El pistachu lleva yá milenta años acompañando les parves de los pueblos mediterráneos, anque nun nació nes orielles d’esi mar maraviosu. Aportó dende les altiplanicies iraníes, la antigua Persia y dalgunos dicen que lo fizo de la mano de los intentos d’invasión llegaos dend’aquelles tierres. Ye posible que Xerxes, mientres esperaba la noticia de la derrota de Leónidas y los sos guerreros, tuviere comiendo unos pistachos trayíos dende la so patria nos trenes de la so intendencia. Anque tamién ye probable que los griegos, qu’entós habitaben les costes de la Turquía actual, como Príapu, Héctor o Enees, yá los tastiaren davezu.
Siempres foi Irán el gran productor. Na antigüedá tener un pistacheru nel xardín de la casa yera un signu de bayura familiar, y en decenios pasaos la so collecha y posterior esportación convirtióse nuna de les rúbriques más importantes de los ingresos del país. Cola llegada del Imán Jomeini y la so revolución, va yá cuarenta años, escomencipió un cambéu na situación puesto que’l consumu del pistachu, por eses coses de les modes, pasó a crecer desmesuradamente en too Occidente.
La oportunidá económica viéronla ceo en California, depués n’Arizona y Nuevu México, au les plantaciones de pistachu entamaron a estendese p’abastecer al so país y tamién al restu del mundu. Anguaño Irán sobrepasa les doscientes mil tonelaes y los EEXX tripliquen la cifra pero, enantes de llegar a esi puntu, les sanciones económiques impuestes polos norteamericanos tuvieron un efeutu pernidiu que fizo menos curioses les esportaciones iraníes y amontó l’interés poles de los EEXX, más competitives gracies a la irrigación, inesistente n’Irán, y que güei acopen la mayor parte de los mercaos mundiales.
Anguaño en munches partes d’Europa nun se concibe una parva ensin pistachos, y casi toos vienen de los EEXX, anque n’España entá caltenemos en gran parte la tradición iraní, d’u vienen la mayoría de los que comemos, magar dellos productores nacionales de Castilla-La Mancha y Andalucía, con clima y tarrenos afayadizos, paecen tener visto l’interés de participar nesta guerra incruenta, que nun se combate con misiles sinon con productos ecolóxicos que son a apoderase de partes del territoriu comercial de los alversarios y asina, nestos años caberos, la producción española algama unes humildoses siete mil tonelaes, con una vocación nidia d’amontar les cifres, especialmente agora que los fuegos tán abrasando la producción californiana y el estrés hídricu naquella parte del mundu, au’l nomáu riu Coloráu desapaez enantes de desembocar na mar, mengua los rendimientos por hectárea.
La xeopolítica internacional sigue güei calteniendo la tensión ente potencies mundiales, y tamién rexonales, y cuando esos irresistibles frutos secos se ponen al algame de la mano casi naide se para a pensar que quiciás tea participando inalvertidamente de toa una guerra económica asolapada que yá dura unos cuantos años.
Yo toi llistu a dir a la guerra y disparar con pistachos nacionales.
Raúl Suevos
En Xixón a 3 díes vencíos d’ochobre de 2020
Torna en castellán en repdiv.blogspot.com
No comments:
Post a Comment