Atenes, la peste y Pericles

Nel añu 431 enantes de Cristo Atenes atopabase nel so segundu añu de la Guerra del Peloponesu colos espartanos. L’añu anterior, Pericles, el dirixente ateniense, convenciera a los sos conciudadanos pa nun aceutar les condiciones espartanes pa una paz deshonrosa. La ciudá recuperarase y reconstruyerase depués de les destrucciones de los perses y apuntaba a mayores llogros como potencia marítima.

Cola guerra aportaron les primeres muertes lo que dio llugar a que Pericles pronunciara la famosa Oración fúnebre na que describe con tal claridá y fondura’l conceutu de democracia que güei síguese estudiando nes facultaes de Ciencies Polítiques. La presión espartana llevó a milenta persones a refuxase na ciudá y col bon tiempu españó la peste dientro los muros.

Cuenta Tucidides, que fo un de los contaxaos, que s’anició n’Etiopia, anque teniendo en cuenta los tráficos marítimos d’entós ye probable que llegare en barcu dende oriente; el casu ye qu’en barcu o en camellu descendió pol Nilu pa depués cruzar haza Palestina y Asía Menor, pa atracar nel puertu d’Atenes en un de los munchos barcos mercantes.

Los mélicos nun sabíen cómo tratala y diben cayendo un tres otru al visitar los enfermos ¿Suénavos? tamién cayíen familiares y amigos. La morrina yera tala que faltaba madera pa quemar los calabres y multiplicabense los que se enterraben en ca tumba. Pero la peste pasó y Pericles, otra vegada, faló-yos a los sos conciudadanos yá dispuestos a rendise a Esparta. Apeló al espíritu de la ciudá y de los sos compatriotas, a la necesidá de sacrificase y al convencimientu de que depués vendríen tiempos meyores y Atenas reñacería. Habría qu’esperar al “Sangre, sudor y llárimes” de Churchil para otru semeyante.

Pero claro, yera Pericles, y nós tenemos al doctor Sánchez. La domina de gobiernu daquel conozse como’l Sieglu de Pericles y carauterizóse pola peracertada seleición de los homes que lu secundaben a él como estratega y por ser el periodu cume de la lliteratura, escultura y arquitectura griegues. Él tamién sufriría los efeutos de la peste y anque sobrevivió faríalo por pocu tiempu.

Vemos que lo fundamental en tiempos d’afliximientu ye’l liderazgu, esi del que tamos tan escasos nestos momentos, esi que ye a dar órdenes precises a unos llugartenientes elexíos con cuidau esquisitu en función del so valir personal y conocencia, esi que cuando se dirixe a la ciudadanía failo pa ofrece-y esperanza y non allories, que mide les sos pallabres pa que l’oyente nun se pierda nelles. Los líderes atenienses formabense nes escueles d’Atenes y forxabense na toma de decisiones del campu de batalla y cuando l’Asambleya elexía los sos estrategos podíen enquivocase pero a lo menos yeren líderes contrastaos. Comparái.   

Raúl Suevos

A 30 díes vencíos d’abril de 2020

Torna en castellán en repdiv.blogspot.com