La convención socialista, como cabía esperar, ocupó les Primeres del fin de selmana, marcando quiciabes l’entamu del descensu informativo pol desastre valencianu. Probrinos ellos, tan necesitaos, y, al tiempu, ensin poder quitase d’enrriba la imaxe de lo que pasó, aínda pasa, en Lorca y La Palma. Promeses que lleva’l vientu, y el tiempu. Ye lo qu’hai.
El casu ye qu’esta convención, de congresu nun paez que tuviera muncho si echamos la vista atrás y recordamos lo qu’enantes yeren, a lo menos nel casu socialista, foi convocada pol líder inmarcesible –eso quisiera- alló pel lloxanu septiembre, tres meses na España d’anguaño son como un sieglu de los d’enantes, pa dar un emburrión nu se sabe mui bien si a la so imaxe o a la del partíu, pero la corrupción rampante qu’asuela la so redolada político y familiar tien-y xugao una mala pasada coles feches, y l’actualidá nun ye la qu’a él-y prestaría.
Pa cuelmu, en víspores, salta l’asuntu Lobato, que va trayer, con toa seguridá, imputaciones nueves. Too ello, maxínome, debió dexar ablayaos al líder y a los so acólitos más averaos, poro debieron pensar que meyor qu’un congresu tratábase de facer una misa d’adeptos, col ritu y la relixón de Pedro Sánchez. Pal debate quedó la intervención capada d’una militante d’esquierda socialista, como una alcordanza patético de lo que güei ye’l PSOE.
La intervención paraxismera final d’UNU entraba no previsible, por desatamañada y ampulosa, y, guetando dalgún mensax políticu, quédome coles apelaciones al cambeu climáticu, y, de pasu, a los negacionistes, encarnaos na ultra drecha y la tradicional, les mesmes a les que nel so apartáu, la vice de verbu atropelláu acusó de golpistes. Fuera d’esto nun queda un res, pues l’anunciu d’una axencia estatal pa la vivienda suena a axencia de colocación partidista antroxada de cachondéu si vemos los resultaos nesti apartáu nos so años de gobiernu.
Polo demás, ellí taben toos, hasta la “famosa” cabera, aquella qu’unvió los correos electrónicos a Lobato p’atacar a la archienemiga Ayuso, tamién la esposísima, reina de los másteres ensin conteníu nin escolinos, a la que ficieron pasiellu los adeptos ente besos, achuchones y gritos, como, con muncho mayor fervor faríen depués al so home adoráu. Un espectáculu, incluyío’l padre Ángel.
Como tabién lo foi, anque visiegu y llamentable, l’aplausu pedíu pol direutor del aquelarre, un Espadas con futuru inciertu, por cierto, pa los responsables condergaos nel Supremu polos 700 millones escaqueaos al erariu públicu n’Andalucía, los Cháves y Griñán. Too ello pa piesllar con esa Internacional tresnochada que torna al PSOE a los tiempos anteriores al congresu del 79 cuando Felipe eliminó al marxismu del ideariu del partío, y na que, agora sí, el secretariu xeneral levanta el puñu.
Atrás queda aquella imaxe de fondu con una bandiera d’España xigantesca de los tiempos primeros sanchistes, agora otros son los intereses, los que marca’l so personal manual de resistencia, non los d’España.
Raúl Suevos
A 2 díes vencíos d’avientu de 2024
Torna en castellán en repdiv.blogspot.com
