Va dellos años pasé un branu en Tanger, una ciudá maraviosa de la que guardo alcordances bien grates. Nun yera turismu, sinon estudios d’árabe, que desarrollaba nuna escuela d’idiomes d’uno de los grandes barrios de la ciudá, xunto a una mezquita, a la que tolos míos collacios acudíen metanes la tarde pa la oración correspondiente.
Dende Tanger subíemos ca quince díes a Ceuta pa facer la compra y pasar la tarde na agradabilísima ciudá española, cargada de sabores y lugares históricos de tou tipu, pero na que resulta difícil, a lo menos pal foriatu, sustrayese a la sensación d’atopase nuna islla, pues la mar, al norte, per mui averao que s’atope la península, supón una barrera natural que, magar les modernes llínees de ferris, los crónicos temporales de Levante o Poniente encarguense cíclicamente de recordar a los ceutíes. Y pel sur, los montes y la frontera física, induldablemente meyorable na so capacidá de pieslle, representen otru elementu d’aisllamientu pa quien ellí vive o la visita.
Estos díes, yá va pa dos meses, asistimos a una situación de calter distópicu, con una población flotante, d’invasores pacíficos, anque utilizaos, aínda nun se sabe por quién, como vectores d’una operación de guerra híbrida, qu’algama’l 20% de la población ceutí, y que provoca la saturación de los servicios de la ciudá, especialmente los sanitarios, multiplica la comisión de delitos de toa mena, asienta les circunstancies pal desendolcu de focos epidémicos enantes desconocíos, y torga, de forma xeneralizada la vida normal de la población, dende los neños, a los mayores, pasando poles muyeres, que tienen esgotao les esistencias del gas pimienta na ciudá. Un infiernu.
Pel llau gubernamental, el nacional, pues el llocal, col presidente Vivas a la tiesta, ye dignu d’almiración, ta dando dende’l primer momentu amueses nidies d’una incapacidá manifiesta pa responder a les necesidaes de los ceutíes, amparándose nel garantismu de les nueses lleis, que tuvieran de suspendese dende’l primer día. Y agora, paecen querer centrar la so xustificación nes crítiques a la ciudá.
Estos díes caberos, una ONG de orixe navarru, asociada per dalgunos al mundiu bildutarra, anque nun paez qu’asina seya, anunció el so aportar na ciudá, cola intención de sofitar a los invasores y enfrentase a les fuercies d’orden públicu, a les que tachen de fascistes y represores. El resultáu tien sío l’ataque, con rotura de lunes, a un coche que per ellí pasaba, a la salida del puertu, lo que tien supuesto la criminalización de los ceutíes, polo inxustificable del ataque, qu’ensin dulda lo ye, pero que, na mesma midía, anque resulte paradóxicu, tamién ye comprensible.
Raúl Suevos
A 23 díes vencíos de septiembre de 2026
Torna en castellán en repdiv.blogspot.com
No comments:
Post a Comment