Virus y negociu

Roberto Saviano ye un escritor y periodista italianu que lleva yá dellos años viviendo con escolta policial, esactamente dende qu’escribiera la novela-ensayu Gomorra, después premiada película y más tarde seguidísima serie televisiva, ésta cabera mui encamendable pa estos díes de confinamientu. Na obra Saviano cuéntamos una hestoria d’hestorias centrada nuna familia de la Camorra napolitana, del barriu de Scampería, que los sos famosos edificios de viviendes, les Veles, taben siendo demolíos cuando la epidemia españó.

Va un par de díes, en La Repubblica, el diariu italianu, esplicaba como la mafia, al contrario que munchos gobiernos que conocemos, trabaya siempres per delantre; fai prospectiva de negociu y muévese en clave internacional. Per otra parte, les meyores nel control de capitales va tiempu que los obligare a llavar el so dineru de la suciedá del so orixe y poro tienen diversificao’l so negociu, entrando asolapadamente nes grandes corporaciones.

Estos díes asistimos al paraxismu de les compres febriles de material sanitariu, mascares, bates, guantes, ventiladores, etc. en tolos llugares del mundu u se pueda algamar; y en munchos desos llugares enteramonos de que se rompen tratos y hai cargamentos que cambien de destín nel últimu minutu. Movimientos llamativos que requieren de contactos y dineru, los dos elementos que meyor conocen eses organizaciones que se mueven na parte oscura de la sociedá. ¿Llegaremos a enteramos de lo que hai detrás?

Agora, paez ser, entramos na segunda fase, melecines y vacunes. Ente les primeres yá mos familiarizamos cola Cloroquina y la Hidroxicloroquina; toos les gueten, y arralecen, y el so preciu dispárase mientres crez el númberu de los dispuestos –gobiernos incluyíos- a pagar lo que faiga falta. Situación ideal pa negocios de perfiles indefinios; tres d’elles va aportar la fase de la falsificación, na que ye probable que yá mos atopemos; y cuando superemos esti periodu, y apareza’l primer ensayu esitosu, vamos entrar na batalla de les vacunes, que van ser forciosamente escases al entamu. Tiempos gloriosos pa delincuentes con organización y previsión y tiempos tamién pa que les fuercies de la llei tean atentes.

Equí n’España les cosas paecen menos industriales, más pedestres, más d’andar per casa. Los camellos adáptense y queden nos supermercaos, llugares fuera de sospecha, nuna esquina del fondu, a ser posible con ángulu muertu de les cámares y ensin importar-yos si nel estante u se intercambia la bellota polos euros s’esponen compreses o leche desnatada; o amarutense de repartidores p’apurriteles a casa. Lo importante ye’l negociu, tanto que, pa caltenelo furrulando, los bonos xefes preocupense pola salú de los sos subordinaos, anque seyan fuera de la llei, y asina vemos a esos acarretadores de los fardos de hachis dende la lancha na sablera que van toos equipaos de mascara y guantes, non como los nuesos desamparaos sanitarios. País.

Raúl Suevos

A 3 díes vencíos d’abril de 2020

Torna al castellánen repdiv.blogspot.com