L'estáu suicídase en Ceuta

 

Somos un estáu de drechu, y eso ta mui bien, pero tien les sos pegues. Lo primer amuesalo la sentencia del Supremu, na que nun entro, pero doi por fundamentada; según la cuala si un emigrante entra a nado nun puede ser espulsáu en caliente; de lo segundo tenemos imaxe vívida nos 60.000 entraos en dos díes na ciudá de Ceuta ¿Y agora qué?

Agora tamos en dalgo que recuerda espantiblemente a la Marcha Verde, anque a ésta quiciabes la nomen nel futuru como Marcha Moyada, si bien aquella fue programada por Hassan II y ésta nun tien mui nidio, aínda, quién dio fueu a la mecha que produxo esti españiu, dexando a les Redes como carburante de la mesma.

Sicasí, agora, el problema principal, más alló d’amosar, una vegada más, la inoperancia del nuesu gobiernu, atopamonos con un doble problema loxísticu; doble porque la única forma de sacar a esa masa de la ciudá paez la salida voluntaria, dalgo difícil de imaginar pel momentu y que, a min, ocurreseme que necesitaría de dalgún tipu de sacaliñu o incentivu. Vamos ver.

La ciudá tien la so loxística propia pa la so población, amontada nun día nun 50%, y güei ta bloquexada, coles families llocales aserrallaes nes sos cases y en dalgún casu con xente intentando entrar nelles, pero que, más pronto que tarde, van tener que salir a facer una compra nunes tiendes que güei tienen también les sos puertes piesllaes. Problema.

Los 60 mil tamién comen, y descomen, y, a midida que les sos necesidaes biolóxiques crezan, metanes una fola de calor descomanada, por ciertu, ye posible que los ánimos se vayan caldexando, de mou y manera que, como primer pasu, sedría conveniente unviar ellí un Piolín cargáu d’antidisturbios, como aquel de Barcelona, que sofite a les Fuercies de Seguridá na ciudá, y caltenga a raya a los asaltantes del inesistente Muru d’Adriano, demientres eses hores o díes que, faltos de sustentu, los anime a tornar voluntariamente al so país. Nun hai otra solución a curtiu.

Mentanto, equí, namái podemos dedicanos a achisbar cómo’l nuesu gobiernu se va dedicar estos díes a echar balones fuera y culpar a terceros, quiciabes la confabulación xudeu-masónica, o a tomar midíes que nin siquier tienen yá un valir estéticu, como l’espliegue d’un Exércitu que nin tien medios nin competencies pa lidiar nestos asuntos.

Y menos mal que’l nuesu presidente de gobiernu normalizó les rellaciones col nuesu vecín, tres abandonar a los saharauis va un par d’años ensin dar nin a ellos nin a nós media esplicadura. Ye lo qu’hai.

Raúl Suevos

A 31 díes vencíos de xunetu de 2026

Torna en castellán en repdiv.blogspot.com 

Un ésitu, como cabía esperar, pero...

 

Hasta’l tiempu cooperó, como tenía dicho l’AEMET, con nubes altes que enzancaben l’aición solar, en según qué circunstancia dañible pa la visión de los pilotos, y, como compensación, ensin vientu pa les maniobres aérees, Too perfectu, en suma, pa un público que, como tolos años, allegó masivamente a la cita aérea del branu xixonés.

La mío participación fo la de siempres, paséu d’inspección a media mañana y siguimientu posterior del espectáculu aéreu dende la pantalla de la TPA, la televisión del Principáu, que tresmite en direuto, con bonos resultaos visuales, debo dicir.

Nesa caminata, como siempres, chocóme especialmente l’ausencia de banderes españoles, tantu nel Muru como nos edificios del Paséu, y esti añu, tres l’apoteosis d’enseñes nacionales vivíu nun va un res cola Copa del mundiu de futbol, esta carencia faíse muncho más notoria, y a min, la decisión de llantar un gran mástil con ella nuna esquina del Molinón, au va ser güeyada los díes de partíu, nun me compensa del desiertu roxigualda que tolos díes observamos nel Muru. Ye lo qu’hai.

Nel aspeutu puramente aéreu, dóime cuenta del sofitu que’l festival recibe del Exercitu del Aire, que me paez lóxicu, pues l’eventu, pienso, supón una llantadera de vocaciones ente milenta neños qu’alleguen ca añu, padres mediante, a esti aconceyamientu popular, que, dende un par de díes enantes, yá tien nel Paséu puestos de venta d’artículos rellacionaos col tema militar. Bien.

Nel programa, pienso que perfectible, como casi toles actividaes, paezme que, como vimos cuando celebramos el Día de les FAS n’Asturies, un desembarcu de fuercies d’Infantería de marina nel arenal quedaría mui bien, y nun creyo que fuera en desterciu de la imaxe aérea del Festival. Too s’andará, supongo.

Güei l’Airbus A400 tiénse convertío na estrella del eventu, magar el vetustu Harrier y el “nuesu” Eurofighter,  con unes cuantes pasaes énte l’ensame que lu esperaba nel Muru, dando oportunidá de güeyar la so maniobrabilidá y la enormidá del so tamañu, cola so cola xigantesca que lu fai fácilmente identificable ente los de la so especie, los de tresporte, y que, amás y desgraciadamente, los fueos qu’España sufre estos díes tienenlu llevao a primer páxina de los telediarios pues, en Francia, equí ta en pruebes, yá entamaron a usalu como preséu escontra fueos. Que llegue lluéu equí.

El branu vive, y los acontecimientos qu’en Xixón lu enmarquen tamién, y, como correspuende dende siempres, l’autoridá debe y puede aprovechar la oportunidá pa tresmitir el menxaje, sobremanera si esti ye constructivu.

Raúl Suevos

A 26 díes vencíos de xunetu de 2026

Torna en castellán en repdiv.blogspot.com 

Ensayando nel aire

 

Garróme tornando pa casa, y quedéme tan ablucáu que perdí la oportunidá de sacar el teléfonu y grabalo. Falo del A400, l’avión d’Airbus que va participar el domingu nel “nuesu” festival aéreu, y sorayo lo de nuesu porque, anque seyamos una ciudá marítima, la realidá de los 300 mil espectadores que ca añu algama l’eventu, conviertenlu en dalgo mui de casa, como la Selmana Negra, l’afortunadamente recuperada Feria taurina, o la Soledá/Remedios de Cimavilla.

El casu ye que l’A400, un aparatu impresionante, por tamaño y capacidaes, ye capaz, visto lo d’esta mañana, de maniobrar casi como’l vieyu Hercules, al tiempu que tresporta muncho más qu’aquel, y a muncha más distancia, otorgando-y al nuesu Exércitu una capacidá de proyeición enantes inesistente, ya imprescindible pa los tiempos anguaño.

Cuando acaba les sos evoluciones sobro l’arenal de San Lorenzo nun puedo evitar pensar, con gulisma, nes munches peticiones de compra que l’actual situación xeopolítica tien promovíu al aparatu, y claro, los puestos de trabayu d’alta cualificación que, na zona de Sevilla, au s’ensamblen los aviones, suponen pa güei y los años vinientes.

Equí siguimos pendientes del Tallerón y el Taller de Barros, ensin saber cómo, a la fin, va acabar el vodevil d’Indra, especialmente cuando, tres el cambéu na so presidencia, agora con un catalán al frente, paez que ye aquella rexón, ensin dala tradición nel ámbitu de la Defensa, la que s’apareya pa cobrar los réditos de l’avalancha inversora que’l conflictu ucranianu, y Putin, paecen trayer a la industria de defensa europea, y de rebote a la española. Vamos ver.

Pal domingu a la que nun veremos va ser la Princesa Leonor, flamante oficial pilotu del nuesu Exército del Aire ¡sedría un puntazu¡ que’l branu viniente va recibir los despachos de teniente de los tres exércitos; pero sí al Eurofighter, qu’espero mos aforre’l subidón, casi un patatús, que l’añu pasáu mos dio’l F-18, cola so maniobra evasiva provocada por unes gaviotes. Imprevistos del direutu.

Tampocu va venir nunca el FCAS, sigles que cuerrespondíen, escribo en pasáu, al futuru sistema de combate aéreu, esto ye, el sustitutu del Eurofighter, proyeutu nel que participábemos, pero que las vieyes suspicacies ente alemanes y franceses tienen echao abaxo, dexándonos a nós tiraos metanes el camín. Ye lo qu’hai.

Sicasí, paez que, como siempres, el domingo va ser una fiesta, y hasta’l tiempu prepárase a cooperar, con una bona previsión pa la mañana dominical, que va vistir de gala, quiciabes la más importante del branu, la sablera de San Lorenzo.  

Raúl Suevos

A 24 díes vencíos de xunetu de 2026

Torna en castellán en repdiv.blogspot.com