Hortera en Nueva York

 

Naquel tiempu imprecisu que marca la entrada na edá del pavu, o lo que ye lo mesmo, el periodu obsesivu nel que too s’enfoca haza l’oxetivu de “garrar cachu”, yo hinchéme de lleer a Federico García, y tamién a Miguel Hernández, porque, dicían, col dominiu del primer podíase enquillotrar a les moces abondo como p’algamar lo señalao al entemu del párrafu.

Poeta en Nueva York, yera un de los testos fondamentales, anque nun tantu como aquel Romanceru xitanu de tremendes y nochirniegues ensoñaciones. El casu ye que, pasao’l tiempu, demientres  el mio periodu habaneru,  tevi la oportunidá de viaxar a la ciudá de los rascacielos dende la capital cubana; porque sí, sí se puede viaxar magar al cacarexáu Bloquéu, y siempres que se tenga perres abondo, el pasaporte afayaizu, y los bemoles pa subise a los aviones charter que faen les rutes a Miami y Nueva York, abondo destartalaos y non aptos pa coimbres.

Ellí pude confirmar casi tolos prexuicios negativos que tenía, y anguaño namái me queda l’alacordanza de les coles descomanaes que ficimos pa tou tipu de visites, pues yera Semana Santa, periodu vacacional pa los fíos qu’entoncenes taben n’España, y tamién, no positivo, la imaxe de la Visión d’España de Sorolla, na Hispanic Society, llamativamente solitaria magar los milenta connacionales que pululaben pela ciudá.

Aquello, Nueva York, namái sirve pa dimensionamos na nuesa insignificancia tremenda, pues too resulta xigantesco; hasta les hamburgueses, na so talla y na infinidá de posibilidaes per llugares y tipos pa soborguiales. Y supongo que, teniendo la oportunidad, ye comprensible’l visitala una vegada, pa llueu criticala y nun tornar.

Poro sospréndeme, metanes la mio incomprensión, les visites repetíes que dalgunos personaxes, que les sos vides atopamos nes pantallas y páxinas de medios estremaos, realicen a aquella ciudá de mou cuasi repetitivu. Presumen de la so conocencia de la ciudá, y amuesen con detalle hasta’l menor de los sos movimientos, visites y degustaciones. Anuncienmos inclusive con anticipación que vuelen ellí, como pa solertanos y que nun perdamos comba de les  sos peripecies. Cansen, y nun paez importa-yos.

Supongo que, de dalguna miente, too eso monetizase, de forma direuta o al traviés de patrocinadores, o la más simple fama, pero nestos díes que los europeos tamos a puntu d’entamar una guerra comercial col imperiu, resulta cuasi ofensivu comprobar que dalgunes cares conocíes actúen como si too eso nun fuera con ellos, como si’l so estatus-yos permitiera dexar de llau les preocupaciones de millones.

A min paezme vulgar y de mal gustu, que ye como’l diccionariu defín al hortera. Ye lo qu’hai.

Raúl Suevos

A 19 díes vencíos d’abril de 2025

Torna en castellán en repdiv.blogspot.com