Un Ochobre coloráu nuevu

 

Cuando al mes d’ochobre se-y axudica’l calificativu de coloráu, a la mayoría del personal, especialmente a los d’edaes medianes, vien-yos aína la imaxe de Sean Connery nel papel de capitán d’un somarín nuclear soviéticu que se pasaba al campu del odiosu enemigu capitalista; el so nome yera Ochobre coloráu.

Equí, n’Asturies, el nome trae a colación sucesos más desgraciaos que dalgunos doctrinarios, y sobre too indocumentaos, reivindiquen casi tolos ochobres, pa espantu d’historiadores y xente con xacíu y una cultura histórica básica, como daqué positivu y digno de lloa, dexando de llau que l’intentu de revolución del añu 34, en contra de la República, amás de destruyir la ciudá d’Uviéu, dexó más de mil muertos y nel aspeutu políticu, habiendo sío orquestada por, ente otros, los dirixentes Largo Caballero y Prieto, dexó ensin xustificación moral a les esquierdes pa condergar la sublevación del 36.

 

Pero, por más que na nuesa tierra se quiera recordar esi ochobre malfadiáu, la fama mundial correspuende-y al ochobre de 1917, en San Petersburgo, payares pa los gregorianos. El Zar Nicolás yá dexara’l poder en febreru y yera’l gobiernu provisional de Kerensky  el que se suponía que rexía’l país, a la espera de la toma del mesmu polos bolcheviques. La oportunidá aportó cola impopular orde del gobiernu de siguir la guerra escontra Alemania; Trotski diba desendolcar una serie d’aiciones, pente medies de grupos d’activistes preparaos minuciosamente nos meses previos, que diben bloquiar la ciudá y acabaríen tomando’l  Palaciu d’inviernu con tol gobiernu dientru. El réxime soviéticu escomencipiara.

Pero casi too ye perecederu y tamién esi ochobre, quitando a los estudiosos de los guelpes d’estáu pa los que Trotski creó un paradigma, yá namái representa un finxu históricu más. Anguaño’l mundu güeya pa otru llau, particularmente pal llonxanu oriente; ellí au los confucianos heriedes de Mao paecen tomar decisiones pa convertise na superpotencia viniente del mundu aprovechando l’ininteligible lideralgu actual de los EEXX.  

 

Den Xiaoping, fo’l artífiz del imperiu chinu modernu cola so política de lliberalización económica que convertiría al país nel fabricante del mundu y amontaría’l nivel de vida mediu de los chinos. Depués vendríen Jan Zeming y Hu Jintao que faríen de la esportación la clave de la economía china. Con Xi Jinping el fabricante chinu dio’l reblincu a la fabricación de bienes más ellaboraos anque pa ello dependía de les importaciones. La Nueva Ruta de la seda ye’l so gran apueste de futuru, sofitada n’inversiones n’infraestructures y créditos per tol mundu que fomenten una dependencia económica y política enorme en munchos países.

A la fin d’esti ochobre, nel aconceyamientu anual del Comité Central del Partíu comunista chinu, Xi Jinping, con más poder que’l propiu Mao Tse Tung, va dar una vuelta de tuerca más col aprobamientu d’una política económica nueva. China va avanzar haza l’autarquía con un enfoque industrial nuevu que busca retayar la so dependencia de les importaciones ensin perder la so capacidá esportadora. Si lo llogra sedrá l’hegemón mundial nuevu y esti pue ser un Ochobre coloráu nuevu.

Raúl Suevos

En Xixón a 6 díes vencíos de ochobre de 2020

Torna en castellán en repdiv.blogspot.com