Lapsus linguae

Creo que foi nel llonxanu 1983 cuando’l ministru Serra traxo de Barcelona a Lluis Reverter pa crear la DRISDE, Direición Xeneral de Rellaciones Informatives y Sociales de la Defensa; con ella’l mundu militar entraba, suponíase, nel ámbitu de los medios de comunicación pública del que tradicionalmente s’había caltenío lloñe.

La realidá de toos estos años ye que se crearon les estructures pero nun se consiguió desendolcar una auténtica cultura de comunicación ente los cuadros de mandu. El ministeriu, o quienes lo dirixieron, primó la comunicación del ministru sobro la de la institución. El resultáu de tantos años d’esta política foi un distanciamientu, iñerizu, o inclusive medrana de los xefes énte la prensa, especialmente si se trata de comparecencies públiques.

Na Guardia Civil les coses marcharon pareyes anque nos tiempos caberos aprecióse una mayor actividá institucional, sobremanera pente medies de vídeos sobro operaciones, ya inclusive se llegó a introducir daqué semeyante a la figura del Community manager pa intentar averar la imaxe del Cuerpu a los usuarios de les redes.

Güei asistimos a un desos momentos pa escaecer, y tamién quiciabes pa pensar na posibilidá d’incluyir práutiques d’interacción cola prensa nel cursu d’ascensu a xeneral, nos qu’una frase desafortunada –en qué taría pensando’l protagonista- provocó una crisis política, ferviendo a tou vapor nesti momentu, que va servir pa qu’unos y otros allancien entá más fumu, o tierra, sobro’l más problemáticu y costosu asuntu de los muertos por coronavirus.

La Guardia Civil, diga lo que diga un aturulláu xeneral, namái actúa énte los ilícitos penales; nun trabaya pa minimizar el desgaste de dalu gobiernu, y failo magar la insuficiencia de materiales de proteición escontra’l virus, pesie a los muertos y pesie a los políticos, toos, los mesmos que, con independencia de la so color, van aprovechar un lapsus d’un prominente xeneral pa llanciase sobro’l Cuerpu, escaeciendo, otra vegada, los sacrificios de los más de cien mil miembros de la Guardia Civil y les sos families; tamién les sos families porque na Benemérita too se lleva en familia.  

Constame que nesti momentu la Guardia Civil ta doliente, pol lapsus y pola interesada indignación de dalgunos, pero tamién qu’esta nueche, y mañana, y tolos mañanas que van venir, seguirán saliendo a cumplir col so deber, dándolo too pola patria, ensin preocupase porl qué van dicir, dalgunos.

Raúl Suevos

A 19 díes vencíos d’abril de 2020

Torna en castellán en repdiv.blogspot.com