La xestión del desengañu

 

Güei tráyemos la prensa la noticia de que, una vegada más, el enllaz Lloreda-Veriña, que debiera alliviar el tráficu de camiones per La Calzada, torna a la llínea de salida. Esta ocasión, paez ser, un informe d’impactu ambiental ye’l responsable, pero, como siempres, los paganos son los vecinos d’esi barriu, nel que pasé unos cuantos años de la mío infancia, que na mío opinión merecen un Premio Princesa d’Asturies pol exemplu de civismu, y xestión de la frustración, que lleven dando demientres tantos años.

Ye de suponer que la nuesa alcaldesa, con tol drechu, fará usu d’esta enésima tomadura de pelu a la ciudá, que se xune a les del metrotren, la intermodal, Cabueñes, etc. pa cuando llegue la campaña eleutoral del añu viniente. Y Tampocu me diba sosprender si, como vien asocediendo dende que’l nuesu actual sistema políticu ta vixente, el partíu de los cien años d’honradez -qu’escarniu nel momentu actual- torna a ser mayoritariamente votáu. Ye lo qu’hai.

Nes mesmes páxines cuentenmos que somos, Asturies, la penúltima rexón en crecimientu n’España, namái superamos a Cantabria. Pero en cambiu somos campeones nacionales n’absentismu llaboral. Asuntos menores dambos mientes nun mos suban el preciu de la botella sidra, pero dalgún, nun sé quién, debiera tomar nota ya intentar poner remediu ¿Haza ónde vamos?

Lo del decaimientu del proyeutu d’enllaz de Veriña llega cuando se vota nel Congresu esos decretos contradictorios de nome Maricarmen. Una tirita que pretende tallar la sangría d’una ferida que requier sutura con dellos puntos, pero asina ye la política moderna, tan dependiente de los asocedíos puntuales que pueden dar un guelpe d’aíre qu’hinche les veles de la nave p’asina poder siguir alantre per un tiempu.

La realidá ue que Maricarmen y Ceuta van ser, a día de güei, los temes que lideren la campaña eleutoral venidera; vivienda y emigración en términos fondamentales y duraderos, y, en dambos casos, el gobiernu actual, nel poder demientres los ocho años caberos, pocu o nada se tien fecho tocantes l’asuntu, pero asina ye la política moderna, na qu’un escandalu tapa l’anterior, como asocediiera col apagón, o Adamuz, inclusive cola corrupción, a nivel partíu o familiar, que namái’l pundonor de los xueces, y el ritmu sosegáu de l’apisonadora xudicial pueden facer que siga llamando l’atención del votante.

Tiempos convulsos nes sociedaes occidentales, nun sólo n’España, que paecen pasar per un periodu d’intranquilidá que quiciabes seya precursor de dalgo. Quién sabe.

Raúl Suevos

A 2 díes vencíos d’ochobre de 2026

Torna en castellán en repdiv.blogspot.com 

Paralelismos indecentes

 

Güei perdí dellos minutos -soi millonariu en tiempu y puedo permitímelo- repasando les  páxines primeres d’unos cuantos diarios, y pude comprobar que Ceuta, a lo menos güei y magar la dimisión del delegáu del gobiernu, yá malapenes apaez. Espero que seya dalgo transitoriu.

Nel so llugar ye Maricarmen, y tolo rellacionao col so casu, la qu’ocupa les portaes, y ello ye comprensible, pues una vieyina de 87 años sacada en volandes de la so casa por unos esbirros policiales qu’executen les órdenes d’un xuez ensin corazu -siempres acaba por apaecer una toga inmisericorde na actualidá española- ye dalgo bien sabrosu, non namái pa los movimientos d’estrema esquierda que batallen particularmente nel tema de la vivienda, sinon tamién pal completu sistema de comunicación pública, que nuna anciana como ésta atopa la mesma dosis de colesterol anímicu qu’un bon platu de casquería, yá seya ésti caberu de fégadu, llingua o callos. Too ta perico, más si acompañáu d’un bon vinu, o d’una acampada tres la manifestación.

La especulación del día xira al rodiu l’alcuerdu algamao cola inquilina, con mediación de l’alcaldía -difícil d’esplicar- y el decretu llei que se-y empapiza al gobiernu nel Conseyu y que, pel momentu, nun se sabe mui bien cómo va acabar, pero, mentanto, el xaréu mediáticu fae que la trayectoria vital de la vieya de marres quede n’evidencia, amenorgando asina les simpatíes del entamu, dalgo que amonta los sos pronunciamientos públicos, dignos d’una activista de la Puerta del Sol.

Esa celebridá sobrevenida lleva a la prensa a averanos a otros casos, tamién recientes, como esa Olga Matute, del Hospitalet, que’l 14 de septiembre se quitó la vida tres el desahucio, d’ella y les dos fíes, del pisu del que fuera propietaria hipotecada, y que, tres el divorciu, nun pudo pagar y el bancu de Sabadell expropió, dexándola como inquilina que pagaba relixosamente’l so alquiler, hasta que, vendíu’l pisu a un fondu buitre, fo intimada pa abandonalu.

Cumplía aparentemente tolos requisitos pa tener sío protexida, pero los procedimientos alministrativos y xudiciales son fríos y mecánicos, ensin flexibilidá nin resortes pa remediar situaciones fatales, como la d’Olga, que nun pudiendo más se quitó la vida. Malapenes se faló d’ello, quiciabes porque ellí, en Cataluña, los desahucios, como tamién les ocupaciones, son cosa davezu, quiciabes tamién porque na Xeneralidad y n’El Hospitalet gobierna’l PSOE. Quién sabe.

Mentanto, con decretu o ensin él, la vida sigue, tamién en Ceuta, naquel infiernu que lleva camín, magar Maricarmen, de convertirse nel clavu caberu del féretru políticu de Pedro Sánchez.

Raúl Suevos

A 29  díes vencíos de septiembre de 2026

Torna en castellán en repdiv.blogspot.com 

De Nerhu a Sánchez, pasando por Fidel Castro

 

Tenemos un presidente gobiernu de capacidaes insospechaes y casi infinites, muncho más alló de les que’l so Manual de resistencia mos enseñara. Estos díes pasaos tiénmos siguío dando amueses de les sos habilidades estenses nesi campu, el de sacar conexos de la chistera.

Andaba l’home per Nueva York, abrazándose col so alcalde, el señor Mandani, un populista d’esquierdes alliniáu na parte más socialista del partíu demócrata, que, amás d’eso, ye fiu d’emigrantes, y él mesmu nació en Kampala, Uganda. Tou un cuadru de lo más “fashión” pa quien, como Sánchez, basa gran parte de la so aición política no aparente.

El Pandit Nerhu, primer primer ministru de la India independiente, fo’l creador del Movimientu de los No allineaos; una especie de tercera vía ente los soviéticos y los yanquis de los años 60, que yeren quienes cortaben el bacalao, y tamién el pan, y tolo que ficiera falta. La so idea yera esa, nin con ún nin col otru, dalgo que’l so país tien tratao de caltener a lo llargo del tiempu. Pero la India ye la India, 1500 millones d’habitantes.

Dempués d’esi periodu entamador llegó Fidel, qu’entendía l’asuntu d’otra forma, esto ye, non alliniáu, pero combatiendo nel nome de los rusos alló au ficiera falta. Como na Guerra de les Arenes, equí al llau, ente Marruecos y Arxelia, u yá morrieron dellos cuantos cubanos pa que’l monstruo isleñu pudiera dase pisto pel mundiu, y convertise en paladín de tolo antiamericano.

Nos tiempos modernos la cosa va d’economía, como mos recuerden los BRICS. Les ideoloxíes tán demodé, y si non, güeyen vustedes al Partíu comunista chinu de Xi Jinping. Pero’l nuesu Pedro ehí sigue, intentándolo, agora averándose a los heriedes d’aquel movimiento, trasmutaos en Foru de Porto Alegre, y apelando a un socialismu del S. XXi que tien a la Venezuela chavista como faru del so fracasu.

En Nueva York el doctor Sánchez tien tratao de vendese como un productu curiosu pa terceros, anque la sala de l’Asamblea ONU taba más bien vacía mientes falaba, non como cuando Delcy, la de les maletes, corrió pa saludalu, pero fáilo guetando un enfrentamientu xestual col Imperiu, agora rexíu pol ogru naranxáu, y eso, más alló de los aplausos que-y otorga ente les sos huestes radicales d’esquierda, puede acabar teniendo un coste económicu pa España, pues la imaxe que da, sobremanera a los capitales, nun ye tranquilizadora, lo que lleva a que les inversiones se vayan a otru llau; por exemplu al nuesu vecín, Portugal, muncho más estable y previsible. Ye lo qu’hai.

Raúl Suevos

A 25 díes vencíos de septiembre de 2026

Torna en castellán en repdiv.blogspot.com