War is a racket

Asina, n’inglés; esi ye’l títulu d’un llibrín que nun me consta que tenga sio tornáu al español o al asturianu, pero que se pue descargar d’interné. La Guerra ye un lladroniciu, o una estafa, como se prefiera. Escribiólo nada menos que l’oficial más condecoráu de la historia de los Estaos Xuníos, el Xeneral Smedley Butler, tres cuarenta años de serviciu que finó como Comandante en xefe del Cuerpu de Marines; depués entá serviría unos cuantos años como senador al so país.

Diz el xeneral Butler que pasó la so mocedá combatiendo por llevar la llibertá a los países de Hispanoamérica; Nicaragua, Cuba, México, Hondures, tamién Haiti, foron los escenarios au, con l’aloya de la llibertá, acabó defendiendo los intereses de los banqueros de Wall Street, la United Fruit Company o la Standard Oil. Tamién llegaría a China y, sobre too, nos campos europeos como combatiente de la Primera Guerra Mundial.

Ye nésta cabera au incide nel repartu de papeles, los empresarios y procuradores arriesgando los sos capitales pa llograr grandes beneficios y los soldaos, los de siempres, los de “equí la más principal fazaña ye obedecer” poniendo en xuegu les sos vides o la integridá los sos cuerpos. Cuenta Butler grandes operaciones de compres pal Exércitu que nunca algamaron los teatros europeos, o simplemente que por fallos de diseñu o fabricación yeren inutilizables, cuenta tamién cómo llexisladores ensin escupulicios amenorgaron abusivamente los beneficios de les pólices de seguru de los combatientes. Un lladroniciu; el mesmu escenariu de siempres. Los excombatientes nun interesen.

N’España tamos agora en guerra. Nun ye una guerra con exércitos acorazaos, nin bombarderos d’última xeneración; ye una guerra escontra un enemigu minúsculu que ye a filerase poles menores biligueres y que, anque mata menos que les guerres convencionales, pue producir más llercia qu’estes. Ye una guerra tamién porque los nuesos políticos decidieron qu’ésta seya la terminoloxía na que debemos desenvolvenos y, como toles guerres, tien amás una llínea nídia de frente definida.

Son los hospitales, con independencia la so dimensión y allugamientu, la trinchera dende au se combate’l virus, l’enemigu, y ellí, como contaba’l xeneral Butler, los soldaos tán desasistíos, como siempres, como nuna guerra cualquiera. Tamién equí atopamos compres con intermediarios de filiación desconocida; materiales que nun cumplen coles especificaciones requeries pa que los nuesos soldaos de verde puedan defendese. ¿Maxinen únviar al combate a un soldáu con cascu de plásticu?

Los soldaos del xeneral Butler luchaben convencios de que lo facíen pol so país y pola llibertá pero la realidá ye que namái yeren peones de los xuegos que llevaben a cabu políticos alloñaos de la trinchera y parasitos cobiciosos de facer negociu. Agora pue pasar lo mesmo colos nuesos sanitarios y nun me paez que nel sieglu XXI esto seya aceutable.

Raúl Suevos

A 10 díes vencíos de mayu de 2020

Torna en castellán en repdiv.blogspot.com