La corrección política

 

Va dellos años, exerciendo como secretariu los Premios Exército, y demientres la xinta y entrega d’una carpeta en cueru col so nome que-yos ufiertábemos como pagu a los miembros de los xuraos, qu’exercíen el so ministeriu ensin dalu tipu d’“orientación” pela nuesa parte, tevi la oportunidá d’oyer de boca d’un d’ellos cómo’l primer grafitti datáu en Madrid cuerrespondía a la casa que’l xeneral Weyler se construyía na villa colos caudales de la so obra, “Mi mando en Cuba”, un superventes de la dómina, pero que, cola mala fama que la so táctica de la “concentración”-y procurara en Cuba, y tamién en casa, escaeciendo qu’esa “solución”, respaldada pol gobiernu Cánovas, taba ganando la guerra, dalgunos, ente ellos l’autor de la pintada, nun-y teníen muncha estima; poro, probablemente, escribió nel valiáu de madera de la obra un “Mamando en Cuba” maldadosu.

Sia que non, tiempu dempués, la casa pasaría a tener como inquilinos a Rafael Alberti y la muyer, María Teresa León, y nos sos baxos, demientres la guerra incivil, y averao de la see de l’Alianza d’escritores antifascistes, unos dicen y otros refuguen, que se desarrollaben actividaes chequistes, y anguaño, por aquello de la corrección política, supongo, una placa recuerda la vivencia d’Alberti, anque nun se diz un res del so constructor, el xeneral Weyler. Ye lo qu’hai.

Güei lleo un artículu d’un dirixente políticu na LNE, que la so filiación aforro por aquello d’esa corrección política, nel que se fae ecu del asesinatu de Melquiades Álvarez, el políticu reformista asturianu, que, n’agostu de 1936, foi encarceláu ensin más na cárcel modelo de Madrid, baxo control del gobiernu de la República, pa, de siguío, ser fusiláu ellí mesmu polos milicianos del Frente Popular, achacando lo asocedío l’articulista a la violencia sectaria, y pasando de puntilles, ignoro con qué fin o motivu, l’autoría y la responsabilidá última de los fechos.

L’asuntu nun diría más alló, porque la realidá ye qu’a Don Melquiades, una gran figura d’aquella dómina, ya casi naide lu recuerda, nin equí, la so tierra, nin alló, la capital, onde yera per aquel entoncenes decanu del colexu d’abogaos, y lo cierto ye que, na mío opinión, a les coses, y a los asocedíos, convien nomales y rellatalos tal como son o foron, y lo demás, como esa corrección política que dalgunos, menos comedíos, llamen maricomplejines, namái puede conducir a qu’a un-y roben la cartera, non yá metanes un barullu y per detrás, sinon de frente y con tola frialdá, como, na mío opinión, mos asocede anguaño n’España, au yá casi nun tenemos cartera que robar, malapenes mos queda calderilla.  

Raúl Suevos

A 22 díes vencíos d’agostu de 2026

Torna en castellán en repdiv.blogspot.com 

Los marielitos de Ceuta

 

Alló pel añu 2012, volaba yo dende Nueva York a L’Habana, aprovechando una d’eses grietes que’l Bloquéu pernomáu, non tan herméticu como dicen, tien tenío siempres. Al mío llau sentóse un xigante d’ébanu que d’entrada daba mieu. Dempués escubrí que yera un cachu pan, de centenu supongo, que llevaba una vida na ciudá de los rascacielos, con esposa y fíos yá nacíos yanquis, pero qu’aportara a aquel requexu aprovechando la ventana de 1980 nel puertu del Mariel.

Aquello entamó cola ocupación de la embaxada del Perú en L’Habana por parte d’unos cientos de cubanos fartucos de Fidel, y l’afirmación, impulsiva y non meditada, del presidente norteamericanu Bill Clinton, en cuantu que diba acoyer a tolos que llegaren, dalgo que’l cuciu Fidel aprovechó pa unviá-y, dende’l puertu de Mariel, a una hora de L’Habana, unos ciento veinte mil cubanos; ente los que metió delincuentes lliberaos de les cárceles pal casu, enfermos psiquiátricos y toa mena de casos particulares; tamién milenta de mozos, lo meyor del país, qu’aprovecharon esa ventana d’oportunidá pa colar de la cárcel na que se camudara Cuba. Ente ellos el mío collaciu d’asientu, que tornaba al país per primer vegada, cargáu de tou tipu de regalos pa la familia, munchos de los cualos sedríen requisaos nel aeropuertu habaneru.

Cola salida d’esa xente, que Brian de Palma retrata maxistralmente en Scarface, con un Al Pacino espectacular y una Michelle Pfeifer perguapa, Fidel pudo cantar llínea, pues desentemangábase d’un montón de dolores de tiesta, pero, a renglón seguíu, cuando les remeses d’esos “gusanos” aniciaron a llegar a la islla, ye posible que glayara ¡Bingo¡ pues esi rublu, el de les remeses esteriores, ye quiciabes el más importante del país dende que los soviéticos, de la mano de Gorbachov, abandonaron la islla bonita.

Si agora mos paramos un momentín a pensar sobro la batalla de guerra híbrida que Marruecos acaba de desendolcar, y gananos, en Ceuta, van ver vustedes múltiples paralelismos, especialmente no de les remeses esteriores, conceuto que la IA me diz que supón el 7.5% del PIB marroquí anguaño, y tamién en cuantu que, ente los recalcitrantes qu’aínda siguen en Ceuta, cabe la posibilidá de qu’haya un númberu importante de los lliberaos de les cárceles marroquís con ocasión de la fiesta del Tronu, tamién que, ente los demás, los mozos contrarios al sistema políticu del país, monarquía constitucional, non parllamentaria, una mayoría fueren futuros xeneradores de problemes, especialmente los rifeños, siempres contrarios al xugu del sultán.

Equí, n’España, casi too s’enfoca dende’l prisma gobiernu/oposición, pero esta invasión, conceutu militar, alloñáu del tradicional problema migratoriu y humanitariu, déxamos nuna posición de precariedá énte los nuesos socios europeos, que ven con preocupación descomanada cómo España se convierte nun panal de rica miel pa la emigración irregular, y puerta falsa, a continuación, pa los sos países. Ye lo qu’hai.

Raúl Suevos

A 20 díes vencíos d’agostu de 2026

Torna en castellán en repdiv.blogspot.com 

Una crónica estremada

 

Cabe apuntar, de entrada, que’l xentíu na mesma yá daba cuenta del casi enllenu que s’esperaba tres l’apoteosis morantiana del día anterior. Una aglomeración a la que contribuyíen, na Grande, los antitaurinos, sofitaos por dalgunes formaciones polítiques, de escarsa o nula representación parllamentaria, que nestes verbenes atopen un mediu d’espresión, llamativamente nuna ciudá conocía por ser, como dicen los pixos, “pets-friendly”, colos perros como dueños y señores de les nueses cais. Ye lo qu’hai.

Venía yo interesáu en comprobar el paxellu del personal, pues na feria de Sevilla, televisada n’abiertu pola so televisión autonómica, decatemé que los señores llucíen abundantes americanes, dalgunos con corbata al cuellu; y les señores elegantísimes, como si dempués tuvieren “un compromisu”, y too ello col cimbréu casi constante d’un enxame d’abanicos multicolores. Y ye que Sevilla tien una color…

Equí l’asuntu va per otros caminos. Poques americanes, casi denguna, y les dames, arreglaes, más pa lueu dir a una sidrería qu’a un “party”, a lo menos nel tendíu de solombra. Arriba nos palcos quiciabes fuera diferente. Too ello, especialmente nos primeros toros, nos que, anque nun había sol, la humedá facia estragos, con un abaniquéu xeneral, si bien la mayoría yeren de propaganda en cartoncillu. Dempués el “churnu” yá mos perdonó un pocu.

De los toreros cabe apuntar que Talavante y Ortega ficieron lo que pudieron, especialmente colos sos segundos, y quiciabes emburriaos pola faena de Roca Rey al so primer, nel que, como un entendíu me tenía apuntado, “salió a por toes” dempués de la que Morante lio’l día anterior. Y ye qu’ellos dos representen güei la punta de lanza d’esi resurdir de la Fiesta Nacional, y alló onde van arrastren tras d’ellos un bon númberu d’aficionaos, y tamién dalgunos snobs. 

Nesi primer de Roca, nel qu’hasta’l terciu de banderilles foi sobresaliente, vióse dende l’entamu, brindando’l toru al públicu, que quería triunfar. Recibiólu a la verónica pero’l bichu andaba distrayíu, yéndose d’un caballu al otru nesa suerte. Dempués vieno’l platu fuerte, con Roca toreando de rodilles, con pases de frente, per detrás y cruzaos -quiciabes demasiaos- poniendo al tendío, por dalgo ye plaza de segunda, pates arriba. Siguió la faena con mas xestualización rodillera y, col toru yá cansadín, arrimándose hasta tocar el morru cola rodiella, temeridá que namora al tendíu pero que yo, que nun soi especialista, nun acabo de ver nidio.

Falló Roca de primer con un pinchazu, pa fulminar al toru nun segundu intentu y provocar un españíu de pañuelos que-y valieron dos oreyes. Mañana, güei, na novillada, va haber menos xente.

Raúl Suevos

A 17 díes vencíos d’agostu de 2026

Torna en castellán en repdiv.blogspot.com