paecióme fayaizu caltenelo nel títulu, que queda enmarcáu cola inclusión de Rusia.

El casu ye que, más nel asuntu que mos ocupa, el breakeven ye’l puntu nel que’l preciu de venta del petróleu nun ye interesante; vamos, que puede ser antieconómicu na mayoría de les situaciones, porque esi puntu marquenlu, de forma xenérica, el coste d’estracción del crudu, y el so tresporte hasta’l puntu de venta. A ello, nalgunos casos, cabría xugar col coste de piesllar y dempués reabrir el pozu, munches perres, y que podría llevar a vender per debaxo d’esi breakeven tarrecible.

Nel casu de Rusia esi puntu d’equilibriu tién dío subiendo nos años caberos  debío a les pernomaes sanciones occidentales, pa dalgunos inoperantes, la inflación galopante nel país, y l’avieyamientu de los pozos, lo que, sumao al so reducío cartel de clientes, básicamente China y Rusia, que con les sanciones caberes del ogru anaranxáu de Washington tamién se tienen visto afeutaes, y ufierten precios de compra mui a la baxa, fai que los ingresos malapenes-y dan a Putin pa financiar la so desastrosa invasión de Ucrania.

La conxunción del breakeven, los precios a la baxa, y los guelpes ucranianos a la industria tresformadora y de tresporte de Rusia tán llevando al autócrata de Moscú a un puntu de rotura nel so control del país, que necesita de los sos ingresos pa caltener el coste de la guerra, y, al tiempu, tentar que la xente nun talante escesivamente la pérdida de calidá de vida. Los tiempos estrechense pa Vladimir, y namái la intemperancia y llocura del golfista de Mar-a-Lago van poder enzancar que’l so tingláu se venga abaxo.

Pa rematar l’asuntu, aporten noticies de que’l so “amigu pa siempres”, Xi Jinping, tien-y subío, casi doblao, el preciu del armamentu que magar les sanciones ta suministrando-y, y ye que’l mandarín chinu sabe que la lleña del árbol cayíu nun ye la meyor pero sí la que sal más barata, y no dulden vustedes que’l esbarrumbe rusu, al que dalgunos dan capacidá pa desmembrar la Federación, daría-y a China l’emburrión xeopolíticu definitivu. Más aínda que la ocupación/recuperación de Taiwán.

Ye una cuestión importante lo del breakeven, y a los europeos gárramos, como siempres, de mirandas, ensin más mira que la d’esperar a ver qué migayes mos dexen los leones d’esta selva anguaño. Ye lo qu’hai.

Raúl Suevos

A 25 díes vencíos de pallares de 2025

Torna en castellán en repdiv.blogspot.com

El Siloxismu aristotélicu

 

Una forma de razonamientu deductivu que na mío xeneración yá estudiábemos nel bachilleratu, y qu’albidro qu’a los estudiantes anguaño va zona-yos a chinu mandarín, yera’l que, na so Lóxica, definía’l gran filósofu Aristóteles como Siloxismu. Una estructura compuesta por dos proposiciones nes que s’incluyíen les premises, y una tercer proposición na que se “deducía” la conclusión. Y como exemplu simple podríemos dicir aquello de que: Los mamíferos son animales; el ser humanu ye mamíferu; Entós l’home ye un animal. Y a partir d’equí’l métodu deductivu estructuráu en siloxismos crez imparablemente hasta ser la basa de casi toa clas de razonamientu. Ye lo qu’hai.

Güei llégame la noticia d’un plan de paz ñuevu pa Ucrania auspiciáu pol ogru anaranxáu de Washington. Un Plan que tien sío cocíu ente’l so unvíau, un tal Wilkof, d’antecedentes empresariales como él y ensin dala basa diplomática, y l’unvíau de Putin; esti sí de la vieya escuela soviética rusa y con currículu ampliu. El resultáu, cesión de territorios per parte ucraniana, exercitu diezmáu y práuticamente desarmáu, ausencia de tropes internacionales, y promeses de non intervención n’Ucrania o Europa per parte rusa. Un timu que tien llevao al presidente Zelensky a anular la so presencia n’Estambul, prevista estos díes.

De les “paces” de Trump, más pronto que tarde, nun va quedar un res. Ye un individuu al que la historia va  xulgar con dureza estrema, escaeciendo hipócritamente que tá ehí porque lo votaron una mayoría de norteamericanos, y l’exemplu de la so capacidá diplomática tenemoslu n’Afganistán, au l’aberración social qu’ellí padecen anguaño ye frutu de los alcuerdos por él “algamaos” demientres la so primer presidencia. La so felonía, una vegada más, quedó patente nel so despachu oval mientes la recien visita del sanguinariu príncipe saudita.

Poro, y escaeciendo al métodu deductivu del siloxismu, tienme salío una construcción lóxica que nun sé si munchos van compartir, pero qu’a mín paezme afitada a les circostancies anguaño: Putin ye nemigu d’Europa –como probaría la invasión d’Ucrania, ente otres aiciones-, Trump ye amigu de Putin –como probaría la so actitú anormalmente conciliatoria tocantes l’autócrata rusu- Entós, Trump ye nemigu d’Europa. Acoxonante.

Soi consciente qu’esto ye apurar un tantu’l siloxismu aristotélicu, pero ye lo que me pide’l cuerpu, más pola actitú europea que polos designios, aparentemente desvaríos, del inquilinu temporal de la Casa Blanca. Y ye qu’Europa, como suxetu políticu, quiciabes nun ye consciente de que s’atopa nel momentu más difícil del so periplu vital. Si nun reacciona na dirección adecuada, el sofitu irresolutu a Ucrania, nun puede tener futuru.

Raúl Suevos

Torna en castellán en repdiv.blogspot.com

Cuba, el pozu más fonderu

 

Un de los mayores y aveyuscaos hospitales de La Habana lleva’l nome del doctor Carlos Finlay, el hispano-cubanu qu’escubrió la importancia fondamental del mosquitu, el aedes-egyptus, como vector pa la tresmisión de la fiebre amariella. Una enfermedá que los yanquis, cola so investigación, algamaron a caltener a raya pa terminar la construcción del Canal de Panamá, y qu’en Cuba, previamente, erradicaran en namái siete meses.

Yera una Cuba que salía de la guerra Hispano-americana, pero al tiempu una Cuba disciplinada y con unos niveles de sentíu común, magar l’altu nivel d’analfabetismu, que permitía que les directrices del gobiernu militar yanqui s’aplicaran con prontitú y eficacia. Anguaño, tres 65 años de revolución les coses son abondo estremaes.

La Cuba de güei, fuera de los circuitos informativos dende que desapaeciera’l Comandante, y l’interés temporal d’Obama pasara a meyor vida, nun atrae l’atención de naide, porque yá nun tien un res qu’ofrecer, nin siquier aquella imaxe romántica, cultivada por Castro, de pequeño David caribeñu enfrentáu al Goliat yanqui. Cuba táse morriendo y a nadie-y interesa.

El Trump de la primer presidencia ya pasó, y con él l’interés polos campos de golf, agora l’inquilín de la Casa Blanca tien otros oxetivos familiares, y tamién políticos. Cuba nun tien petróleo pero sí Venezuela, y muncho, tantu como pa causar un terremotu nel mercáu mundial si hubiera un cambéu de gobiernu. Ellí, nes tierres chavistes, la economía ta desfecha pero aínda nun tien aportao’l fame, non como en Cuba.

En Cuba nada funciona. Los huracanes tiénense cebao los años caberos  cola islla pero’l so cáncer llámase castrismu. Nada se produz ellí, nin siquier el míticu azúcar; tampocu lleguen turistes, yá sollertaos sobro la precariedá de los servicios; el centru de la Habana va a esbarrumbe selmanal, colos consiguientes muertos; la población n’edad de trabauar fuye a la carrera del país, especialmente los que cola llei de Ñetos alquieren el pasaporte español; la falta de combustible y la inoperancia de les autoridaes caltienen montañes de basura nes cais habaneres. El periodu especial postsoviéticu yá nun paez tan malo nela alcordanza.

Los mosquitos del doctor Finlay siguen ellí, pero tienen ampliáu’l so repertoriu, el dengue nes sos varies versiones estiendese pela islla, como’l zika, y tamién el chikungunya. A ellos tiénse xunío’l oropuche, otra enfermedá de les llamaes tropicales que, nesti casu, tien al pequeñín mosquitu jenjen como vector principal. Too ye miseria y muerte en Cuba, sacantes pa los xerifaltes del réxime y los sos familiares. Una probitería ensin fondu paez tenese apoderao de la islla. Ye lo qu’hai.

Raúl Suevos

A 19 díes vencíos de pallares de 2025

Torna en castellán en repdiv.blogspot.com

20N, l'alcordanza

 

Ye una d’eses feches que nun se escaecen, especialmente cuando se cumple un cincuentenariu y los medios de comunicación, más alló de les celebraciones interesaes del gobiernu anguaño, somorguiense enforma nes aigues más o menos fonderes de lo que foi la desapaición del xeneral Franco, tres una agonía que namái cabe deseyar a los nemigos más tarrecibles.

A mín l’asuntu garróme trabayando, magar la yá entrada madrugada na qu’aportó la noticia; y ye que taba de tercer imaxinaria na primer compañía de cadetes de l’Academia Xeneral Militar. Un desempeñú qu’a los mozos, güérfanos de la conocencia que daba la Mili desfamada, va sona-yos a Iker Jiménez y el so Cuartu mileniu, y que consistía en velar demientres los demás dormíen. La segunda y la tercer yeren les peores pues partíente la nueche, y a mín, naquella ocasión, namái’l pequeñu transistor –prohibíu- m’ayudaba a nun quedar dormíu.

Nun recuerdo qué taba oyendo pero’l programa cortóse pa dar pasu a la noticia: El caudillu morriera, y yo tenía delantre una papeleta, pues debía avisar al capitán de cuartel, don José de León Quintero, un apreciáu oficial de caballería que dormía nel cuartu a ello dedicao. Fícelo, xusto enantes de que llegara’l mío relevu, y colé a dormir, lo que me costó dellos minutos d’inquietú al entamu, pensando nel arrestu más que posible, pero, al toque de diana decatéme de que’l capitán preparara un discursu curtiu y guapu, que yá nun recuerdo, pero escaeciera entrugame cómo recibiera yo la noticia.

Demientres el día surdió la posibilidá de viaxar a Madrid n’autobús pa rendir honores al xeneral difuntu, lo que más alló de les connotaciones históriques e ideológiques que l’asuntu podía tener, pa nós, mozos aínda por cumplir los veinte años, representaba una oportunidá d’escapar demientres varios díes del control académicu férreu, pues el plan incluyía’l funeral-desfile oficial previstu pal domingu.

Manolín, el mío collaciu y vieyu amigu, y yo, axuntámonos a la operación –él contaba cola so casa familiar na capital- con afanes estremaos, pues él siempres tien sío más senciosu. Llegaos ellí, averaos al Palaciu Real, y con una cola descomanda na que distinguimos, ente otros, y que yo recuerde agora, a Raphael y la mujer, y dellos xenerales uniformaos cola familia, formamos una sección y desfilamos haza la entrada, enfundaos nos nuesos capotes d’hibiernu; y llegaos ellí, el reguiletu sarxentu galonista cuadróse énte l’oficial de puertes y: “presentense los cadetes pa rendir honores al caudillu”, y poles mesmes saltamos el riu humanu tremendu que intentaba entrar ellí.

Tres d’ello fuimonos a dormir, y el 23 aínda tuvimos tiempu p’asistir al desfile funeral deede la cai Bailen, con cayída de xinete y posterior caballu desbocáu énte nós. pa enteranos dempués que los informadores dicían que yera el del difuntu. Un fin de semana inolvidable pa unos mozucos cadetes que yá perdieron l’alcordanza de ónde pasaron la parte central de l’aventura. Ye lo qu’hai.

Raúl Suevos

A 19 díes vencíos de pallares de 2025

Torna en castellán en repdiv.blogspot.com

Plasmu y'ablayadura

 

Cabría añeder tamién l’allorie, o’l tiemblu y la sorpresa. Toos ellos son sustantivos que sirven pa reflexar l’estáu d’ánimu qu’a unu-y queda énte una noticia rompedora; una d’eses que te dexen ensin asolladura, o col pulsu cardíacu desatáu. Más o menos como me tengo quedao esta mañana cuando conocí’l paecer del Abogáu xeneral del Tribunal de la Xunión Europea, esi llamáu a dictaminar si, acordies colos Trataos, la amnistía otorgada pol gobiernu d’España a los golpistas catalanes yera llegal o non.

Al paecer, según dicen los noticiarios, l’Abogáu nun atopa un res qu’atente escontra los caudales de la Xunión, dalgo primordial nestos asuntos, lo cualo tien una cierta lóxica si tenemos en cuenta que ye eso, según siempres se tien dicho, lo que más preocupa a la conocía como Europa de los mercaderes. Pero esiste un segundu aspeutu.

falamos agora de terrorismu, esi delitu mayor pol que foron imputaos, y dempués amnistiaos, un grupu de descerebraos que pretendíen atentar de formes estremaes, ente elles con una aición na propia Asambleya catalana, y que foron deteníos polos servicios d’información de la Guardia Civil en Cataluña, y que, según esti Abogáu del Tribunal de la Xunión, tamién tán bien amnistiaos, magar que los Trataos nun lo contemplen, porque ello ficiérase col enfutu de la reconciliación nes tierres natales del Conde de Reus.  

Ye equí au’l mío natural tranquilo se tien conmocionao porque, nun pudiendo entrar en disquisiciones económico-llegales que nun domino, sí que me permito encabroname énte’l desconocimientu manifiestu del conceutu reconciliación aplicao a los españoles, y particularmente a los catalanes –españoles que viven a la vera del Mediterráneo, en definición de Salvador de Madariaga- qu’amuesa esi señor de identidá desconocía pero de títulu menaciante. Nun tien ni puta idea’l talu Abogáu.

Nun esiste tala reconciliación en Cataluña, tampocu nel País Vascu, anque esa ye otra historia, pero, nel casu de los CDR nun puedo dexar de pensar nesos guardiaciviles que dedicaron más d’un añu, siete días a la selmana, veinticuatro hores al día, para prevenir l’aición de los terroristes, pa ver cómo éstos nun llegaben nin siquier a ser xulgaos, y sí en cambiu ellos, acusaos de malos tratos y tortures, y teniendo que pagar del so bolsiellu un abogáu que los defendiera énte l’Audiencia de Barcelona. Ye lo que hai.

Plasmu y ablayadura ye poco. Son sustantivos pocu aptos pa dexar sobro blanco, por aquello de la indignación, pero, aquellos que dulden sobro ésta nuesa Europa, güei van atopar motivos pal so descreimientu.

Raúl Suevos

A 13 díes vencíos de pallares de 2025