Ceriñola

Güei, 28 d’abril, cúmplense quinientos y pico años de la batalla de Ceriñola y, posiblemente, de la entrada na historia militar universal de Gonzalo Fernández de Córdoba, el Gran Capitán, anque si se gueta la referencia nos grandes tratadistes anglosaxones poca alusión s’atopa; supongo que se debe a que la mayoría son unos fios de la Gran Bretaña y a qu’ellos lleven escribiendo la historia mientres los doscientos años caberos, quiciabes más.

Ceriñola representa un cambéu fulminante nel paradigma militar, el final de la caballería pesada y noble, del arte militar francés, pola humilde infantería de los tercios españoles. Esto duraría hasta Rocroi, cuando los franceses nos dieron pal pelo ciento cincuenta años más tarde. Pero esa ye otra historia.

Los franceses, que señoreaben la Campania y Nápoles, rompieran el pactu firmáu poles corones respeutives y el Gran Capitán, n’inferioridá, tuvo qu’espabilase y en rapidísimu movimientu ocupó la villa, de siguío fortificó’l tarrén con fosos, trincheres y estacaes que conduciríen y frenaríen al enemigu para batilos con los fueos de la infantería; a lo último’l choque d’infantes y xinetes acabaríen dando la victoria en menos de dos hores y con ella l’entamu de la retirada francesa de tierres italianes.

Na Academia Xeneral Militar, au na mio dómina se vivíen los primeros años de la vida militar de los oficiales, encuadrábemonos por seiciones de clas que formaben tamién les de la instrucción de combate. Yera cada añu una esperiencia de convivencia estrema que forma amistaes y entendimientos pa una vida. En tercer cursu, caberu enantes del ascensu a alférez, tocóme la Ceriñola.

Yera esta l’aula númberu 17, la cabera d’un llargu pasiellu nel que pola su ubicación yéramos agraciaos con un escasu númberu de visites per parte de los capitanes profesores mientres les tardes d’estudiu, lo que nun dexaba de ser una suerte. Nel interior, na pared llateral taba’l mosaicu d’azulexos, Ceriñola 1503, y baxo l’artículu de les Reales ordenances de Carlos III y que les de Xuan Carlos I dexaron tal cual, “el que tuviere orden de conservar el so puestu a toa costa, lo fará” ¡Cuantes discusiones xuveniles sobro la correuta ubicación de la coma¡, ¡detrás d’él tán Baler, Toledo, Santa María de la Cabeza y tantos otros¡

En primavera desplazamonos a la Sierra d’Albarracín pa los exercicios añales de guerrilles nes que a los del nuesu cursu tocabanos el papel d’enemigu pa que los de cuartu cursu nos solmenasen, razón pola que voi resalvar les belleces de la Sierra que por sí sola merez un llibru enteru. Al rematar la penuria de les dos selmanes concentramonos en Teruel y diósenos la tarde del domingu llibre enantes d’embarcar pa Zaragoza. El centru acabó siendo peligrosu pola presión de los profesores y un grupín, dirixíu por un líder xenial que se mos foi mui mozu, acabemos nel llocal del Partíu Comunista de Teruel. La rúbrica final, tres los cubatas y ente abrazos y xuramentos d’amistá eterna, foi’l cantu del Himnu d’Infantería –ellos sabíenlo- y la Internacional. Un vieyu militante, emocionáu, comentónos que nunca maxinare tal escena con unos futuros oficiales del Exércitu. Nós nun tábemos emocionaos, más bien perxudicaos, pero ye verdá que tábemos énte l’alborecer del Exércitu anguaño.

Felíz xornada de Ceriñola.

Raúl Suevos

A 28 díes vencíos d’abril de 2020

Torna en castellán en repdiv.blogspot.com