Diversiones

Karl Von Clausewitz fo un importante militar prusianu nacíu a la fin del S. XVIII; participó como alversariu na mayoría de les grandes campañes centroeuropees de Napoleón y a la so muerte, frutu d’una epidemia, nesti casu de cólera, los sos escritos foron asoleyaos pola so viuda nuna gran obra que s’estudia nes academies militares de tol mundu dende entós, “De la Guerra” ye’l so títulu y dicen que Lenin yera un de los sos mayores almiradores.

Hai un capítulu al que’l gran teóricu tituló como “Diversiones”: Maniobres d’atacadura a una parte del territoriu enemigu col oxetivu de face-y restar unidaes del esfuerciu principal. Esto ye, que si mos tán apertando pola drecha nós vamos dar un guelpe na esquierda p’asina evitar l’afuegu. Comenta tamién que hai qu’escoyer bien l’oxetivu pa que si nun consiguimos distrayelu, al enemigu, a lo menos que la diversión mos rinda beneficios; d’onde podemos deducir que nun hai qu’elexílu a lo llixero, hai que meditalo concienciudamente porque, nel peor de los casos, pue suponer una victoria, anque seya parcial.

Estos díes, como na frontera polaca de 1820 u Clausewitz combatía per última vegada, una epidemia sopelexa’l mundu y tamién hai exércitos, nesti casu de políticos, que necesiten llevar a cabu maniobres de diversión que llogren afloxar la presión que sienten sobro la so aición de gobiernu. Nel casu del de nueso, el que preside’l doctor Sánchez, la prensa d’un llau –non toa, nin muncho menos-, la oposición política dotru –mediu agachupada pola apelación a la xunión énte l’adversidá- pero sobre too la presión de los milenta muertos y les noticies de falta de previsión enantes y ausencia de direición mientres, danmos la imaxe d’un exércitu arrequexáu énte la presión de fuercies que paez incapaz de combatir.

La maniobra de diversión vien en forma d’interesada y nun esplicada apelación a unos Pactos de la Moncloa nuevos; insinuación que a la ciudadanía de cierta edá, la perteneciente a esos percentiles nos que’l coronavirus se ceba especialmente, nun pue sinon sona-yos a tomadura de pelo o insultu a la memoria daquellos políticos que llevaron a cabu la Transición política española, esa mesma que la mayoría del gobiernu socio-comunista desfamaba hasta va unos díes. Sólo fo un comentariu pero yá sirve pa que prensa y oposición dediquen-y tiempu y declaraciones. Yá s’algamó un primer oxetivu, quitar la vista, anque seya parcialmente, de les caxes de los muertos.

Per otra parte, si la presión de les plataformes de comunicación, especialmente eses qu’acaben de recibir 15M € de sovención gubernamental, lleva a la oposición a aceutar dalgún tipu d’alcuerdu mínimamente constructivu, que mos aide a amenorgar de dalguna miente les feríes que’l coronavirus va inflixir al texíu económicu de la nación, entós va ser el momentu de que’l gobiernu reivindique tamién como un gran ésitu la maniobra de diversión.

¿Lleeríen a Clausewitz?

Raúl Suevos

A 6 díes vencíos d’abril de 2020

Torna en castellán en repdiv.blogspot.com