Trileros

Dicen-yos trileros a los individuos que lleven a cabu’l xuegu del tril en cualquiera esquina allegada y poco vixilada de les nueses ciudaes; ye toa una tradición na picaresca española y consiste en tres vasinos de plásticu o medies cáscares baxo les que s’esconde una bolina de cualquier material, inclusive de papel, que l“artista” cambia de llugar con velocidá ablucante; el xuegu consiste n’acertar y les apuestes van depender del ambiente de la timba.

La clave de la estafa ta nel fechu de que la bolina fúrtiase mientres el movimientu de forma que’l “pringao” sólo acierta nos primeros quites, siendo estafáu siempres a la fin del xuegu. L’equipu fórmalu’l que mueve los copos y un númberu variable de ganchos qu’animen a los pichones afayadizos a entrar nel xuegu y, de xacíu, completen el cuadru estos caberos, los cándidos que se van dexar los sos dineros nes apuestes. Magar la so antigüedá sigue teniendo ésitu y la xente sigue cayendo na trampa del xuegu de manos.

A los españoles, con esto del coronavirus, metiéromos nel xuegu del tril ensin nin siquier averamos. Nun hai forma de saber au s’atopa la bolina, escamotiémola costantemente y témome que, cuando esto pase, nin la Guardia Civil va ser a atopala. De xacíu, la bolina ye la información sobro’l covid; que al entamu nun yera más que una gripe un pocu fuerte; que depués nun necesitaba mázcara, más tarde sí y agora depende.

Los muertos son duldosos, unos díes más, otros camudase’l sistema de contéu, los franceses contaben mal, agora resulta que nós tamién, en Nueva York vense foses comunes, equí los ataúdes son secretu d’estáu, pero siguimos siendo campeones mundiales en muertos por millón aínda con cifres duldoses. Too ye barullu tocantes la información rellativa al casu, y, nel cuelmu’l tracamundiu una axencia gubernamental llanza un globu sonda sobro la posibilidad de dexar namái la información oficial ¿Y nun produz escupuliciu!

La función de ganchu nesta estafa con drama paez corresponde-y a la prensa, que a nivel empresarial defininese cola sovención estatal recibida, como en Venezuela, y a nivel individual coles ausencies na llista del manifiestu de periodistes escontra les ruedes de prensa dirixies, grandes nomes de grandes cabeceres. Ye la prensa la que se esfuercia por amosar ya interpretar datos positivos cada día, acoyendo ensin rechistar les promeses pa “los próximos días” de los portavoces del gobiernu. ¿Au quedaron los traxes de lutu?

Queden como broche caberu les denuncies del PSOE y Podemos escontra VOX por, supuestamente, la difusión de bolos nes redes, asuntu que, con independencia de les bases de les mesmes, nun creo que tengan muncho percorríu xudicial, anque cola independiente fiscal xeneral nunca se sabe. Si que va quedar posu tocantes la intención d’amedranar a un rival políticu cola desfamada xudicialización de la política, la mesma qu’ellos mesmos condergaben nun va muncho.

A lo último namái queda recordar a los otros protagonistes, los pardillos, nós, la ciudadanía intoxicada y adormecida por informaciones parciales o interesaes, si non simplemente manipulaes. Y el que mueve los copos con la bolina sigue allantándose en pantalla cada fin de selmana ¡Qué barbaridá! Quiciabes, en llugar d’eurobonos debieremos temer que mos espulsen d’Europa, por inútiles.

Raúl Suevos

A 18 díes vencíos d’abril de 2020

Torna en castellán en repdiv.blogspot.com