Cumplí ayeri con un ritu penosu que m’imponen unos bonos amigos dende va yá unos branos, rendir visita al campu de golf de les Caldes d’Uviéu; un campu municipal que s’alluga nel valle homónimu au s’atopa’l famosu balneariu, anguaño primorosamente restauráu de forma que nada tien qu’envidiar al Caracalla de Baden Baden.
Ye penosu porque esti campu estiende les sos cais nes pindies fasteres del valle, de forma tala que’l so recorríu conviertese nun supliciu pal que nun ta avezáu, esto ye, pa cualquier visitante ocasional, como ye’l mio casu. Amás, pa los de Xixón, quitando la discoteca Faust y la cafetería Logos, adientrase nesos tarrenos ye siempre daqué esmolecedor, inclusive pa quien, como yo, cursara’l bachiller superior internu nel queríu Loyola, nes fasteres del Naranco.
Ellí les coses nun yeren fáciles, taben los esternos, los de la capital, y dempués los de pueblu, los internos. Había una raya difícil de cruciar que marcaba l’estilu de superior elegancia de los locales, ya inclusive se palpaba ente nós mesmos dalguna dixebra, y asina, los de les tierres del Navia o del altu Narcea, col so acentu peculiar, teníenlo aínda más difícil. Yo, que naquel entós vivía en Colunga, atopábame en tierra de naide.
Uviéu foi una criación de Fruela qu’heredaba la prevención que, dende los tiempos de Pelayo, los monarcas asturianos tuvieron haza la villa xixonesa, posiblemente pola mala alcordanza de Munuza y Adosinda. El casu ye qu’esta condición capitalina, enantes rexa y dempués provinciana, siempre-y dio bonos dividendos a los carballones que, ente claustros eclesiales o universitarios, xulgaos y gobernaciones atoparon un bon pasar de funcionariu a lo llargo de los sieglos, algamando’l cenit nos tiempos que tan bien retratara Leopoldo Alas.
En Xixón les coses foron per carreros más enguedeyaos; dende la destrucción de la villa tres los reiteraos alzamientos del conde de Noreña, allá pol S. XIV, tuvo qu’esperar a que Jovellanos la pusiere na sienda del futuru, au aportaría nel XIX de la mano del carbón y la industria. Dicen que l’anarcosindicalismu entró per ellí, caminando llueu haza’l Caudal y les Cuenques, onde lu esperaba’l Sindicatu mineru. Dambos asociaos daríen díes de fueu y sangre na rexón.
El pieslle de mines y naval, col acompañamientu de la reducción metalúrxica coincidió casi cola nacencia del golf municipal en Xixón, lo que-y da un aíre como d’andar per casa nos sos dos campos, como proletariu, pero lo d’Uviéu ye estremao. Ayeri púnxeme de pantalón llargu, por aquello de visitar la capital, pero sorprendieronme los d’ellí con una coleición de bermudes coloríes, dalgunes, d’eses apretaes, qu’agora se lleven y que punxeren de moda los amiguinos de Versace nel Ocean Drive de Miami, con polos a xuegu en dalgún casu y cinturones llamativos que resaltaben lorces d'asturiana gastronomía. Los amigos de mio, carballones conyugales, entá nun se mimetizaron nestos usos y vezos de los uvieinos. A ver cuánto duren.
Raúl Suevos
A 16 díes vencíos de setiembre de 2020
Torna en castellán en repdiv.blogspot.com
No comments:
Post a Comment