Acaba d’asoleyase esi informe pernomáu, qu’a partir d’agora va ser cuatrienal, nel que la OCDE, Organización pa la cooperación y desendolcu económicu, estudia y compara -esta comparanza ye la que duel- l’estáu de la educación nun númberu ampliy de países, ente ellos España y casi tolos nuesos socios europeos.
Esti añu diéronmos un bon palu. Nes tres áreas que s’estudien, ciencies, matemátiques y compresión llectora, tenemos baxao, como los vecinos de nueso, pero más qu’ellos, como nel casu italianu, que tocantes llectura allugase ente los primeros de la clas, mui penriba de nós, y, conviene nun escaecelo, esa comprensión llectora, na que nós vamos mal, ye la base pa l’alquisición del restu de conocimientos. Ensin comprensión nun hai entendimientu, y ensin ésti nun s’alquier el conocimientu.
Nel planu más cortiu, el nacional, l’informe tamién ofrez datos perinteresantes, como’l fechu de que la OCDE tenga espulsao del examen al País Vascu y Cataluña por tratar de dar cambiazu a los folios -incumplieron conscientemente les bases del mesmu, eliminando los resultaos peores- y a Baleares y Murcia tamién los garraron con chuletes, anque evitaron la expulsión.
En xeneral tienen salío abondo mal paraes aquelles comunidaes que cuenten con llingua cooficial, lo qu’obliga a pensar nos riesgos qu’esi empeño políticu, no’l de les llinguaes sinon el de la so imposición, comporta pal alumnao, que se ve obligao a trabayar intelectualmente nuna llingua que nun ye la materna y que, asina lo paez, influye negativamente nel so desendolcu.
Nel casu de nueso, Asturies, el disscutiniu apaez cíclicamente, casi siempres colos periodos eleutorales. Fálase de la necesidá de la cooficialidá pa un desarrollu meyor de la rexón, dexando de llau, interesadamente, lo que l’informe PISA mos diz, y escaeciendo que la nuesa Llei d’usou del Asturianu, ye un bon vehículu, si se desendolcara en toa la so amplitú, pa facer crecer la Llingua, dende la voluntariedá.
Hai aspeutos, particularmente los sociales y políticos, nos que nun entra PISA, que namái mide capacidaes, y que, posiblemente, aporten nel nuesu casu abonda claridá a les nueses males notes nesti examen públicu, y prestixosu, convien nun escaecelo. Y toi pensando, no político, nel baxón sistemáticu de la esixencia p’aprobar que vien primando nel nuesu sistema educativu, y que lu convierte nuna fábrica de mazcayos.
No social basta con reparar cuantos neños se pueden güeyar en chigres y terraces n’horarios nos que deberíen tar colos sos deberes en casa, o yá cenando p’acostase a una hora racional. Nun tenemos remedio, y PISA díznoslo.
Raúl Suevos
A 9 díes vencíos de septiembre de 2026
Torna en castellán en repdiv.blogspot.com
No comments:
Post a Comment