Nun hai costaleros nel Vaticanu

 

Ta estos díes el mundiu cola atención puesta nel Vaticanu, y nun ye pa menos, pos el Papa, l’ocupante de la siella de San Pedro, tien dao’l so suspiru caberu, lo que conlleva una serie de rituales, primer pal so entierru, y dempués pa la eleición del so sostitutu. Ceremonial que caltien al orbe enteru, non namái a los mil quinientos millones de fieles de la Ilesia Católica, pendientes de lo qu’asocede en Roma.

L’asuntu nun ye pa menos yá que se trata d’una institución con dos mil años d’historia. Nun hai otra igual. Y si bien, dende que los Bersaglieri de los Saboya asaltaron Porta Pía, el 20 de septiembre de 1870, el so poder terrenal desapaeció, continúa calteniendo una capacidá inmensa d’actuar pente medies lo qu’agora se conoz como “Soft Power”, na mio opinión ainda mayor que’l de les propies Naciones Xuníes. Ye lo qu’hai.

Desapaecíos los kremlinologos, los supuestos espertos no qu’asocedía tres les mures del Kremlin en tiempos soviéticos, ya qu’agora con Vladimir Putin, y ensin Politburo que llende los sos poderes, namái los psiquiatres s’atreven a opinar; esta situación sobrevenía en Roma vien abondo bien pa los grandes y pequeños comunicadores del mundiu enteru, particularmente los españoles, que se tienen entainao a viaxar a la ciudá de los césares, y dalgún d’ellos, los más precavíos, ficiéronse acompañar de dalgún vaticanista, tan versáu y espertu como aquellos kremlinologos d’enantes. Ellos describenmos el detalle del ritual de les esequies y vanmos calecer la tiesta coles sos elucubraciones sobro’l resultáu del Cónclave, escaeciendo que ye cosa del Espíritu Santu, y Esi nun se dexa manipular.

A min too esto vienme grande, pola mio inorancia na materia, y poro trato de fixame nos xestos más pequeños, como esos sediarios, de sedia, que ye  como llamen a la siella ellí, y que ye un cuerpu de funcionarios qu’enantes s’encarregaba de llevar n’alzes na so siella a los Papes, y que, dende va dellos años, y cola llegada del Papamovil, casi se queden nel paru, reservándose pa ocasiones como ésta, la defunción del titular, que’l so féretru s’encárreguen de portar.

Yeren, son, catorce los que lu lleven, y paecía que l’ataúd fuera de chombu, pola so espresión, particularmente la d’un d’ellos, que resoplaba y retorcíase como si’l listón tuviera partiendo-y-el costazu, y ye que, a diferencia los costaleros españoles, estos nun paecen tener ensayao tan importante actividá, poro quiciabes lo de so sedría disolvelos y trayelos d’España, llegao’l casu.

Raúl Suevos

A 25 díes d’abril de 2025

Torna en castellán en repdiv.blogspot.com

El Cautivu d'Uviéu nun tien etarres

 

Estos años caberos, cuando aporten estes feches, sospréndome coles manifestaciones de devoción cristiana que s’esplieguen a lo ancho y llargo del país, si bien son les de la siempres apasionada, barroca y dramática Andalucía les que más sonadía lleven, mui perriba de les sobries castellanes, el redoble atronador d’Aragón, o les más singulares d’otros requexos del país, tamién cargaos de tradición.

Y sospréndome porque, anque m’esfuercie, nun algamo a recordar tales aglomeraciones en tiempos de la mio mocedá, esto ye, na dómina de la oprobiosa y catolicísima dictadura del xeneral Franco. Quiciabes seyan les mio meninxes, yá deterioraes pel tiempu, o simplemente que lo d’entoncenes tenía más de devoción y lo d’agora d’atracción. El casu ye que l’asuntu yá se calcula en términos de macroeconomía, polo que mueve n’asuntos turísticos y perres. Ye lo qu’hai.

A min, confiésolo, lo que me pon ye lo del Cristu de Mena en Málaga, que nun ye de Mena porque l’auténticu quemaronlu ellí mesmo nos “gloriosos” díes primeros de la República. Tamién se lu conoz como’l Cristu de la Bona Muerte, o de la Lexón, pola advocación d’esti Cuerpu al mesmu dende’l tempranu 1928. El so treslláu dende la ilesia a la cofradía en pleno día conviertese nuna de les imáxes icóniques d’estes xornaes, y la so tresmisión televisiva da-y aínda más algame, faciendo respigar al personal col Cristu alzáu en brazos al tiempu que canten el “noviu de la muerte”. Ablucante.

N’Asturies somos más espurechos, quiciabes porque’l tiempu nun tien acompañao nunca pa estos ritos esteriores, pero aínda asina tenemos les nueses tradiciones, como la procesión de los Cristos de Ḷluarca, qu’a falta d’imaxinería barroca aporta un marcu natural difícilmente iguallable. Y tamién tenemos usances como la ovetense cofradía del Cautivu, que tolos años intenta lliberar un presidiariu, pero qu’esti que tamos tampocu lo tien llograo, y yá van dellos, porque, al paecer, son catorce les cofradíes españoles con este privilexu, el de pedir al gobiernu, que ye quien otorga, y, polo visto, namái da cuatro ca añu, col criteriu de…lo que’y pete. Quiciabes se reserva p’Ábalos, llegáu’l casu.

Anque yo, que soi de pensamientu retorcíu, pienso que’l problema de los del Cautivu ta en que nun cuenten con dalu etarra nes sos llistes, pues yá toos, creo, tán nel País Vascu, y ellí nun necesiten d’indultos de Semana Santa. Yá s’indulten ellos solos. Va tiempu tienen el so sistema propiu, que nun necesita de la Ilesia, que yá cumplió arropándolos nos años de sangre.

Raúl Suevos

A 17 díes vencíos d’abril de 2025

Torna en castellán en repdiv.blogspot.com

 

Hortera en Nueva York

 

Naquel tiempu imprecisu que marca la entrada na edá del pavu, o lo que ye lo mesmo, el periodu obsesivu nel que too s’enfoca haza l’oxetivu de “garrar cachu”, yo hinchéme de lleer a Federico García, y tamién a Miguel Hernández, porque, dicían, col dominiu del primer podíase enquillotrar a les moces abondo como p’algamar lo señalao al entemu del párrafu.

Poeta en Nueva York, yera un de los testos fondamentales, anque nun tantu como aquel Romanceru xitanu de tremendes y nochirniegues ensoñaciones. El casu ye que, pasao’l tiempu, demientres  el mio periodu habaneru,  tevi la oportunidá de viaxar a la ciudá de los rascacielos dende la capital cubana; porque sí, sí se puede viaxar magar al cacarexáu Bloquéu, y siempres que se tenga perres abondo, el pasaporte afayaizu, y los bemoles pa subise a los aviones charter que faen les rutes a Miami y Nueva York, abondo destartalaos y non aptos pa coimbres.

Ellí pude confirmar casi tolos prexuicios negativos que tenía, y anguaño namái me queda l’alacordanza de les coles descomanaes que ficimos pa tou tipu de visites, pues yera Semana Santa, periodu vacacional pa los fíos qu’entoncenes taben n’España, y tamién, no positivo, la imaxe de la Visión d’España de Sorolla, na Hispanic Society, llamativamente solitaria magar los milenta connacionales que pululaben pela ciudá.

Aquello, Nueva York, namái sirve pa dimensionamos na nuesa insignificancia tremenda, pues too resulta xigantesco; hasta les hamburgueses, na so talla y na infinidá de posibilidaes per llugares y tipos pa soborguiales. Y supongo que, teniendo la oportunidad, ye comprensible’l visitala una vegada, pa llueu criticala y nun tornar.

Poro sospréndeme, metanes la mio incomprensión, les visites repetíes que dalgunos personaxes, que les sos vides atopamos nes pantallas y páxinas de medios estremaos, realicen a aquella ciudá de mou cuasi repetitivu. Presumen de la so conocencia de la ciudá, y amuesen con detalle hasta’l menor de los sos movimientos, visites y degustaciones. Anuncienmos inclusive con anticipación que vuelen ellí, como pa solertanos y que nun perdamos comba de les  sos peripecies. Cansen, y nun paez importa-yos.

Supongo que, de dalguna miente, too eso monetizase, de forma direuta o al traviés de patrocinadores, o la más simple fama, pero nestos díes que los europeos tamos a puntu d’entamar una guerra comercial col imperiu, resulta cuasi ofensivu comprobar que dalgunes cares conocíes actúen como si too eso nun fuera con ellos, como si’l so estatus-yos permitiera dexar de llau les preocupaciones de millones.

A min paezme vulgar y de mal gustu, que ye como’l diccionariu defín al hortera. Ye lo qu’hai.

Raúl Suevos

A 19 díes vencíos d’abril de 2025

Torna en castellán en repdiv.blogspot.com

La DANA de Zarréu

 

Oyo una entrevista radiofónica a una ministra y nun puedo menos que trescalame énte la pacencia de la entrevistadora, qu’una y otra vegada recibe les escapaes de l’autoridá énte ca entruga tocantes a los problemes del gobiernu, seyan internos o rellacionaos colos sos supuestos socios de llexislatura o d’investidura. Nun hai forma, too ye un revolvese escontra’l Partíu Popular o’l so presidente. Ye lo qu’hai, supongo.

Y el casu ye que l’aición gubernamental vese ca día más arreqexada polos escándalos internos y el so aicionar en política, ca vegada más n’entredichu; y ello magar la so magnífica xestión de la comunicación pública, especialmente focalizada, no qu’a la oposición toca, nesa DANA maldita y la so carga de muertos y destrucción. Un desastre con responsabilidá xudicial que yá se ta esclariando nos xulgaos de Paiporta, y que va deber poner negru sobro blanco la cuota qu’a caún correspuenda, y una responsabilidá política que, dende’l primer día, resuelvese a cara de perru ente’l gobiernu y la oposición.

Pal ciudadanu d’a pie, que la so imaxe xeneral conformenla los medios de comunicación pública, queda’l desasosiegu de ver que’l nuesu sistema de gobiernu, vital pa les nueses vídes, nun furrula. Nun lo fae, a lo menos, cuando se trata de enfrentase a una catástrofe mayor, como la valenciana, y tamién, que’l peligru pa nós multiplícase nel casu de que’l gobiernu nacional y autonómicu nun amuesen la mesma bandera partidaria. Amuesamoslo nidiamente la DANA, nel enantes, demientres, y dempués; y tamién, en sentíu opuestu, el Prestige, au Madrid y Santiago emburriaben na mesma direición pa tratar de amenorgar los daños causaos por un petroleru rusu cutre.

Nel Principáu, en Zarréu, atopámonos agora énte una catástrofe menor, non pa les families afeutaes, y non por insólita na tierra minera por escelencia. Un desastre que, según cuenten, aníciase cola licencia a una empresa d’entidá perduldosa; sigue con unes inspecciones que, cuando menos, debieron ser mui cortes de vista; soporta denuncies nunca investigaes qu’agora, al paecer, vese que yeren fundades; y a la fin aporta’l grisú, y como antaño, les muertes.

Tamos yá na fase de xestión de la crisis, especialmente no qu’a la comunicación se refier; y nesti casu, los dos gobiernos son del mesmu signu, y conocen l’oficiu, especialmente n’Asturies, tierra baldía pa l’alternancia política, así que debemos preparanos pa oyer manifestaciones de duelu, promeses d’esclarecimientu, y sacrificios apaciguadores, pero nun esperen más; a lo menos hasta que lleguen los xueces.

Raúl Suevos

A 15 díes vencíos d'abril

Torna en castellán en repdiv.blogspot.com

Bardella y el Primer Cónsul

 

El 18 de brumariu, o lo que ye lo mesmo, el 9 d’avientu de 1799, Napoleón Bonaparte convertíase en Primer Cónsul tres dar un guelpe d’estáu, que Curzio Malaparte describe maxistralmente na so obra “Téunica del guelpe d’estáu”. El corsu magníficu tenía namái 30 años y venía d’una trayectoria militar folgorante qu’entamara nel cercu de Tolón; una de les poques escenes salvables na decepcionante película de Ridley Scott, que como bon inglés namái se preocupó de parodiar la figura del Emperador.

Utilizar la figura de Napoleón pa facer comparances ye siempres peligrosu, pero les fechas tán ehí, y tamién les obres, pues si bien la mayoría lu rellaciona col xeniu militar, la realidá del so maxisteriu, atópase esculpida en mármol na planta baxa de la so tomba monumental nos Inválidos, en París, y vienme a la memoria’l Códigu napoleónicu, fonte del nuesu drechu civil; la escuela nacional, aínda güei vixente en Francia; el bancu de Francia, y otros munchos elementos al traviés de los cualos aínda se caltien la so memoria.

El señor Jordan Bardella tien agora 29 años, y lleva en política dende los 17; una precocidá y tiempu que tien aprovechao,  pues ye l’heriede in pectore de Marine Le Pen, la líder del Rassemblement National, el grupu que lidera toles encuestes franceses cara a les presidenciales de 2027, y qu’acaba de ser condergada ya inhabilitada por corrupción, lo que la dexa fora del combate sacantes que gane a tiempu l’apelación que yá tien puesto en marcha.

Bardella ye llistu, amás d’esperimentáu, como se pudo apreciar nes llexislatives pasaes, onde algamó unos resultaos notables; y demostrólo colando de Washington ensin soltar el so espiche tres el saludu nazi del señor O’Bannon, gurú de los supremacistes estadounidenses. Un xestu criticáu duramente pel susodichu pero que, sicasí, va pagar los sos dividendos nel conservadurismu moderáu.

Na casa lepenista, inscrita nel grupu ultraconservador Patriots, saben xugar col complexu mundiu européu, au’l gobiernu italianu ye’l meyor ejemplu, con tres almes nun solu cuerpu, y asina, Marine averase a Salvini, de la Lliga, pero Bardella decantase polos Fratelli d’Italia de Georgia Meloni. Y ye que la drecha popular francesa ye la decana d’esa corriente europea, con muncho camín yá percorríu.

Bardella, familiarmente d’oríxen italianu, anque despinta a la so güela de raigañu arxelín, namái tien qu’esperar a los xueces y nun meter la pata, pues anque pudiera haber tensiones internes, nel Rassemblement yá nun queda tiempu para guetar otru cónsul. Ye lo qu’hai.

Raúl Suevos

A 3 díes vencíos d’abril de 2025

Torna en castellán en repdiv.blogspot.com