Aporta'l muskismu

 

Col sufixu “ismu” suelense formar nomes que definen doctrines polítiques o ideoloxíes, o simplemente corrientes. L’Academia da-y dos aceiciones, la primer concuerda colo yá señalao, y la segunda refierse a actitues, tendencies o cualidaes de persones u organizaciones. Vienme’l socialismu como exemplu de la primer, y el papanatismu como amuesa de la segunda. Pero, por favor, que naide se llance a facer elucubraciones, son, simplemente, les idees que me vinieron a la tiesta, asina, de guelpe, ensin premeditación.

Nos Estaos Xuníos foi desgraciadamente pernomáu’l términu Macartismu, por aquel senador dedicáu a la persecución d’esquierdistes demientres la postguerra, Joseph Maccarthy. Y en tiempos tan recien como los actuales, toos, ensin esclusión, vamos tener que trepar col trumpismu, por aquello del presidente flamante del imperiu, Donald Trump. Pero hai otros, inclusive más esmolecedores.

El señor Trump, magníficamente descritu  nel “aprendiz”, una película aínda en pantalla que mos amuesa un neñu bien con ansia descomanada de poder, intelixencia, y abondo falta d’escrúpulos y empatía como para, aprovechándose d’un sistema políticu, el norteamericanu, que se cree’l meyor pero que contien deficiencies grandes, amasar una fortuna enorme y llegar al poder del imperiu. Agora llega con la llección aprendida, por segunda vegada, lo que debería preocupanos a toos. Ye lo qu’hai.

Elon Musk ye un xeniu de la inxeniería y, sobremanera, los negocios, anque nunca va ser presidente de los EEXX porque, a diferencia de Trump, nun nació ellí, sinon en Sudáfrica. La so mente portentosa ta detrás de la nacencia d’empreses potentes que dempués vendió pa facese col control d’otres a las qu’emburrió al estrellatu, como PayPal, o SpaceX, o Tesla, hasta camudase nel home más ricu del mundiu, a malapenes cinquenta años. Ablucante.

Enantes qu’él yá pudimos conocer otros portentos yanquis, como Bill Gates, el fallecíu Steve Jobs, o los financieros Buffet y Soros; personaxes qu’influyen na sociedá dende les sos fondaciones y donaciones. U otros como Jeff Bezos o Mark ZucKerberg, que dende los sos Amazon o Meta paecen centrase esclusivamente n’amontar la dimensión de los sos artefactos anque, yá que tal, influyan nes sociedaes nes qu’operen. Musk ye distintu.

Elon va más lloñe. Fízolo yá cuando agoró la desapaición de los pilotos de combate a los cadetes d’Annapolis nel 2020, o cuando camudó’l campu de batalla ucranianu cola señal internet de los so satélites, o cuando recomendó a Zelensky negociar la rendición, o col usu políticu de Twitter. Y agora fai tremecer la política alemana con un artículu en Die Welt recomendando votar a Alianza por Alemaña, en plena campaña electoral. Y aínda nun tien tomao posesión el gobiernu Trump. Van venir más d’estes. Esto ye’l muskismu.

Raúl Suevos

A 30 díes vencíos d’avientu de 2024

Torna en castellán en repdiv.blogspot.com

El Dragón de Trubia nun echa fueu

 

¿Cuántes vegaes oyimos falar o lleío sobro’l proyeutu más importante del Exércitu Español de los decenios caberos? El pernomáu Dragón, el vehículu de combate pa Infantería 8x8; un mediu sobro ruedes con una torre pimpanuda de factura española y dotada con un cañón poderosu de 30 mm. ¿Aú ta’l proyeutu anguaño?

Nun ye trivial la entruga, non namái pal ministeriu de Defensa, que dende’l 2019, cuando s’entama’l proyeutu pudo ver como’l mundiu, el de los exércitos, tien evolucionao ensin que’l Dragón, nun yá volara, sinon que, nacíu ensin ales, malapenes paez que tenga dientes; a lo menos poles noticies que van llegando. Y si al Exércitu debe preocupa-y l’asuntu, qué dicir de la rexón asturiana, que baxo les siempre amables pallabres del so presidente, ve como’l so antañu potente base industrial se reduz irremediablemente, colo qu’ello significa pal emplegu de güei, y les pensiones de mañana.

El Dragón nun carbura, según dicen, y dalgo debe haber cuándo’l coronel xefe del proyeutu tiénse dío pa la so casa, al paecer dimitíu, anque, quién sabe, puede que namái seya cosa de la edá. Pero tiénse dío, cuando los retrasos nel calendariu proyectáu faciénse insoportables, y les multes del ministeriu, xunto col cabréu de la señora ministra, amonten, ensin que los de Tess Defensa, el consorciu formáu por Santa Bárbara, Indra, Sapa y Escribano consiga salir del quilombu industrial nel que se tienen metío.

N’Asturies, quiero pensar, l’asuntu güeyase con remor, pues el proyeutu ye, yera, el más potente de los qu’anguaño se desarrollen na rexón. Un rayu de lluz pa un Principáu cada día más avezáu al so cayente lentu ya imparable, con namái dalgún rellumu, como les noticies que lleguen a Xixón sobro la Universidá Europea. Nada que ver colos 40 mil millones comprometíos por inversores esteriores n’Aragón, por poner un exemplu.

Tiempos duros pa los dragones, que paecía remontaren el vuelu col ésitu d’aquella serie, Xuegu de Tronos, pero que, nel casu asturianu, paecen llegar demasiao tarde, especialmente pa esa infantería que, como amuesen les noticies que vienen d’Ucrania, atópase desarmada énte l’acosu de los drones, qu’aparenten cebase especialmente nos vehículos de combate como’l Dragón. Ye lo qu’hai.

Tiempos d’afogón na industria asturiana con esos retrasos ya indefiniciones, que ponen n’alerta a la Defensa nacional y al mercáu de trabayu rexonal ensin que, pol momentu, naide, na empresa y les instituciones, tome dalguna determinación.

Raúl Suevos

A 18 díes vencíos d’avientu de 2024.

Torna en castellán en repdiv.blogspot.com

Podrén mental

 

Esta ye la espresión que, acordies l’Oxford Dictionary, merez el títulu de lema o manifestación del añu nel Reinu Xuníu, si bien yo enteréme d’ello por un diariu italianu que se fai ecu y me la ofrez cola so “marcescenza” autóctona, que vendría a ser dalgo asina como’l munchu más celtibéricu podrén.

Yendo al orixe británicu, “brain rot”, deduzse fácilmente que la cosa nun va de fruta, nin de carne, sinon más bien de célules celebrales, eses que nel so conxuntu conformen la personalidá de les persones; eses que faen que mos vayamos desarrollando con una personalidá determinada; les mesmes que mos faen persones meyores o peores; les mesmes que, pa los fíos de la Gran Bretaña, a lo menos pa los rectores d’esi diccionariu pernomáu que la mayoría d’estudiantes de la llingua de Shakespeare tienen usao dalguna vegada, sumpuxeron el referente social del añu.

Nel nuesu casu nun ye una espresión, nin una pallabra, sinon un bon puñáu d’elles les que son elevaes a la fin de ca añu al olimpu de la espresión popular, casi toes más o menos convencionales, y ensin dulda esti añu dala d’elles llega a la fundura d’esi podrén que, al paecer, señala la deriva que la sociedá moderna tien dío tomando nos años caberos. Una deriva haza’l vacíu del alma colectiva.

N’Occidente, no sé hasta qué puntu les tecnoloxíes de la información son responsables, esfrutamos d’una dómina na que l’accesu a la información algama cotes inimaxinables nun va muncho; dalgo asina como cuando la imprenta aprució n’Europa y con ella abriéronse les puertes del Renacimientu, pero, al contrariu d’entoncenes, nun paez qu’esti avanzu teóricu mos esté aportando un engrandecimientu o elevamientu de les altures morales de les nueses sociedaes, en cambiu, la impresión xeneral, o a lo menos la mía, ye qu’avanzamos haza una especie d’aborregamientu xeneral nel que l’individuu, aquel que se suponía ciudadán, y pel camín camudose en consumidor, agora nun ye más qu’un “like” nuna red social.

Esi podrén mental algama toles capes de la sociedá, qu’agora son namái dos, políticos y votantes, y en dambes ye relativamente fácil aprecialo. Nunos apréciase a cada poco la falta d’idees pa desarrollar polítiques que meyoren la vida de les persones, como cabía esperar, y nel so llugar ye l’interés partidariu el que prevalez percima de too; y nel casu de la ciudadanía, esgotada énte l’ausencia d’esperanza, o simplemente cautiva d’una amebiasis mental tres años d’educación deficiente campa la desafección. Ye lo qu’hai.   

Raúl Suevos

A 15 díes vencíos d’avientu de 2024

Torna en castellán en repdiv.blogspot.com

Nunca esti vierme va llegar a caparina

 

Tamos nel 1991, esto ye, en plena euforia europea tres la cayída del Muru de Berlín, y cola Globalización económica tomando forma cola entrada nel asuntu de los xigantes asiáticos. Too paez sonrír al mundiu, particularmente a Europa, que se siente preparada pa cabalgar esa fola d’optimismu xeneral; pero, siempres hai agoreros.

El ministru d’esteriores lusemburgués, un país minúsculu incrustáu ente Francia y Alemaña, y muy cerque de Bélxica, pero que xestiona los capitales de mediu mundiu, y nel que la so clas dirixente, que lo ye casi tola población autóctona, conoz bien los rellabicos de lo qu’asocede en tol Globu y, lo que ye más interesante, lo que previsiblemente va asoceder nel futuru. El señor Jacques Poos, solmena-yos un discursu a los so colegas europeos nel que queda pa la historia la definición de lo que ye Europa: “Un xigante económicu, un nanu políticu, y un vierme militar”, col corolariu, pal canciller, de la necesidá d’equilibrar, haza arriba, los tres aspeutos señalaos nel so aforismu, anguaño históricu y citáu, desgraciadamente, con demasiada frecuencia.

No económico, Europa yá nun va tan bien, que-y lo entruguen a los xigantes clásicos, Francia y Alemaña, o podemos güeyamos nel espeyu de la nuesa Delda nós mesmos. Si vamos a lo político nada más tenemos que ver l’efuctu que les nueses “menacies” facen nel ánimu de Vladimir Putin, o la retirada vergoñosa francesa de la so área d’influyencia africana, o esos británicos, aínda más insignificantes tres la so salida estúpida d’Europa; ye lo qu’hai, dirá dalgún. Pero ye no militar, u peor tamos, pues si entoncenes, nel 91, podíemos esperar que, llegáu’l casu, esi vierme podría devenir en caparina rescamplante, güei namái podemos aspirar a que, ensin enantes nun ye aplastáu pol bastu zapatu rusu, mos transformemos n’algo paecío a un escarabayu peloteru, siempres emburriando marcha atrás, y lo que ye peor, emburriando la mierda d’otros. Acábase’l tiempu.

Nel 2014, tres la revolución ucraniana del Euromaidan, col sofitu calorosu, moral, de les élites europees, llegó la primer invasión rusa del país, cola ocupación de Crimea y el alzamientu orquestáu por Putin nel Dombas, y en Bruxeles nun foron, naide, a tomar nota y ponese a trabayar seriamente na construcción de la Defensa europea. Agora, tres más de 1000 díes de guerra total n’Ucrania, con milenta muertos y desplazaos, quiciabes seya tarde, anque tampocu se ve reacción.

Llega Trump, y el ciudadanu européu, especialmente l’español, nun ta preparáu pa pagar pola Defensa, prefier dise de puente, y el vierme arriésgase a que lu entartallen.

Raúl Suevos

A 7 de diciembre de 2024

Torna en castellán en repdiv.blogspot.com

Sidra, l'alderique

 

Magar presumir de playos, la nueche del  martes pasáu cometimos dos errores, como aquellos qu’aforcaron en falsu a Clint Eastwood na peli de nome semeyante, si bien nós nun tratábemos de tomanos la xusticia pela nuesa mano, namái queríemos tomar una docena d’oricios.

El casu ye que yá, mientes mos metíemos al abellu, pos na terraza baxo los soportales de la plaza del Ayuntamientu el llovíu y el vientu daben al asuntu un tonu bien embruscáu, cayímos na cuenta de que, en primer llugar, colos díes que llevábemos de mala mar yera duldosu que entraren oricios pa la so venta, y, amás, y en segundu llugar, anque yera martes, tábemos tres el llargu puente con casi too piesllao, y asina, mientes rematábemos un blancu d’albarín de la tierra de Cangues, pudimos comprobar vía teléfonu que los oricios yeren ilusión vana.

Aceptada la derrota, y guetando apangar no posible los daños, tomamos la ruta de la Guía, al traviés d’una ciudá semidesértica que contrastaba colos ensames del entamu del llargu puente, sabiendo qu’en Casa Arturo, a bon seguru, atoparíemos refuxu y pitanza cola certidume qu’ufierta saber na cocina al amu de la Casa. Y asina foi.

Col chigre bien animáu, tomamos asientu nel corneyal de fondu y decidimonos por esos chipirones en su tinta espectaculares que son inigualables pola so tenreza y sabor, pa zarrar con otru clásicu, el fégadu encebolláu, y too ello recibíu con una tacina de caldu de pescáu p’abrir boca. Un planazu.

El llugar y la selmana reclamaben acompañar la llacuada con una bona sidra y la ufierta de la casa foi esa xixonesa de nome de malváu de serie yanqui, aquella Dallas que tantes nueches familiares entretuvo, na so versión de denominación. Acabamos con dos botelles, bien echaes, y que dieron pal discutiniu del títulu d’esta tribuna.

Hasta dalgún sumiller tien entráu nel debate anguaño sobro’l futuru de la sidra, sobro si en sidrería nun se debe permitir el corchu dosificador, sobro si los isidrines de turnu rompen demasiao la sidra, y, en redol al maridaxe de la sidra cola ufierta culinaria y la so necesaria profesionalización en desendolcu, al mou del vinu. Too un mundiu de controversia que s’abre énte’l recien Patrimoniu inmaterial de la humanidá. Ye lo qu’hai.

A nós el discutiniu namái mos llegó al tamañu del culete, particularmente na mesa y comiendo. ¿Nun ye demasiao grande’l culete d’a seis la botella? ¿Nun sedría más afayaizu, pa la mesa, una midida de diez la botella? Mas trabayu sedría pal escanciador, seguro, y quiciabes se consumiera menos, pero’l culete tradicional paez demasiao grande mientes se come, especialmente pa foriatos. Ehí lo dexo.

Raúl Suevos

A 12 díes vencíos d’avientu de 2024

Torna en castellán en repdiv.blogspot.com