Avezarámonos a güeyar la guerra en formatu entretenimientu, sobro les pantalles grandes de los cines, pocos, y sobro les pequeñes de los nuesos televisores. Nesos formatos el combate ye dalgo asépticu, que nin fiede nin, xeneralmente, mos ofrez imáxenes más sangrientes de lo que los públicos suelen almitir. La guerra tien sío pa delles xeneraciones, particularmente n’España, dalgo llonxano y pocu menos qu’imposible que mos pudiera afeutar na nuesa cotidianeidá, inclusive cuando unviámos unidaes del nuesu Exércitu en misiones de paz per requexos estremaos del mundiu, como Llíbanu, Bosnia i Herzegovina, Kosovo, Iraq, y otros llugares que, pola poca entidá de la nuesa representación, malapenes si son citaos nos telediarios y prensa escrita.
Agora, primer cola invasión sangrina d’Ucrania, y, más recien, col conflictu del Golfu Pérsicu, vémonos asaltaos por un fluxu de información ya imáxes constante, y al tiempu una corriente d’alvertencies, a nivel nacional y européu, sobro l’estáu deficiente de les nueses defenses si l’orcu rusu decidiera atacar la UE, dalgo qu’en munchos casos se presenta como altamente probable nun futuru demasiao averao como pa quedase indiferente. D’ehí al rearme queda mui pocu, y nello tamos.
Equí, n’Asturies, la prensa faíse ecu de declaraciones de políticos que mos prometen devenir un polu nacional na fabricación de blindaos, particularmente los Tresportes blindaos de personal, como esi güei pernomáu Dragón, anque si vustedes s’averen -internet mediante- al campu de batalla ucranianu, van decatase qu’ellí malapenes s’usen, y el más esitosu, en cuantu al apreciu de los infantes del so exércitu, ye’l Bradley, un diseñu yanqui de los años 80, con caenes y una proteición qu’aguanta dos impactos direutos y salva les vides de los sos tripulantes. Ellí lo que cuenten son los drones, de tou tipu, terrestres, navales y, de xacíu, aéreos.
Ellí la guerra da un salto cualitativu, en cuantu a diseños ñuevos y aiciones electromagnétiques, ca tres meses, y cuantitativu, con casi un millón de drones fabricaos al mes, y creciendo, d’ehí’l mío escepticismu sobro’l futuru d’esos blindaos asturianos. Casi como’l d’esi drone, amu de los cielos de Iraq y Afganistán, el Reaper, del cualu España compró unos cuantos exemplares y que los iranies tienen baltiao en númberu superior a cincuenta. Ye lo qu’hai.
Nun vien el futuru perhí, polos blindaos, que van siguir siendo necesarios, pero en númberu mui inferior al que’l vieyu campu de batalla marcaba. Tamos agora na dómina de la IA y los drones, tamién de los robots, humanoides, como esos que yá China prepara pal combate terrestre. Que nun mos garre’l toru.
Raúl Suevos
A 8 díes vencíos de septiembre de 2026
Torna en castellán en repdiv.blogspot.com
No comments:
Post a Comment