¿Cume volcánica o balcánica?

Celebrase güei 6 de mayu una cume telemática ente los líderes europeos y los de los países balcánicos, incluyíu Kosovo, país al qu’España nun reconoz, y creo que fundadamente, y motivu pol cualu yá-y somenaron en redes y prensa al doctor Sánchez. Supongo qu’esto forma parte de la política interna anque realmente poco importa pa lo que se xuega na citada cume.

La mio rellación con esa rexón vien sofitada en dos misiones, en Bosnia i Herzegovina en 1995 y en Kosovo nel 2001. En dambes misiones el mio trabayu tenía que ver cola información y colos asuntos civiles, razón pola cuala vime obligáu a documentame tolo que por aquel entós se podía pa tratar de facer lo meyor posible la mio xera. La esperiencia nun me convirtió nun espertu pero permiteme escribir sobro’l asuntu ensin correr el riesgu de cayer na fatada.

Los Balcanes tán marcaos históricamente pola ocupación turca mientres sieglos; los suficientes como pa qu’esistan rexones nes cuales la relixón musulmana ye la mayoritaria, notres la cristiano-ortodoxa y finalmente, anque menos representativa, la católica. Toos ellos, sacante kosovares y albaneses, son más bien eslavos, grandes como armarios ellos y elles, y de facciones anguloses. Pa intentar entender aquella sangría de guerres balcániques, cuasi una por xeneración, sofiteme en Un puente sobre el Drina, de Ivo Andric y tamién carta a un amigo, escrita por Andric cuando se autodesterraba de Saraxevo. Pieces dambes mui dures pero qu’ayudaben a entrar nel fondu del asuntu de forma rápida.

Depués aporté a Balkan Ghosts, la obra de Robert Kaplan que munchos dicen que foi determinante pa que Clinton, xunto colos conseyos de Richard Holbrooke, tomase la decisión d’intervenir en Bosnia poniendo asina términu a la ineficaz intervención de NNUU. Ye esta, quiciabes, la que meyor amuesa’l horror de tol conxuntu balcánicu, incluyendo Rumanía y Bulgaria. Una sangrienta ya interminable historia de masacres cometios especialmente sobro la población civil y na que les guerres mundiales solo supunxeron dos capítulos del mesmu drama.

La guerra cabera tuvo protagonistes qu’acabaron nel Tribunal de La Haya, non toos, puesto que les responsabilidaes polítiques, como’l prematuru reconocimientu de les católiques Croacia ya Eslovenia per parte d’Alemaña y el Vaticanu, por exemplu y ente otres, quedaron como simples anotaciones históriques. Dende entós Europa tien invertío descomanaes cantidaes de dinero pero nunca llegó a implicase al cien por cien. Ye daqué paecio a lo de Turquía, Europa nun acaba de tenelo claro. Falamos y sovencionamos pero nunca paez aclarase’l camín abondo como pa ver l’ingresu n’Europa a la fin del túnel.

Nun paez qu’Europa tea güei nel so meyor momentu. Brexit, autoritarismu en Polonia y Hungría son indicadores nidios de la situación pero, mientes pasa’l tiempu, otros axentes se interesen polos Balcanes; la antigua potencia Turquía la primera, pero tamién la siempre inquieta Rusia de Putin y, cómo non, la superpotencia China tamién amuesa la patina per debaxo la puerta. Toos esperen a ver qué fai Europa y van actuar en consecuencia. Pa Europa ye tiempu de decidir, y nun tamos na meyor situación.

Raúl Suevos

A 6 diés vencíos de mayu de 2020