Cuenta la villa de Llanes con un campu de golf magníficu; estraordinariu pola so condición de municipal y pol so allugamientu sobro una rasa mariniega que domina la costa llanisca a bon altor y que dexa contemplar la Sierra de Cuera en toa la so magnitú; tamién, más al sureste, la imaxe sobeyosa del macizu central de los Picos d’Europa.
El campu construyóse no que fuera mientres la Guerra Incivil un campu d’aviación dende’l que, a lo llargo la batalla culminante de la campaña del norte, se llanzaron los ataques aéreos que contribuyeron a la cayida del Mazucu, la gran posición defensiva cabera de les fuercies republicanes que defendíen Asturies.
Foi setiembre de 1937 un mes crucial na engarrada fratricida. Prieto, ministru de la guerra, encargó-y al xeneral Rojo, xefe del Estáu Mayor, una gran ofensiva qu’afloxase la presión sobro Bilbao y ésti diseñó una operación cuasi perfeuta que’l so ésitu significaría la toma de Zaragoza, nes manes del Xeneral Franco. Una operación que fracasó pol valir de los defensores de Quinto y Belchite y tamién pola ineptitú táctica de los xenerales del Exércitu popular, Modesto, Lister y el Campesín, ente otros, incapaces de desbordar les posiciones nacionales y afondar sobro la gran ciudá.
La operación de poco serviría pues nel norte’l PNV yá se vendiera, entregao ensin destruyir les instalaciones de la industria vizcaína, y desarmao ensin pegar un tiru los sos batallones de gudaris; l’árbol y les nueces siempres foron lo más importante pa ellos. Depués la entrada en Santander sedría un paséu militar y la viniente sedría Asturies.
Los nacionales, pa sorpresa republicana, desbordaron polos pasos de montaña del interior dende la Liébana, faciendo inútil la carretera de la costa y obligando a buscar una posición de pieslle que los republicanos atoparon na Sierra de Cuera, sobro’l pueblu del Mazucu y, a la fin, nos tres picos conocíos como Peñes Blanques. Un tarrén tarrecible nel que mientres delles selmanes de septiembre se produxeron, unos y otros, atacantes y defensores, con un arroxu y valentía que convierte esta batalla nuna de les más sangrines y heroiques de la Guerra Incivil. Fo un setiembre de tambascaes y borrines amañosu pal lloru.
D’aquellas xestes ficieronse plaques, monolitos y recordatorios que los heriedes d’unos y otros entretienense en destruyir, amparándose nun drechu que seguramente los que ellí combatieron, pola idea d’España de caún d’ellos, nunca-yos concedieron. Quiciabes, nestos tiempos nos que dalgunos munícipes s’afanen en retirar nomes de cais y honores, sedría un bon momentu pa honrar a aquellos combatientes, toos, pues toos entregaban la so vida por España.
Raúl Suevos
En Xijón a 2 díes vencíos de setiembre de 2020
Torna en castellán en repdiv.blogspot.com
No comments:
Post a Comment