Salú y república

Tamos d’aniversariu y dalgún indocumentáu, como esi Garzón que tan ceo se pasó al traxe y la corbata gubernamental, llanzóse a recordar la efeméride de la nacencia de la República con esi salú requisáu a los anarquistes. Quiciabes fuere meyor recordar a los fallecíos del día pero supongo que querría emular al so xefe ideolóxicu, l’indignáu de Galapagar.

Ye llamativo qu’estos sociocomunistes gubernamentales s’arriesguen a recordamos según qué coses. A esa mesma República intentaron cargásela n’ochobre del 34 con una revolución que regó con sangre y destrucción Uviéu y les Cuénques mineres, vivencies positives namái pa señardosos del soviet; acontecimientos que quitaron a comunistes y socialistes el drechu a condergar l’Alzamientu del Xeneral Mola nel 36, por más que’l rellatu anguaño intente resalvalo.

Son los socialistes los que más tendrían d’estudiar aquellos fechos. Largo Caballero lideró colos comunistes dos gobiernos; atábenlu en curtio los comunistes que contaben col armamentu y asesores militares llegaos de Rusia, estos acabaríen cuasi toos fusilaos en Moscú al so regresu, sacantes Orlov que polos pelos s’escapó y camufló demientres años nos Estaos Xuníos. El coste desi sofitu pagólu Negrín, ministru de facienda, col oru qu’unvió a Stalin ensin conocencia d’Azaña nin de Largo Caballero, daqué normal ente esa clas de caballeros.

Pal 37 Largo yá estorbaba y los rusos maniobraron pa allugar a Negrín, del que aínda güei nun se sabe si diba o si tornaba. Enantes desendolcaron la gran purga de anarquistes y, sobretoo, los trostkistes del POUM, el Partíu Obreru d’Unificación marxista. Puese falar de masacre ensin esaxerar, y de les peores, de les que se producen na oscuridá de les cárceles que nunca esistieron, nes cheques de Barcelona. Cuando finó’l branu yá nun quedaba rastru de revolución n’España, les necesidaes de Stalin yeren la doctrina del gobiernu.

Los neoestalinistes de nueso puxen otra vegada por manexar al Largo Caballero d’anguaño, a esi doctor Sánchez de convencimientos fonderos, y como güei la guerra se fai a guelpe de titulares el ximelgador de la Complutense necesita escaparate pa vender el so productu a los sos sectarios prosélitos, que non correlixonarios. Como la renta vital mínima nun acaba de salir como él quier, con ella desapaecería gran parte del trabayu asalariáu del agru español, y el ministru Escrivá resistese cualu coronel Moscardó, hai que guetar otru reclamu.

Esta vegada, una más, tocó-y al Rei. La babayada de güei, nun merez otru calificativu, encuadrase nesi permanente falsu asediu a la institución monárquica que nun tien a ésta como oxetivu sinon al  propiu Sánchez, que se ve na disposición d’una y otra vegada facer de don Tancredu y aguantar la indignación de la oposición nel Congresu y de la mayoría de la ciudadanía nel so fueru internu. La Corona defiéndela la Constitución y l’Exércitu, afortunadamente, nun ye’l d’una república popular sinon el del Reinu d’España.

Raúl Suevos

A 14 díes vencíos d’abril de 2020

Torna en castellán en repdiv.blogspot.com