L'aprendiz

 

Yá tien llovío abondo dende entoncenes, cuando Donald Trump yera un aprendiz; tampocu lo yera cuando, al frente d’un programa de tele-realidá, multiplicó la notoriedá descomanda que yá tenía como pa catapultalu a la presidencia del so país, el que dirixe al mundiu, los Estaos Xuníos. Ye lo qu’hai.

Pero con esti aprendiz refiérome a la película qu’ainda se puede envizcar en dalgunes plataformes y que, con un guión a prueba de demandes xudiciales, cuéntamos los primeros años del césar que mos va rexir nos cuatro años vinientes, de forma imperial, nun lo dulden.

Un ególatra manifiestu, ensin escupulicios, dalgo que’l Tribunal supremu yanqui tien reforzao coles sos sentencies; machista hasta’l delitu, con condergues en firme; dependiente de los sicofármacos nel periodu retratáu; y con otres carauterístiques que recuerdan no zafalastrán al nuesu Jesús Gil y Gil, y ensin l’encantu del italianísimu Silvio Berlusconi, anque, como ellos, con cuentes arrastraes cola xusticia tocantes los sos negocios. Toos ellos constructores, llamativu.

Pero la carauterística que tamién lo defín ye la de negociador terrible, con rasgos propios y aprendios del so mentor de mocedá, un abogáu neoyorkín ensin concencia nin reparos p’algamar los sos oxetivos. Cola posición de fuecia como base pa entamar cualquier tratu, y l’amenaza si necesariu fuera pa sofitala. Y eso ye lo que fai estos díes tocantes les sos rellaciones internacionales futures, enantes yá de xurar el cargu en Washington.

Les sos prevocaciones caberes, Canadá, Groenlandia, México o'l Canal de Panamá, dende’l mio puntu de vista, entren nesi marcu, asitiase pa una negociación futura y casi inmediata, que, nun lo dulden vustedes, va tener resultaos positivos pa los EEXX, y que, amás, tien lóxica nel cuadru de la batalla, pel momentu namái económica, que yá ta desarrollándose con China.

Groenlandia, con namái 57.000 habitantes, ye’l pieslle de la futura y formidable Ruta del norte, una vía navegable que’l cambéu climáticu ta a piques d’abrir, y amás atesora riqueces inmeses en minerales y tierres rares. Dinamarca y Europa van negociar, como tamién lo fará Panamá, que la so esistencia, a costa del robu a Colombia, debe-y a los EEXX, que cuenten, amás, con Guantánamo pa controlar los fluxos de la estructura. Canadá, anguaño en tiempos d’economía débil, vase avenir, como México, anque nun camude’l nome del Golfu, y magar les arengues de la so presidencia nacionalista, que va aceptar endurecer la frontera nos términos que marque Trump.

Fáltame, fáltamos, Ucrania; les boutaes hasta agora oyíes nun se correspuenden cola doctrina trumpista, y preveo, espero, un cambéu radical pa aprovechar el momentu y “someter o reconducir” a Rusia. Sacantes que quiera usarla como moneda de cambéu, anque'l so "tratu" n'Afganistán, nun tranquiliza. Veremos

Raúl Suevos

A 10 díes vencíos de xineru de 2025

Torna en castellán en repdiv.blogspot.com