Necesítase un Oliver North

 

O a otru semeyante, porque’l titular yá cumplió los 81 años y nun ye probable que tea pa una Contra nueva, como aquella qu’organizó a finales de los 80, en tiempos de Reagan, y que-y costó la so carriera militar, hasta entós rescamplante, y una conderga xudicial que dempués sedría anulada. Acabaría profesionalmente como comunicador de la Fox.

Lo de la Contra foi una operación encubierta yanqui que consistía, básicamente, en vender armes a los iraníes –prohibío pol so Congresu- pa mercar con eses perres armamentu pa unes guerrilles asentaes na frontera con Hondures coles que se pretendía acosar y debilitar al gobiernu sandinista qu’ablayó al réxime somocista, asitiáu en Managua tres la revolución y eleiciones llimpies,. Too saltó en pedazos col derribu d’un avión enllenu d’armes sobro territoriu nicaragüense, y North pagó los platos rotos.

L’asuntu tenía munchos más rabicos y derivaciones que los qu’equí s’apunten, pero vien güei a colación de lo qu’asocede en Venezuela, u ta instalada una dictadura tenebrosamente similar a la de los Castro en Cuba, o la del Daniel Ortega anguaño, que nun tien un res que ver col de los sos entamos, en Nicaragua. Una dictadura, que yá namái almiten los qu’ostenten la mesma condición, como amuesen los invitaos a la toma de posesión del sátrapa Maduro va dellos díes.

Los biempensantes entruguense qué se puede facer, retórica pura, pues como amuesen los exemplos de los sos vecinos, Cuba y Nicaragua, un sistema d’información interior eficaz, combináu con unes fuercies represives potentes, que non de seguridá, y el sofitu d’unas fuercies armaes compraes con ventaxes estremaes, da como resultáu’l control absolutu del país, que yá nun ye talu, sinon una prisión pa los que nun pudieron emigrar. Esi ye’l cuadru venezuelanu anguaño.

Y equí ye cuando entra un Oliver North, que foi condergáu nel so momentu non pol sofitu a la Contra sinon por saltase la prohibición de vender armes a Irán; un lo que seya que monte una operación semeyante que, pente medies l’acosu armáu –qu’eufemismu más guapu- dé una posibilidá al pueblu venezuelanu, que magar contar con una María Corina Machado bravísima, lo que ye güei nun tien dala salida pal so  devenir angustiosu.

Na parte operativa, llegaos ehí, la cosa pónse difícil, puestu que pa montar una operación, del tipu qu’equí se cuenta, necesitase un “santuariu” o retaguardia, como’l qu’ETA tevo demientres dellos años en Francia, que nesti casu sedría la Colombia de Petro, que tocantes Venezuela fai la esfinxe, como la España de Sánchez. Y amás tán les petroleres. Ye lo qu’hai.

Raúl Suevos

A 11 díes vencíos de xineru de 2025.

Torna en castellán en repdiv.blogspot.com