Cosacos zaporogos escribiendo-y una carta al sultán

 

Y’esti’l títulu d’un cuadru d’Iliá Repin fecháu a finales del S.XIX que recrea’l momentu nel que los cosacos de l’anguaño y tristemente pernomada Zaporiyia, esto ye, de la zona aú güei se desendolquen parte de los combates de la invasión d’Ucrania, retruquen a la esixencia del sultán d’Estambul, que a les so tropes derrotaran en delles ocasiones naquel final del S.XVII, pa que se rindieran ensin condiciones a la so suprema autoridá. ¿Suénavos?

Los cosacos, qu’ensin perder la so independencia bascularan ente’l kanatu de Crimea, el ducáu de Moscú o los reinos de Polonia y Lituania, contestaron con mui males formes a la Sublime Puerta, y nel cuadru podemos talantar dalgunes de les sos característiques sociales, lo que diba inspirar al director de vestuariu de la famosa película Taras Bulba, protagonizada por Yul Brinner y Tony Curtis. Anguaño yá casi naide escribe cartes.

A min la historia recuerdame muncho a la sobeya amosada por Vladimir Putin colos cosacos anguaño, les Fuercies armaes d’Ucrania y el so presidente Zelensky, que foron invadíos pol exércitu rusu, al que, tres la heroica defensa de les fuercies territoriales del país, que dieron tiempu a les unidaes nueves pa formase y cohesionase, tán actualmente solmenando derrotes perdures que pueden significar, acordies dellos analistes, el principiu del fin de la autocracia del amu del Kremlin.

Zelensky, tres la anexón política de les cuatro provincies ucranianes recién roblada, tien-y retrucao qu’Ucrania nun va tratar con Rusia demientres Putin siga al frente. Y esto ye un elementu a tener en cuenta porque los conflictos armaos namái acaben con la rendición incondicional d’una de les partes, o pente medies negociaciones patrocinaes por terceros. Y yo creo qu’esti va ser el fin del conflicto anguaño porque nun veo a Rusia rindiéndose.

Henri Kissinger yá va dellos meses que faló de transaccionar, faló de Crimea. Esta semana cabera tamién se tien espresao en términos paecíos Elón Musk, que punxo estos meses a disposición d’Ucrania el so sistema Starlink. Dambos foron verbalmente masacraos, pero dambos, dende ámbitos estremaos, son realistes fonderos, y saben que naide, nin Rusia, nin los EEXX, tampocu China, nin India,  nin muncho menos Ucrania, pueden plantegase una guerra de percorriu llargu.

Les previsiones del PIB mundial pa 2022 cayeron a metá d’añu dende’l 4,1% al 2,9% lo que supón una cifra descomanada qu’entá se pue engrandar no que queda y que va obligar a los grandes actores mundiales a mover ficha. El problema, y él sábelo, ye Vladimir Putin, quien nestos momentos nun pue cuntar nin siquier coles bendiciones de Kiril, el Patriarca moscovita, un taráu como él.     

Raúl Suevos

A 6 díes vencíos d’ochobre de 2022

Torna en castellán en repdiv.blogspot.com