Venezuela tien dende la so nacencia mesma una llarga historia
de caudiellos militares. Bolívar, qu’encimenta la so trayeutoria na traición a Francisco
Miranda y la Guerra a muerte al español, yá dexara ver les sos idees totalitaries
nos sos proyeutos de constitución pa la Gran Colombia, Perú y Bolivia, nos que
se reservaba la presidencia vitalicia. Depués d’él vendríen una llarga serie d’espadones,
quedando namái pal gobiernu civil una curtia dómina na segunda parte del sieglu
XX.
Hugo Chávez Frías aporta al poder ganando unes elleiciones llibres,
depués de ser amnistiáu –grave erru- tres un intentu de guelpe d’estáu previu,
y en cuanto s’asitia nel Palaciu de Miraflores entama la tresformación
política del país camudando la Constitución y aniciando una llarga serie de
victories eleutorales, yá de más que duldosa llimpieza, que-y sirven pa
crear, col petróleu poles nubes y el apadrinamientu políticu de Fidel Castro,
el bolivarianismu, tamién conocíu como socialismu del sieglu XXI. Una versión caribeña del totalitarismu marxista.
El totalitarismu ye un sistema qu’axunta tolos poderes baxo
la tutela d’un partíu políticu o caudiellu, güeyar Cuba, controlando tamién les
rellaciones sociales per medio la ideoloxía oficial, que pue ser cualquiera.
Nel casu bolivarianu munchos foron los esfuercios del chavismu p’algamalo y si
nun lo consiguieron nun fo pola emigración de millones de venezolanos, la
miseria económica del país y la persecución de cualquier tipu d’oposición.
¿Cómo se llogra dende la democracia? Pente medies un procesu
progresivu d’anulación o subordinación de los poderes del estáu. L’executivu
pertenez-y por definición; al llexislativu, si nun se cuenta con votos abondos,
torgase-y llexislar y controlar al executivu; nel xudicial vanse allugando
xueces afines nunos casos y amenaciaselos notros; al cuartu poder, la prensa, acosasela o compra hasta sometela y, al quintu, l’Exercitu, asociaselu al
poder hasta convertilu en cómplice; a lo último, a les mases populares seduceseles
con subsidios qu’ellí nomen misiones. El resultáu de too esto ye la destrucción
y ruina del estáu y la conversión del sistema
políticu en simple tiranía.
N’España tenemos agora un gobiernu sociocomunista con
miembros qu’en munches oportunidaes manifestaron la so almiración por Hugo
Chávez o Fidel Castro lo que debiera ser motivu de preocupación y vixilancia en
rellación cola posibilidá de que quisieren emular los sos referentes. Anguaño,
por exemplu, y amparándose nel estáu d’alarma, tenemos un Congresu baxo mínimos
que nin llexisla nin controla al Executivu; no xudicial, siempres dependiente
d’una reforma que-y dé esa teórica independencia, descubrimos que Dolores
Delgado trabaya pa dar-y la responsabilidá de les investigaciones a los “independientes”
fiscales en desterciu de los xueces ¡Bien!; la prensa nun taba pero, depués de
les sovenciones del gobiernu, tampoco se la espera y, a lo último, quédamos
l’Exércitu que, Deo gratias, ye un exércitu européu, modernu, apolíticu y
conducente –aínda lo sedría más si contara con presupuestos afayizos- que,
conforme a lo que marca la Constitución ta amosando a la ciudadanía qu’ehí ta
cuando hai necesidá d’él; la cuestión de les mases entama a acolumbrase cola
anuncia d’una viniente renta mínima vital.
Quiciabes habría qu’abrir un observatoriu bolivarianu n'España. Nunca
se sabe.
Raúl Suevos
A 16 díes vencíos d'abril de 2020
Torna en castellán en repdiv.blogspot.com
No comments:
Post a Comment