Achique d'espacios

La pallabrería arxentina va tiempu qu’algamó’l primáu mundial; los italianos, que siempres llevaron fama, anguaño namái dominen la xesticulación; dambos, los europeos y los sudamericanos, amen igualmente’l futbol que, en tiempos meyores, llegaron a dominar. Foi n’Arxentina au emtamaron a usar con gran eficacia y poca elegancia la riegla del fuera xuegu, convirtiendo esti trucu nuna nueva táctica.

Cuando tala táctica pasó a tar mal vista, un artista de llingua cultivada a orielles del riu Paraná, Cesar Luis Menoti, tráxola a Europa, y camudó-y la denomación pol Achique d’espacios, el mesmu can con collar nuevu y más elegante pero que siguía dando mordigaños a la deportividá,  aquella que l’esporpolle de la parte económica del futbol diba dexando pol camín. Ehí siguimos.

Nel campu la política ye fácil alcontrar semeyances coles táctiques futbolístiques. Esta selmana vióse como se busca dexar ensin espaciu a esi xugador de nome Ciudadanos. Trata de guetar el so llugar natural pero nun-y dexen. Na temporada anterior marchó demasiáu a la banda drecha, lo que-y costó perder por goliada y agora, cuando pretende recuperar la posición, entren-y duro dende la drecha, anque na esquina catalana llancense direutamente al todiellu. Delantre tien el mayor peligru pues anque güei-y dexen mover un poco la bola nun van duldar en facelu fuera xuegu en cuanto se descuide.

Tienlo duro Inés Arrimadas. Ella representa, una vegada recuperáu l’espaciu natural, la tercera España, aquella de Salvador de Madariaga, la posibilista, la nacida pa ser enllaz ente los dos polos, les dos Españes de Machado. Ciudadanos tien la función, imprescindible nun país como España nel que se pasa ensin pausa de la polarización a la crispación, de trayer a la fuercia mayoritaria en cada momentu haza posiciones menos radicales, dende’l puntu de vista contrariu. Creo qu’ensin xuegu pol centru ye difícil algamar un xuegu harmoniosu y, sobre too, conducente.

Nos años caberos, pa munchos dende la llegada de Zapatero al poder, nun vimos nel país de nueso desendolcar dala política d’algame, esto ye, que cuente con sofitos suficientes como pa durar nel tiempu y, a lo menos, permitir comprobar si foi acertada o non. fómonos avezando a que con ca cambiu de partíu de gobiernu se llexisle principalmente p’anular lo realizao pol anterior y vieyu adversariu. Solo dura lo que vien impuestu pola llexislación europea, y neso siguimos.

Güei los agoreros vaticinen la desapaición de Ciudadanos que la so misión ye evitar la polarización, elementu común, per otra parte, a los gobiernos occidentales nos que peor se ta xestionando la crisis del coronavirus. Espero que s’enquivoquen.   

Raúl Suevos

A 8 díes vencíos de mayu de 2020